2 Timotee 2

Kliisɩ a 'slʋjeyi a ‑slʋjeyi

Na 'yu Timotee,

sɛɛ Lagɔ pää 'kwädlɩ ‑aa ngäzɩdlɩ Zezwii Kliisɩ a bɔɔmö a za‑a,

‑sɩbhä nɩ 'tɛmanɩmö 'yli yɔwʋ.

2 Lagɔ 'a wɛlɩɩ n 'nyɛnɩmöä nɩkpa a ‑bɛ a 'yila 'klʋʋ,

nɩkpa a ‑muë wa kää wa 'kä dlɩ 'wʋ ‑kä,

‑wa bhɛnɩɛ wa 'kɩ ‑mumuë 'cɩamöö,

'nyʋänyɩ'ɛ ‑naa.

3 Sɛɛ 'slʋjeyi a ‑nɔ a ‑nɔ nglu'ɛ 'zwɩzigbʋʋ,

‑n 'kä Zezwii Kliisɩ 'a wɛlɩɩ a za 'zwɩ zi a dɔ'wʋ tɩ nimï ‑sɛ.

4 ‑N ‑yi sɛ nɩɩ,

'slʋjeyi ‑kä ‑bhlɛ 'slʋja 'mö ‑wʋʋ,

ɔ 'kä 'ɔ 'kämanɩnyɔɔ dlɩ yɔwʋ nɛnɩ a 'yize a gbʋ mʋʋ plɛnɔɔ,

‑maa käböli a gbʋ 'nɔɔ plɛnɩ.

5 ‑Gbaplanyɔ ‑kä ɔ 'kä 'ɔ ‑gba a 'ylimö a ‑lu ghlɩ nʋʋ,

ɔ'ɔɔ ‑kä ɔ 'kä ɔ 'lilɛ 'wi 'mö kwä.

6 Glʋglʋnyɔ mɔɔ kplɛɛ tenyii 'klʋ zaa,

mɔɔ kää ɔ 'kä tɛɛ 'ɔ 'lagblɛɛ 'mö a lilea li.

7 Timotee,

wɛlɩɩ n nyɩamöä,

'päni sasɛ dlɩ kɛ.

‑Alowli Lagɔ a'bhë mɔɔ ‑kamöä 'nɛɛnɔ 'nyɛ yɩ 'wuë ‑n 'kɩ 'mö 'nʋ.

8 ‑N ‑yi sɛ nɩɩ,

Zezwii Kliisɩ ‑ɔ 'bhöönɩɛ Daviidɩ 'a ngëyii 'möö,

ɔ 'kuä 'wëë,

'mö Lagɔ gälaa 'n ɔ yoo glu ‑sɛ.

'Mänatɩtɩɩ n biaa,

sa'a yɩ gbää.

9 'Mänatɩtɩ 'la a za nza wa 'yɩaaa 'klɩ,

nza n ‑wʋä dɛ'ɛ jɛzlʋnyɔ a sɛ ‑jie 'mö.

‑Maa wa ‑yii ‑jie 'mö 'pä ‑kë,

Lagɔ 'a wɛlɩɩ,

wa'aa bhɛnɩ wa 'kɩ ‑jie 'mö 'pämö.

10 Nza n ngluä 'klɩyɩyɛ 'wʋ nzɩɩ,

nɩkpaa Lagɔ ‑sɛɛ ‑lɛ,

wa 'kä 'ɔ 'pʋpʋɛ ghlɩ Zezwii Kliisɩ a bɔɔmö a za.

'Ɔ 'pɩwʋlelea,

‑aa bhɩɛɛ 'yli,

‑aaa ‑sɩbhä a sɛ ‑wʋʋ,

‑mä a 'wʋ wa 'kä ‑mä 'bhle ghlɩ.

11 Timotee,

wɛlɩ a wɛlɩ a ‑mi ‑n 'kää dlɩ 'tɛɛnɩ,

miɛ nɩɩ:

«‑A ‑nyɔɔ 'sɔ,

a‑a ‑kä 'gämö 'kunɩɩ,

‑a ‑nyɔɔ 'sɔ,

‑a yi 'gämö ‑bhölɩnɩ.

