2 Korintu i

Surana Paulu to Karongkánina

i toSarani i Kótá

Korintu

Laluita to mopakanótó óntóꞌna sura

Paulu ia miꞌi to rungu-runguna moánti Ngkóráꞌ Marasa i kótá Korintu (básá Suro 18:1-17). Tangaꞌna lao mobágóꞌ i kótá ntániꞌna, araheꞌ toKorintu to mosapuáka Paulu kanapileꞌina Pueꞌ Ala mewaliꞌ surona Pueꞌ Iesu. Mewaliꞌ Paulu mohuoꞌ Titu lao moweoꞌheꞌ. Titu mopahaweꞌáheꞌ laluitana Paulu, hai mokámbáróá tauna i oloꞌraꞌ toKorintu to manguliꞌ Paulu tiꞌara suro. I pesuleꞌna Titu hangko i Korintu, ia mopahaweꞌ i Paulu, kahandaꞌna miꞌi tauna hangko i oloꞌraꞌ jemaꞌa Korintu menosoꞌmoheꞌ hangko i pesapuákaraꞌ. Agáiáná ara maniheꞌ to matuꞌa laluraꞌ to mosapuáka Paulu.

Tempóna mohádi bámbári iti, Paulu ara i tampoꞌ Makedonia (2:13), hai kásáliu moukiꞌ sura deꞌe, rekeꞌ-rekeꞌna pare lima puloꞌna hai lima roo karapoánákana Iesu (55M). Ia mampolaluita pobágóꞌna mopahaweꞌ Ngkóráꞌ Marasa (2:14–6:10), hai napahaweꞌáheꞌ woꞌo kamahilena ahiꞌna i hira (6:11-13; 7:2-4,13-16). Góeꞌ laluna láwiꞌ handaꞌheꞌ to menosoꞌ hangko i pesapuákaraꞌ (7:5-13). Roo onoꞌ, napembiáꞌ bona toKorintu morámpuheꞌ dóiꞌ, bona ane haweꞌi i Korintu, dóiꞌ iti ina naꞌánti lao i kótá Ierusale bona naweꞌiheꞌ toSarani to meahiahiꞌ tueꞌraꞌ (8:1–9:15). Roo onoꞌ, Paulu mokámbáróáheꞌ tauna to mosapuáka mani kuasaꞌna mewaliꞌ suro (10:1–13:10).

Óntóꞌna

1. Tabeá (1:1-11)

2. Paulu mopakanótó apa ntóáꞌna haneꞌi tebáliki tunggáiána lao moweoꞌ toKorintu (1:12–2:13)

3. Paulu mampolaluita pobágóꞌna moánti Ngkóráꞌ Marasa (2:14–6:10)

4. Paulu mopahaweꞌ bahangapa pákáꞌna paturoꞌ i hira (6:11–7:16)

5. Paulu membiáꞌ bona toKorintu morámpuheꞌ dóiꞌ to peisá rapakatu i toSarani to ara i kótá Ierusale to meahiahiꞌ tueꞌraꞌ (8:1–9:15)

6. Paulu mokámbáróá toKorintu láwiꞌ ara mani to mosapuáka kuasaꞌna mewaliꞌ suro (10:1–13:10)

7. Laluita to kahópóꞌána (13:11-13)