Lwiikö 14

Zezwii yɛ nɩkpɛ ‑gwlɛnɩzlɩ yɛmanɩ

‑Gwlɛnɩzlɩ ‑mɛmɛɛ ‑bhlʋ 'mö,

‑mä Falizɩɛwaa a 'kifi ‑bhlʋ a mä'a,

‑mä Zezwii möä lie.

Ɔ ghlɛɛ ‑mä,

‑wa ‑wʋä ‑mä 'wuë,

kä'mö wa yiloo.

2 Ɛ'ɛ ‑bhö nyɩasɛ,

‑maa nɩkpɛ ‑bhlʋ ‑wʋmö a ‑mä,

‑nenibhïï lɩbhɔɔ.

Nɩkpɛ 'la,

mɔɔ yiɛ Zezwii yɔwʋ.

3 Zezwii 'yoo 'ylɩmöö,

Moyizɩ 'a Gböö a 'cɩawaa ‑nyɛ Falizɩɛwaa 'sɔ ‑wa ‑wʋmö a‑a ‑mä,

'n ɔ yuëë nimï 'yɩbhä nɩɩ:

«‑A'a gböö a dɔ'wʋ,

wa ‑kä ‑gwlɛnɩzlɩ nɩkpɛ yɛmanɩɩ,

yɩ nɛnɩ bhä?»

4 Wa 'wuë vlɩɩ,

wa'aa gbʋ ‑dɩ.

'N Zezwii yiɛ nɩkpɛ 'la kɛ zɩ 'n ɔ yiɛ yɛmanɩ.

Ɔ lɛ naa:

«Mö 'ligbë 'mö.»

'N nɩkpɛɛ yiɛ mö.

5 Ɔ möä 'wëë,

Zezwii lɛ naa:

«A gla'mö a ‑nɔ ‑bhlʋ,

ɛ ‑kä ɔ yowli mɔ,

ɛ ‑kä'ɛ 'ɔ bhilii mɛ,

ɛ ‑kä 'nyibhë 'mö bhlinɩɩ,

ɛ yi ‑gwlɛnɩzlɩ ‑kë,

ɔ'ɔɔ ɔ 'kä bhä ‑mä sɛ 'sibhë,

ɔ 'kɛ ‑mä ‑sɛ ɔ 'kɛ puë ‑a?»

6 Ɔ 'yɩbhʋää sa'a nimïï,

wa 'wuë 'wʋ wa ‑gɔɔ 'yize.

Wa'aa'a sɛ wa 'kä gbä ‑yi.

Tɩ ‑nanyɩ 'kɔdɔ 'mö 'wʋ 'libhï

7 Nɩkpaa wa wäzɩ a‑a liliza‑a,

'bhli a ‑bhlii 'mö wa gbäzɩɛ 'mö,

'n wa yiɛ 'mö sɛ glɩ.

'Mö Zezwii 'yɩɛ 'ylɩmö zaa,

'n ɔ yuëë 'dɩ 'mö zʋ,

ɔ lɛ naa:

8 «Nglʋkwäpɩpɩ 'wʋ,

'n nɩkpɛ ‑kamö ‑mä liliza wäzɩ,

‑n ‑kä ‑lɛ ghlɛɛ,

tɩ ‑mä 'bhle a ‑bhlea 'mö sɛ glɩ.

‑Nmö ‑yia'a ‑kamä nɩkpɛ 'kɔdɔ ‑wʋmö ‑lɛ pɩpɩ 'la 'wʋ.

9 Ɔ ‑kä ‑lɛ ‑wʋʋ,

‑ɔ wäzanyɩ a‑a,

'dɩ ɔ ‑kamöä 'nyɛ nɩɩ:

'Tua,

ɛ'ɛ ‑bhö dɛ'ɛ ‑na'a bhlea ma,

‑maa ‑sɔ 'wʋ,

‑mɔ nɩ 'kä sɛ glɩ.

Ɔ ‑kä sa'a gbää,

‑na 'ylimö 'wuë zʋ,

n‑n lɛ 'kää 'wʋ ‑sɔ,

‑n 'kä ‑mä nimïnimï sɛ glɩɛ mö.

10 Zaa,

wa ‑kamö liliza wäzɩ,

n‑n ‑kä ‑lɛ ghlɛɛ,

glɩ ‑mä nimïnimï a bhlea 'wʋ sɛ.

