Paulu membiáꞌ i toKorintu bona dóiꞌ rarámpu miꞌi ami hangko tiꞌara maniheꞌ haweꞌ
9
Katoꞌuána,
tiꞌara piꞌi paraluu kuꞌukiꞌákou sura kana i dóiꞌ to ina kiánti lao i halalu hampepepoináláintaꞌ i kótá Ierusale.
2 Kuisá miꞌi niundeꞌ ntepuꞌu motulungiheꞌ,
onoꞌ miꞌi haneꞌi kutóiákou i lindoꞌraꞌ toMakedonia,
kuhángáꞌáheꞌ,
“Ane halaluntaꞌ toKorintu to toroꞌheꞌ i tampoꞌ Akaia,a
mantepuꞌu pare to liu,
timamaheꞌ mopakatu dóiꞌ i halalu hampepepoináláintaꞌ to meahiahiꞌ tueꞌraꞌ.”
Mewaliꞌ,
karahádina peá kamaꞌahiꞌna lalumi,
tediiꞌ miꞌi woꞌo laluraꞌ toMakedonia,
álána handaꞌheꞌ woꞌo to mampeweꞌi petulungiraꞌ.
3 Agáiáná kehapiꞌ noꞌonoꞌ,
kuhuoꞌ maniheꞌ Titu hai rodua rángána moioru lao i kómu,
bona motulungikou morámpu dóiꞌ.
Hai kuhárungá ane haweꞌaꞌ,
upu-upuna iti ina timama miꞌi,
bona laluitangkuꞌ motóiákou tiꞌara rarekeꞌ toMakedonia dongkoꞌkuꞌ peá,
láwiꞌ roomoheꞌ kuhángáꞌá katimamami miꞌi morámpu dóiꞌ.
4 Láwiꞌ ane haweꞌheꞌ toMakedonia to mamporángáꞌaꞌ lao i kómu,
hai ane rápáꞌna tiꞌara mani terámpu dóiꞌ petulungimi,
ina rumihi kamahilingkiꞌ,
láwiꞌ roomokou kitóiá i lindoꞌraꞌ.
Hai kómu woꞌo ina mahilikou.
5 Onoꞌ miꞌi haneꞌi kuꞌuliꞌ i lalungkuꞌ,
rángina miꞌi kuhuoꞌheꞌ Titu hai rodua rángána lao moioru,
bona dóiꞌ to nidándi miꞌi hangkoia timama miꞌi.
Mewaliꞌ,
ane haweꞌaꞌ i bókóꞌ,
ina timama mpuꞌu miꞌi dóiꞌ iti.
Ane noꞌonoꞌi,
ina tongawaꞌ i upu-upu tauna,
dóiꞌ iti nipeweꞌi hangko i kabulána lalumi,
tiꞌara ánti pepasimbuku.
Ane motulungikeꞌ halaluntaꞌ, kitaꞌ molámbiꞌkeꞌ pewátiꞌ, hai Pueꞌ Ala rapomahile
6 Nipailalu pándiriꞌ deꞌe:
apa to tatudaꞌ,
iti woꞌo to tapupu.
Tauna to mantudaꞌ hantóiꞌ peá,
hantóiꞌ woꞌo to ina napupu.
Tauna to mantudaꞌ handaꞌ,
handaꞌ woꞌo to ina napupu.
7 Rángina miꞌi hadua-hadua tauna mampeweꞌi popenómbána hangko i sukáꞌna kabulána laluna.
Ineeꞌkou mampeweꞌi hangko i kamatimina lalumi,
hai ineeꞌkou mampeweꞌi ánti karapasimbukumi,
láwiꞌ Pueꞌ Ala mampokaꞌahiꞌ tauna to mampeweꞌi hangko i kagóeꞌ lalu.b
8 Hai Pueꞌ Ala ina mampoweꞌikou handaꞌ pewátiꞌ duuꞌna tiꞌara piꞌi ara kamakuraꞌmi,
bona nibuku mampopolumao upu-upu bágóꞌ to maroꞌa,
motulungi hángká rángámi.
9 Láwiꞌ ara teukiꞌ i lalu Sura Magasaꞌ to manguliꞌ:
“Ia mogáláꞌ-gáláꞌ pewátiꞌ i tauna to meahiahiꞌ tueꞌraꞌ.
Kamaroꞌana laluNa tiꞌara mokahópóꞌá.” (Sura Petóiá 112:9)
10 Pueꞌ Ala mampoweꞌi tinudaꞌ i topohawuꞌ,
hai hangko i tinudaꞌ iti,
Ia mampoweꞌikeꞌ pandeꞌ.
Noꞌonoꞌ woꞌo,
Pueꞌ Ala ina motámbái apa to ara i kómu,
bona tetámbái woꞌo kamaroꞌana lalumi motulungi tauna.
11 Kómu ina Napoporasiꞌkou i pákáꞌ-pákáꞌna,
bona hangko i kabulána lalumi,
peisákou motulungi tauna ntániꞌna.
Mewaliꞌ,
ane kiánti popenómbámi i halalu hampepepoináláintaꞌ to meahiahiꞌ tueꞌraꞌ,
handaꞌ tauna ina manguliꞌ handaꞌ kamaroꞌana i Pueꞌ Ala.
12 Popenómbámi iti ina mopagánái kamakuraꞌraꞌ tauna to ara i jemaꞌa i Ierusale,
hai tiꞌara iti peá.
Ánti kabulána lalumi,
handaꞌ tauna ina manguliꞌ handaꞌ kamaroꞌana i Pueꞌ Ala.
13 Ane tauna moita popenómbámi to kiánti iti,
ina motóiáheꞌ Pueꞌ Ala láwiꞌ ánti kamaroꞌana lalumi,
ina nipatongawaꞌ kamaróhóna pepoináláimi i Ngkóráꞌ Marasa kana i Kerisitu,
hai ina tongawaꞌ woꞌo pengkoruꞌmi i hawaꞌNa.
Ina motóiáheꞌ Pueꞌ Ala,
láwiꞌ bulá lalumi motulungiheꞌ toSarani i Ierusale hai tauna ntániꞌna.
14 Hai hira ina mampekakaeákou woꞌo hangko i laluraꞌ ntepuꞌu to bukeꞌ ahiꞌ,
láwiꞌ kamahilena ahiꞌna Pueꞌ Ala mokale i lalumi.
15 Tauliꞌ handaꞌ kamaroꞌana i Pueꞌ Ala,
láwiꞌ mahile ntepuꞌu kabulána laluNa i kitaꞌ,
hai iti melumbuꞌ ntepuꞌu hangko i apa to peisá tapekiri!