1 Timotee 1

Tɛkäbɔgʋʋ Pɔɔlʋ 'cɛlɩɛ

Timotee

'wʋʋ

Bhälɩwɛlɩɩ

‑Amö Zezwii Kliisɩ a tietienyɔ Pɔɔlʋ,

‑amöö cɛlɩɛ dɛ'ɛ 'bɔgʋ nɩ.

‑Aa Puënyɔ Lagɔ ‑nyɛ ‑aa dlɩtɛɛnɩnyɔ Zezwii Kliisɩ 'sɔ,

mʋa 'zʋaaa wa tietienyɔ 'wʋ.

2 ‑Nmö Timotee,

‑nmöö glɩnɩɛ Lagɔsɛ a dɔ'wʋ na 'yuu,

‑nmö n cɛlɩɛ dɛ'ɛ 'wʋ.

‑Aa dɩba Lagɔ ‑nyɛ ‑Alowli Zezwii Kliisɩ 'sɔ,

dlɩzɛmönanɔɔ ‑nyɛ 'nyupälɩɩ 'sɔ 'n 'pʋpʋɛɛ ‑yɩ 'bhöönuëë 'möö,

yɩ nɩ ghälamö 'wʋ.

Nɩkpaa ‑wa sɛnɩɛ Lagɔ 'a wɛlɩɩ widɩ 'möö

3 Na 'yu,

n lɛ 'kää ‑mä Masedʋanɩ‑bhölɩɩ 'mö möä yi a sɛ n nyɩamö a‑a 'dɩɩ,

‑sɩbhä n nyɩamöä dɛ'ɛ 'dɩ nɩɩ:

‑Mä Efɛɛzɩ glɔ 'mö,

glɩ ‑bhlɛ ‑mä 'yize.

‑Maa ‑mä ‑glɔ 'la 'mö,

nɩkpa ‑mumuë ‑wʋ ‑mä,

käböwɛlɩ a ‑mii ‑nyɛ Lagɔ 'a wɛlɩɩ 'nɩ mönɩɛ yɔwʋʋ,

'mö wa biaa.

'Nyʋä 'dɩ,

wa nɩ tɩ sa'a zʋ.

4 Wɛlɩ nɩkpa sɛɛ 'wlumö,

'n sɛɛ ‑aa dɩbawa a dɩbawa gwälɩgwälɩnɩɛ a wɛlɩ,

‑yɩɩɛ 'bhlenɩdɛ ‑kää,

wa nɩ ‑sɩɩ kɛ'mö.

Ɛ'ɛ ‑bhö nyɩasɛ,

‑maa sa'a a wɛlɩɩ,

kpɛnɩkpɛnɛ a 'yize yɩ lɛmöä.

Lagɔ 'a slɛlɛɛ ɔ 'pää ‑a 'kɔ dlɩ 'tɛɛnɩɩ,

ɛ dɔ'wʋ,

yɩ'ɩɛ dɛsɛ ‑kä.

5 'Lɩlɩlɩ a dɔ'wʋ,

'dɩmözʋzwɛɛ 'wuë a zɛmö ma‑a nɩɩ,

nɩkpɛ 'kä ‑wawʋ a 'yize dlɩ zɛmö ‑kä,

'ɔ dlɩɩ tɩa 'mö ‑dlinɩ,

ɔ dlɩ zɛmö 'kä ‑pälɛpälɛ ‑wʋ,

ɔ 'kä ‑tiamö Lagɔ dlɩ 'tɛɛnɩ.

6 ‑Maa nɩkpa ‑mumuë,

wa yɛ ‑li 'la 'wuë kɛ'mö ‑sɛ,

'fʋ a wɛlɩɩ a 'mökpɛnɩlibho wa käa'aa.

7 Wa lɛ mʋa glɩnɩ Lagɔ 'a Gböö a 'cɩawaa.

‑Maa ‑lii ‑yɩnyɩɩ dɛ wa ‑kä bhïla dɔ'wʋ ‑wʋ 'n ku 'mö ‑suëë,

wa'bhï wa 'niɛ tɛkäsɛ a'bhë ‑yi.