‑Lɛ a dɔ'wʋ,

‑ɔ wäzɩmö a‑a,

‑ɔ ‑kä yii,

mɔɔ ‑kamöä 'dɩ 'nyɛ nɩɩ:

'Tua,

dɛ'ɛ ‑lɛ ‑n 'naa 'kä glɩ,

‑maa ‑sɔ 'wʋ ‑n 'kä ‑mä 'yuku a 'bhle a ‑bhlea 'mö sɛ glɩɛ mö.

‑Lɛ a dɔ'wʋ,

nɩkpa 'wuë ‑wa ‑wʋmöä ‑lɛ,

wa ‑yimö 'nglɩ ‑dɩ.

11 Nza n gbää nɩɩ,

‑ɔ ‑kä ɔnyɩ 'kɔdɔ 'mö 'wʋ 'libhïï,

Lagɔ dʋdʋ 'wʋ ɔ 'kɔɔ ‑lɛ.

‑Maa ‑ɔ ‑kä ɔnyɩ 'tikëyi 'mö 'wʋ 'libhïï,

'mö Lagɔ 'kää 'kɔdɔ 'wʋ 'zʋa.»

12 'N Zezwii yia'aa 'ligbëlowlii 'yi gö,

ɔ lɛ naa:

«‑N ‑kä lile 'käda pi n‑n ‑kä nɩkpa wäzɩɩ,

tɩ ‑na 'tuawa wäzɩ,

tɩ ‑na ‑daayuë wäzɩ,

tɩ ‑na'a waa wäzɩ,

‑n ‑nyɛ glɩnɩɛ 'wʋ a gla'mö a wʋlʋnɩwaa,

tuë'ɛ wäzɩ.

Nyɩasɛ n'n‑ä ‑sɩbhä gbä,

‑maa nɩkpa 'la 'wuë,

‑n ‑kʋä wäzɩɩ,

wa ‑yimö'ɛ wabhlɩ 'ylɩ ‑bhlʋ 'mö wäzɩ.

‑Lɛ a dɔ'wʋ,

‑na'a 'saa ‑n nuë a‑a 'wluu,

yɩ gbʋ 'mö wa yɛɛ da'a ‑sɛɛ.

13 ‑Maa ‑n ‑kä lile 'käda pi n‑n ‑kä nɩkpa wäzɩɩ,

wäzɩ 'pʋäwaa,

wäzɩ kpälɛkpälɛwaa,

wäzɩ bhʋgbëyikäwaa,

wäzɩ 'kukwlekäwaa.

14 Nɩkpa 'la mö ‑n ‑kä wäzɩɩ,

'saa ‑n 'nyʋää da'a,

wa'aa bhɛnɩ wa 'kä yɩ gbʋ ‑sɛ zaa ‑na'a ‑jɔlʋ.

Ɛ'ɛ ‑bhö nyɩasɛ,

‑maa ‑wa zlɔnɩɛ 'mö Lagɔ a 'yila 'klʋ a dɔ'wʋ ‑wa 'kuä,

‑zlɩ Lagɔ ‑kʋä glu ‑sɛɛ,

ɔ ‑yimö ‑lɛ a 'ylimö a ‑lu 'nyɛ.»

Nɩkpaa wa wäzɩnɩɛ nglʋkwälilea 'wʋ a ninea

(Matie 22.1‑10)

15 Zezwii gbää sa'a 'wëë,

‑wa ‑nyɔɔ ‑wʋä 'wʋ linɩ dɔ'wʋ,

wa gla'mö a nɩkpɛ ‑bhlʋ lɛ naa:

«Nɩkpa 'wuë,

Lagɔ wäzɩnɩɛ ‑mä 'pɩwʋ mä ɔ 'kämanɩɛ,

wa ‑nyɔɔ 'kä 'wʋ linɩɩ,

'wa ‑jɔlʋ!»

16 Ɔ gbää sa'a,

'n Zezwii yiɛ 'nine 'pä,

ɔ lɛ naa:

«Nɩkpɛ ‑bhlʋ mɔɔ piɛ lile 'käda 'n ɔ yiɛ nɩkpa a ‑vlʋgbʋ wäzɩ.

17 Ɔ piɛ lilea 'wëë,

'n ɔ yiɛ 'ɔ 'yliwʋnyɔɔ tie,

ɔ lɛ naa:

Nɩkpa 'wuë n wäzɩ a‑a,

mö ‑n 'kʋä 'dɩ 'nyɛ nɩɩ,

wa nɩ yi ‑a 'kä li,

‑maa lilea yɛ yli.