12 ‑A ‑nyɔɔ 'sɔ,

‑a ‑kä 'zwɩ zi kploo,

‑a ‑nyɔɔ 'sɔ,

‑a yi 'kämanɩ.

A‑a ‑kɔɔ nimï ‑sɛɛ,

ɔ ‑yinyɩ nimï ‑sɛ.

13 Ɔ sɛ ɔ yɛɛ gbä 'wëë,

‑sɩbhä ɔ zʋä klɩpaa.

Zaa,

a‑a 'nɩ dlɩ'wʋkäwa glɩnɩ ‑kë,

dlɩ'wʋkänyɔ ɔ glɩnɩɛ ɔbhlɩ 'yize.»

Lagɔ a libhonʋnyɔ a ‑nɔ a ‑nɔ

14 Timotee,

wɛlɩ 'la,

ligbanii wa 'wuë 'wʋ.

'Nyʋä gbëaa Lagɔ a 'nglɩ 'mö 'dɩ nɩɩ,

wɛlɩkïbhïyiea 'wuë a 'mökpɛnɩkpɛnɛ,

wa nɩ ‑sɛɛ kɛ'mö,

‑maa ɛ'ɛ nɩkpɛ a ‑li a ‑li 'mö kä,

‑wa ‑pʋnɛɛ 'yukwlii,

tɩ ɛ 'kʋää tɩ.

15 ‑Na'a Lagɔlibhoo ‑n nʋä,

wʋ 'kä Lagɔ dlɩ yɔwʋ nɛnɩ a gbʋ mʋʋ nɩ plɛnɩmö.

'Ɔ ‑tiamö a wɛlɩɩ,

bhïlii gbëaa,

‑lɛ a dɔ'wʋ ‑na'a libhoo 'naa ‑kamö 'klʋ 'mö 'kpëakpëanɩ.

16 Nyɩasɛwɛlɩɩ ‑yɩ ‑nyɛ Lagɔ 'a wɛlɩɩ 'nɩ mönɩɛ yɔwʋʋ,

'dionii gwë,

‑maa ‑wa ‑gänɩɛ ‑lɛ a wɛlɩ 'la,

'saa 'nɩɛ Lagɔsɛ ‑wʋ 'lɩlɩlɩ 'mö yɩ 'pänuëë 'wʋ 'yize.

17 Sɛɛ zɛɛzɛɛja do'ɛɛ,

sɩbhä yɩ ‑wʋä saa 'wuë mlɩmanɩ dɔ'wʋ.

Yɩ biabiawaa gla'mö ‑mä Yimenee ‑nyɛ Filɛɛtɩ 'sɔ ‑wʋmöä.

18 Nɩkpa 'la wa yɛ Lagɔ 'a ‑tiamö a wɛlɩɩ kɛ'mö ‑sɛ 'n wa nʋä nɩɩ,

gluwlʋwlɛ yɛ 'plɩ 'wë.

Sa'a ‑sɩbhä wa tɩɛ ‑mumuë 'a dlɩ'wʋkänɔɔ.

19 ‑Sɩbhä yɩ ‑wʋ 'mö,

‑maa sɛ wa pälɩnɩɛ ‑budu 'kpɩ gluu,

‑sɩbhä Lagɔ 'zʋä 'ɔ wɛlɩɩ,

‑nyɔnʋ yɩ ‑nyɔnʋä.

‑Lɛ kpɩ 'la 'klʋ,

sɛ'ɛ yɩ cɛlɩɛ ‑lɛ nɩɩ:

‑Alowli ‑yi ɔ nʋa.^a

'N sɛ'ɛ yɩ cɛlɩ'ɛɛ ‑lɛ nɩɩ:

‑Ɔ ‑kä nɩɩ ‑Alowli a ‑nɔ ɔ glɩnɩɛ nʋʋ,

ɔ kä ɔ 'kä ‑lizokuu gwë 'dionɩ.