Wanyɩ a wɛlɩɩ wa sɛɛ 'wlumö,

'n wa bhïlaa ‑li 'la a dɛɛ,

wa'bhï wa'aa yɩ zɛmö ‑yi.

8 ‑A ‑yi sɛ nɩɩ,

Lagɔ 'a Gböö,

‑li a ‑li yɩ glɩnɩɛ nɩkpɛ a ‑mɔ zwiɛ sasɛ 'klʋkpamö a dɔ'wʋ.

9 'Lɩlɩlɩ a dɔ'wʋ Lagɔ 'a Gböö,

nɩkpa a ‑muëë nʋä 'saa nɛnɩɛ Lagɔ dlɩ yɔwʋʋ,

wa za yɩ'ɩɛ ‑lɛ ‑wʋ.

‑Maa ‑muë ‑waa ngluä ‑lu ‑bhlʋ a'bhë a 'klʋkpamözʋgbʋ,

‑wa fälanɩɛ Lagɔ ‑nyɛ Lagɔlii 'wuë 'sɔ 'ylimö,

‑wa nʋä ‑lizoku a kii 'wuë,

‑wa lɩbhää wa dɩbawa ‑nyɛ wa ‑dawa 'sɔ 'n wa kuä,

wa ‑nyɛ 'kulɩbhäwa a kii 'wuë 'sɔ,

10 'ngwlɩ ‑nyɛ nyɩbhɛlɩ 'sɔ ‑wa nʋä yɩ'ɩɛ nʋnʋsɛ ‑wʋ muë,

‑wa ‑nyɛ wa 'bhɩanyɩbhɛlɩ pöä 'ngwlɩ a sɛ sɛ muë,

‑wa pää nɩkpaa 'pɛlʋ muë,

‑wa 'libhïnɩɛ wa 'bhɩa yio 'wʋʋ,

wa ‑nyɛ yiowaa 'wuë 'sɔ muë,

‑li a kii 'wuë ‑yɩ ‑nyɛ Lagɔ 'a ‑tiamö a wɛlɩɩ 'nɩ mönɩɛ yɔwʋʋ,

‑wa nwiɛ,

wa za Lagɔ 'a Gböö ‑wʋä ‑lɛ.

11 Sɛ n nyɩamöä dɛ'ɛ 'dɩɩ,

Lagɔ ‑ɔ 'ghïliɛ,

‑li a ‑li a kii 'wuë 'bhöönɩɛ 'möö,

'ɔ 'Mänatɩtɩɩ ‑yɩnyɩɩ biabialibhoo ɔ nyɩaaa,

‑sɩbhä yɩ gbää.

Pɔɔlʋ bhälɩ ‑Alowli Zezwii 'ɔ ‑li a ‑lii a za

12 ‑Alowli Zezwii Kliisɩ,

sɛ ɔ ‑kaaa dlɩ 'wʋ 'n ɔ ‑yiiɛ ‑lɛ ‑sɛ n 'kä 'ɔ libhoo nʋ a za,

n bhälɔ ‑këë.

Ɔ'bhë mɔɔ nyɩaaa 'mötɛɛnɔ n 'kä ‑lɛ a libho 'la nʋ.

13 Bhla'mö a dɔ'wʋ,

wɛlɩzoku n bhïla a‑a ɔ dɛ,

‑di n zio a‑a,

ɔ ‑nʋa 'mö n ‑gblɩ a‑a.

‑Sɩbhä yɩ ‑wʋ 'mö,

'n ɔ yiɛ na ngäzɩdlɩ 'pä.

Ɔ ‑yi sɛ nɩɩ,

dɛ n ‑wʋ a‑a sa'a 'zʋ dɔ'wʋʋ,

n 'nɔ a dlɩ 'wʋ ‑kä zaa,

n'n a 'saa n nʋä ‑yi.

14 ‑Alowli Zezwii,

'nyu ɔ paaaa ‑tiamö tenyii,

ɔ'bhë mɔɔ kää 'nglɩ 'n n 'tɛɛnɔa'aa ‑sɩkaa dlɩ 'n n ‑wɔɔɔ tenyii.