18 Wa 'wuë,

nɩkpɛ wa tuë a‑a 'wʋ 'kʋää kie möö,

wanyɩ wa biabianɩɛ 'wʋ.

Tɛkänɔɔ lɛ naa:

Ɔ ‑kɔfänɩɛ,

n yi a yi,

‑maa na 'lagblɛ n pɩaa,

sɛ yɩ 'nɩa'a 'mö ‑wʋ ‑kë,

'mö n lɛ 'kää zɩ'ɛ 'ylɩmöä mö klɩpaa zaa,

n'n‑ä n 'käa'a yi.

19 'Sɔnɔɔ lɛ naa:

Na 'bhila kʋgbä n pɩaa n ‑nyɩɩ 'kä libho nʋʋ,

'mö n lɛ 'kää zɩ'ɛ ‑li 'mö yɛlaa mö.

Zaa,

ɔ ‑kɔfänɩɛ.

20 Tanɔɔ lɛ naa:

'Nglɔ n kwää zɩ'ɛ zaa,

n'n‑ä n 'kä ‑gba 'mö 'bhöö.

21 Sa'a ‑këë 'n nɩkpɛɛ yiɛ 'wlu sɩbhä 'n ɔ yiɛ ɔ 'bhidɩba 'dɩ kwä.

Ɔ 'bhidɩba 'nwiɛ,

'n yɩ yoo dlɩ yɔwʋ sumanɩ tenyii,

'n ɔ yoo 'wʋ 'sɔ tienɩ,

ɔ lɛ naa:

Mö ‑mä ‑glɔɔ a këtiea 'wuë 'wʋ,

'pʋäwaa muë,

kpälɛkpälɛwaa muë,

'kukwlekäwaa muë,

bhʋgbëyikäwaa,

‑n 'kʋä wäzɩ,

‑n ‑nyʋä 'kä yi wa 'kä li.

22 'N ɔ yiɛ mö.

‑Lɛ gwälɛɛ 'tikïyie 'wʋ 'möö,

'n ɔ yi'ɛɛ ɔ 'bhidɩba 'dɩ 'nyɛɛ yi,

ɔ lɛ naa:

‑A'bhidɩba,

sɛ ‑n gbä a‑a n nɩ 'zʋʋ,

n yɛ ‑sɩbhä 'zʋ 'wë ‑maa 'bhle tʋʋ ‑bhlɛ 'wʋ 'yize.

23 'Bhidɩbaa lɛ naa:

‑Glɔkʋkʋ yɔwʋ a 'ywii ‑nyɛ 'kwlɛywii 'sɔ 'wʋ,

mö ‑mä,

‑mɔ ‑n ‑kä ‑mä ghlɩnɩ ‑kë,

'nyɔ 'dɩ nɩɩ,

ɔ nɩ yi klɩpaa,

'na lilea a liwa 'käa 'ylimö mlɩmanɩ.

24 ‑Maa nɩkpa 'wuë n wäzɩ a‑a,

‑wa biabianɩɛ sa'a wanyɩ 'wʋʋ,

wa gla'mö a ‑nɔ ‑bhlʋ a'bhë,

ɔ 'naa ‑kaa ‑gänɩ.»

Sɛ ‑a 'kää Zezwii ‑gänɩɩ

(Matie 10.37‑38)

25 Zezwii ‑wʋä mö dɔ'wʋʋ,

nɩkpaa ‑wa bhlinɔɔɔ 'bɩwʋʋ,

‑zu wa ‑zuä tenyii.

'N ɔ yiɛ 'nɩgbö 'n ɔ yuëë 'yi gö,

ɔ lɛ naa:

26 «‑Ɔ ‑kä ɔ ‑kaa ‑gänɩ nʋʋ,

ɛ ‑kä ɔ dɩba,

ɛ ‑kä ɔ ‑da,

ɛ ‑kä ɔ 'lɛnglɛ,

ɛ ‑kä ɔ yuë,

ɛ ‑kä ɔ nyɩbhɛlʋdaayuë,

ɛ ‑kä ɔ nglʋdaayuë,

n ‑nyʋä 'sɔ a dɔ'wʋ,

'mö ɔ ‑kä tenyii ‑wa,

'n ɔ 'nɩ'ɛ ɔnyɩ dlɩ ‑sɛɛ,

‑sɩbhä a nɩkpɛ 'la 'nɩɛ bhɛnɩ ɔ ‑kaa ‑gänɩ.