20 Wʋlʋnɩbudu 'mö,

‑sikali ‑nyɛ dleyili 'sɔ a 'yize mɩɩ 'nɩɛ ‑mä ‑wʋ,

‑maa,

tɛlɩtɛlɩli ‑nyɛ mamali 'sɔ ‑wʋmö'ɛɛ ‑mä.

‑Sikalii ‑nyɛ dleyilii 'sɔ,

'fɛtɩ a zlɩ a 'yize wa sɩɛ 'bhle.

‑Maa Tɛlɩtɛlɩlii ‑nyɛ mamalii 'sɔ yɩbhlɩ,

zila 'wuë 'mö a ‑liɛ.

21 Zaa,

‑lizoku 'la 'wuë ‑yɩnyɩɩ dɛ n bhïlaa,

nɩkpa a ‑muë ‑kɩɩ kɛ'mö ‑sɛɛ,

‑sikalii ‑nyɛ dleyilii 'sɔ,

'mö n päluëë 'wʋ.

Sɛ wa glɩnɩɛ wa 'bhidɩba Lagɔ a 'yize a ‑nʋä,

sɛ wa kɔɔ dɛsɛɛ,

‑sɩbhä a za,

'ɔ libhi a ‑libhi a kii 'wuë wa yi nʋ.

22 Timotee,

‑li a kii 'wuë a 'tʋzokwëa ‑a ‑sunɩɛ nyɛgbayuë 'wlumöö,

'dionaa gwë.

'Saa zlɔnɩɛ 'mö mu,

Lagɔ a dlɩtɛɛnɩtɛnɛ mɛ,

‑wawʋ mu,

'n ‑wanɩwanɛ,

‑li 'la a gbʋʋ mʋʋ nɩ plɛnɩmö.

‑Wa kää ‑Alowli Zezwii a 'nglɩ ‑gömö,

‑wanyɩɩ dilaa 'nɩɛ 'mö ‑dlinɩ ɔ dɔ'wʋʋ,

mö ‑n ‑nyɛɛ nɩ ‑glɛglɛnɩ 'wʋ.

23 ‑Maa ‑ɔɔ'nɛɛnɩwɛlɩɩ ‑yɩɩɛ dɛsɛ ‑kä,

nɩkpa kpɛnɩɛ 'fʋ 'möö,

'dionii gwë.

Ɛ'ɛ ‑bhö nyɩasɛ,

‑maa 'lʋlwɛɛ a 'yize yɩ ‑glɛɛ gwë.

24 ‑Na'bhë ‑n ‑yi sɛ nɩɩ,

Lagɔ a 'yliwʋnyɔ,

ɔ'ɔɔ ‑kä ɔ ‑nyɛ nɩkpɛ 'kä 'lʋ.

‑Maa nɩkpaa 'wuë ‑gömö a dɔ'wʋ,

'ɔ dlɩɩ,

‑pälɛpälɛ ɛ kää ɛ 'kä ‑wʋ.

Lagɔ 'a wɛlɩɩ,

ɔ kä ɔ 'kɩ sasɛ 'cɩasɛ ‑yi.

Wa ‑kɔɔ wɛlɩzoku bhïlanɩɩ,

'ɔ dlɩɩ 'mö ɔ kää ɔ 'kä 'wʋ pɩɛnɩ.

25 ‑Wa kpɛnɩɛ Lagɔ 'a wɛlɩɩ 'möö,

ɔ nɩ 'cɩanuë dlɩwätɛ 'mö.

Ɔ ‑kä ‑sɩbhä 'zʋʋ,

‑sɩbhä yi ‑kamä 'nglɩ ‑kä nɩkpa 'la,

Lagɔ yi 'wa dilaa 'klʋ kälɩ,

wa yi 'wa saa kɛ'mö ‑sɛ,

wa yi 'ɔ ‑tiamö a wɛlɩɩ yɩbhlɩnɩ.

26 ‑Lɛ a dɔ'wʋ wa yi 'nɛmanɩ,

Sataa a gbli ɔ 'pʋää 'mö wa 'kɔ 'klʋkpamö 'zʋ a za‑a,

wa yi 'mö 'wlʋ.