15 Zezwii Kliisɩ,

ɔ 'kä nɩkpa 'wa 'nyinylolii a gbʋʋ ‑gömö ‑sɛ,

ɔ 'kʋä puë,

nza ɔ yiɛ mä'ä dʋdʋ 'wʋ.

Wɛlɩ 'la,

‑tiawɛlɩ a ‑mi nɩkpaa 'wuë kä wa 'kä 'wʋ nglu wa 'kä dlɩ 'wʋ ‑kää,

'mö yɩ glɩnɩɛ.

‑Maa 'nyinylolinʋwa 'la 'wuë a gla'mö a dɔ'wʋ,

‑amöö ziɛ 'wʋ.

16 ‑Amöö glɩnɩɛ sɛ'ɛ 'nyinylolinʋwaa a gla'mö a 'kɔdɔɔ,

na ngäzɩdlɩ Zezwii Kliisɩ 'pää tɛɛ a'bhë.

'Fʋ ɔ'ɔɔ ‑sɩbhä 'zʋ,

‑maa sɛ ɔ ‑kpaanɩɛ dlɩ 'mö nɩkpa ‑gömö a dɔ'wʋʋ,

‑sɩbhä 'kä 'ylɩmö 'yoo,

nzɩɩ nɩkpaa 'wuë 'kä sɛ yɩbhlɩmanɩ nɩɩ,

‑wa glɩnɩɛ sɛ'ɛ 'na sɛ a 'nyinylolinʋwa 'kädɩɩ,

wa ‑kɔɔ dlɩ 'tɛɛnɩɩ,

wa 'wuë ɔ yi wa ngäzɩdlɩ 'pämö,

'pɩwʋ mää 'naa 'kää 'yli bhɩɛɛ,

ɔ yuë ‑mä 'nyɛ.

17 Lagɔ ‑ɔ 'kämanɩ 'kwädlɩkwädlɩnɩ,

‑ɔɔ bhɩɛ 'wʋ,

‑bɛ 'nɩɛ ‑bhlɛ tɛkäsɛ 'ylɩmö,

‑ɔ glɩnɩ ɔ 'yize ‑tiamö a Lagɔ,

nɩkpaa 'wuë nɩ 'zʋ ‑lɛ ɔ 'nglɩ,

yɩ nɩ 'ghlimanɩ 'kwädlɩkwädlɩnɩ.

‑Amɛɛ!

18 ‑Nmö na 'yu Timotee,

wɛlɩɩ n tɩɩmöä dɛ'ɛ yɔwʋʋ,

'nyɩ nɩkpa.

‑Na'a libhoo Lagɔ nyɩamöä,

muä.

'Mö Lagɔ 'a 'Wugɔmʋʋ bhïlanɩ a‑a 'ylɩ ‑bhlʋ 'mö nɩkpa ‑mumuë ‑na dɛ 'mö.

Wɛlɩ 'la,

ti 'wʋ dlʋ tʋ ‑tɩmöa lu,

nzɩɩ libho a ‑libhoo Lagɔ nyɩamöä ‑n 'kʋ nʋ.

19 ‑N ‑kʋʋ nʋ dɔ'wʋ ‑wʋʋ,

Lagɔ 'a ‑tiamö a wɛlɩɩ ti kɛ 'mö ‑sɛ,

‑na'a 'mlɩwʋnuëyii ‑tɩmöa gbʋ köbha.

‑Maa nɩkpa ‑mumuë wabhlɩ,

'wa 'mlɩwʋnuëyii,

wa 'nɔɔ 'yukwli ‑pʋnɩ,

mɩɩ kää 'nglɩ,

käböwɛlɩɩ ‑yɩɩɛ gbëaa 'mö ‑kää,

'n yɩ yuëë 'wlumö nyima.

20 Nɩkpaa 'sɔ ‑kpɔ wa laa Yimenee 'n Alɛzaadlɩ,

‑sɩbhä wa ‑wʋmöä.

‑Sɩbhä a za n plɩnuëë Sataa kä'mö.

‑Lɛ a dɔ'wʋ,

wa yi Lagɔ 'a nglɩɩ a nyimanyimu kɛ'mö ‑sɛ.