27 ‑Ɔ 'nɩ 'ɔ 'klʋkʋnɩsuu ‑su,

nzɩɩ ɔ ‑kaa ‑gänɩɩ,

ɔ'ɔɔ bhɛnɩ ɔ 'kä na ‑gänɩnyɔ glɩnɩ.

28 Zaa,

a nɩ 'päni dlɩ kɛ,

‑maa a gla'mö a nɩkpɛ ‑kä ‑budu 'kɔdʋ 'sɩbhää yii,

sɛ ɔ zʋä,

a ‑yi ‑sɩbhä.

Sɛ ɔ glɩɛ 'tɩɩ,

moni ɔ 'kää plɩɩ,

'n ɔ bhëgee,

'saa ɔ kää ‑käa ‑zu a za.

29 ‑Maa 'n 'ɔ monii 'nɩ ‑zuu,

ɔ ‑kä ‑buduu tɛɛ 'wë,

ɔ 'nu zɛmö bhɩɛɛ,

nɩkpa 'wuë ‑wa 'kʋä 'ylɩmöö,

nyɩɛnɩ wa 'kɔɔ nyɩɛnɩ.

Sɛ'ɛ wa 'kää nɩɩ:

30 Nɩkpɛ ‑mɔ nɩ,

ɔ yɛ libho tɛɛ 'wë,

‑maa ɔ'ɔa'a bhɛnɩ ɔ 'kʋ zɛmö bhɩɛ.

31 'N 'bhlɩlowli ‑bhlʋ ‑nyɛ 'bhlɩlowli ‑mɔmɔɔ ‑kä tʋ gwɩɛ yii,

sɛ ɔ glɩɛ 'tɩɩ,

'ɔ tʋgwɩwaa ɔ kää,

wa yi ‑zu a'bhë ‑kë,

'n ɔ 'pänuëë dlɩ kɛ.

‑Mɔ'la ɔ ‑nyɛɛ 'kää 'wʋ gbanɩɩ,

'ɔ tʋgwɩwaa ‑wa ‑zuä ‑wa ziɛ ɔ ‑nʋa 'ki 'sɔ 'mö 'wʋʋ,

ɔ ‑käa bhɛnɩ ɔ ‑nyʋä 'kä gwɩ a wɛlɩɩ,

'mö ɔ 'pänɩɛ dlɩ kɛ.

32 ‑Maa ɔ ‑kä sɛ ‑yi nɩɩ,

ɔ ‑nʋa 'nɩɛ bhɛnɩɩ,

'wluglawa ɔ tiee 'bhlɩlowli ‑mɔ'la 'wʋ.

33 Nza n gbää nɩɩ:

‑Ɔ ‑kä ɔ ‑kaa ‑ganɩ nʋʋ,

sɛ ‑bhʋlʋ ‑kpɔ 'la ‑sɩbhä ɔ nɩ 'pä sasɛ dlɩ.

‑Maa ɔ 'nɩ 'wʋ ngulu ɔ 'kä 'ɔ ‑lii 'wuë kɛ'mö ‑sɛɛ,

ɔ'ɔɔ bhɛnɩ ɔ ‑kaa ‑gänɩ.

Gïbhïï a ninea

(Matie 5.13; Maakö 9.50)

34 Gïbhïï,

‑li a ‑li yɩ glɩnɩɛ.

‑Maa yɩ ‑kä 'lʋngli bhɩɛɛ,

'saa wa 'kɩ bhä 'mö zʋ yɩ 'kä 'sɔ mɛnɩmanɩ 'nɩ?

35 Yɩ ‑kä 'lʋngli bhɩɛɛ,

yɩ'ɩa'a dɛsɛ ‑kä 'lɩlɩlɩ.

Wa'aa wa 'kɩ tilikpëdʋdʋ a'bhë 'mö zʋ,

nzɩɩ wʋ 'kä nɛmanɩ,

wa 'kʋ glʋglʋli yɔwʋ 'zʋ a za.

‑Maa 'kwlɛ 'mö wa pɩɛ cuu.

Sa'a yɩ ‑wʋä.

Zaa,

‑ɔ ‑kä 'nʋnʋyukwïla 'wlu ‑kä,

ɔ nɩ 'nʋa ‑bhlɛ.»