Surana Paulu to Napakatu i
toSarani i Tampoꞌ
Galatia
Laluita to mopakanótó óntóꞌna sura
Galatia ia miꞌi hambuaꞌ poropensi i kadatuá Roma. Pueꞌ wánuá i tampoꞌ Galatia, tiꞌaraheꞌ toIahudiꞌ. Rungu-runguna menómbáheꞌ i ánitu, agáiáná i kahaweꞌna Paulu, ia mopahaweꞌáheꞌ Ngkóráꞌ Marasa, haneꞌi araheꞌ toGalatia to mepoinálái i Pueꞌ Iesu. (Básá Suro gáláꞌna ka-13 haweꞌ ka-16.)
I kapohuꞌna miꞌi Paulu hangko i tampoꞌ Galatia, haweꞌmoheꞌ woꞌo bahangapa toIahudiꞌ to moánti paturoꞌ to salaꞌ. Guru-guru to mepakanawoꞌ iti, mopahaweꞌáheꞌ katiꞌárána gáná ane mepoinálái peheꞌ i Pueꞌ Iesu, agáiáná hangaa-ngaa ratileꞌheꞌ woꞌo hai mampeuláꞌiheꞌ upu-upu áturá to naukiꞌ Musa bona mewaliꞌheꞌ manótó i peitána Pueꞌ Ala. Hai rauliꞌ woꞌo, Paulu tiꞌara surona Pueꞌ Iesu, láwiꞌ ia tiꞌara tepasuaꞌ surona Pueꞌ Iesu to hampuloꞌ hai rodua.
I lalu sura deꞌe, tongawaꞌ kamasusana laluna Paulu hai kamabukoꞌna moewaꞌ paturoꞌ to mepakanawoꞌ iti. Rungu-runguna, Paulu mampolaluita noumbá kamewaliꞌna surona Pueꞌ Iesu. (Básá gáláꞌna ka-1 haweꞌ ka-2.) Upu onoꞌ, napakanótó ntepuꞌu paturoꞌ mokana i Ngkóráꞌ Marasa to manguliꞌ: kitaꞌ mewaliꞌ manótó i peitána Pueꞌ Ala ánti kanasulewátáintaꞌ Pueꞌ Iesu, hai ánti pepoináláintaꞌ i Hia, tiꞌara hangko i pampeuláꞌintaꞌ áturá ba ádá. (Básá gáláꞌna ka-3 haweꞌ ka-4.) Kahópóꞌána, Paulu mopaturoꞌ toGalatia mokana i bábehiá to hintotoꞌ i toSarani. (Básá gáláꞌna ka-5 haweꞌ ka-6.)
Óntóꞌna
A. Pantepuꞌuána laluita (1:1-10)
1. Tabeá (1:1-5)
2. Tingkáráꞌ Paulu láwiꞌ toGalatia mosuliꞌmoheꞌ hangko i pepoináláiraꞌ (1:6-10)
B. Álásána Paulu rauliꞌ surona Pueꞌ Iesu: (1:11–2:21)
1. Láwiꞌ ia motarima Ngkóráꞌ Marasa hangko i Pueꞌ Iesu (1:11-12)
2. Láwiꞌ ia tiꞌara molámbiꞌ Ngkóráꞌ Marasa iti hangko i toSaraniheꞌ i Ierusale (1:13–2:21)
a. Tongawaꞌ hangko i bábehiána tempóna mepoinálái i Iesu (1:13-17)
b. Tongawaꞌ hangko i bábehiána tempóna lao i Ierusale (1:18-24)
c. Tongawaꞌ hangko i bábehiána tempóna lao i Ierusale i karongkánina (2: 1-10)
d. Tongawaꞌ hangko i bábehiána tempóna mokámbáróá Peturuꞌ (2:11-21)
C. Paturoꞌ: Tekábáhákeꞌ hangko i huku dósántaꞌ ánti pepoináláintaꞌ (3-4)
1. Pándiriꞌ hangko i apa to mewaliꞌ i toGalatia (3:1-5)
2. Pándiriꞌ hangko i apa to mewaliꞌ i Burahima (3:6-9)
3. Kamakuraꞌna áturá-áturá to naukiꞌ Musa (3:10-14)
4. Pelumbuꞌna kamaroꞌana dándina Pueꞌ Ala i Burahima (3:15-18)
5. Tunggáiána Áturána Musa (3:19-25)
6. Kitaꞌ mewaliꞌmokeꞌ ánáꞌna Pueꞌ Ala, tiꞌarapokeꞌ hawiꞌ (3:26–4:11)
7. Napembiáꞌ bona tueꞌkeꞌ nodo tauna to tekábáhá (4:12-20)
8. Pándiriꞌ hangko i Hagari hai Sáráꞌ (4:21-31)
D. Paturoꞌ kana i katueꞌtaꞌ: Noumbá haneꞌi peisákeꞌ tueꞌ nodo tauna to tekábáhá? (5:1–6:10)
1. Paturoꞌ (5:1-12)
2. Mouláꞌkeꞌ Inao to Magasaꞌ, tiꞌara piꞌi peundeꞌántaꞌ haduduántaꞌ (5:13-26)
3. Hangaa-ngaa mombetulungikeꞌ (6:1-10)
E. Paturoꞌ to kahópóꞌána (6:11-18)