Surana Paulu to Karongkánina
i toSarani i Kótá
Korintu
1
Molámbiꞌ Jemaꞌai kótá Korintu
1 Sura deꞌe hangko i kódóꞌ Paulu,
to napileꞌi Pueꞌ Ala mewaliꞌ surona Kerisitu Iesu mouláꞌ peundeꞌáNa,
hai hangko i Timotiu halaluntaꞌ,
kipakatu i kómu halalu hampepepoináláingkiꞌ to ara i kótá Korintu.
Kipakatu woꞌo sura deꞌe i upu-upu toSarani to ara i tampoꞌ Akaia.a
2 Kipakatu tabeángkiꞌ haweꞌ i kómu.
Kipembiáꞌ bona Pueꞌ Ala Umántaꞌ hai Pueꞌ Iesu Kerisitu mampoweꞌikou pewátiꞌ hai roꞌa ngkatueꞌ.
Pueꞌ Ala mopakaróhó laluntaꞌ i lalu kapári
3-4 Tatóiá miꞌi Pueꞌ Ala Umána Iesu Kerisitu Pueꞌtaꞌ,
láwiꞌ Ia miꞌi Umántaꞌ to mahile ahiꞌNa,
hai Ia woꞌo to mopakaróhó laluntaꞌ i pákáꞌ-pákáꞌna kapári to morampe katueꞌtaꞌ.
Nabábehi noꞌonoꞌ bona karóhó to kitarima hangko i Hia,
kipakeꞌ woꞌo mopakaróhó laluraꞌ tauna ntániꞌna to molámbiꞌ woꞌo kapári.
5 Handaꞌ kapári to nalámbiꞌ Kerisitu,
hai kapári iti kilámbiꞌ woꞌo.b
Noꞌonoꞌ woꞌo kahandaꞌna karóhó lalu to kilámbiꞌ hangko i Kerisitu.
6 Ane narampeangkaiꞌ kapári,
kapári iti kitódihá bona kipakaróhó lalumi hai bona nilámbiꞌ katehómpóꞌ.
Hai kómu,
narampekou woꞌo kapári nodo to kilámbiꞌ.
Mewaliꞌ,
ane Pueꞌ Ala mopakaróhó lalungkiꞌ i lalu kapári,
róhó iti kipakeꞌ woꞌo mopakaróhó lalumi,
bona sabaraꞌkou hai mantahakou.
7 Onoꞌ miꞌi haneꞌi tiꞌara bata-bata lalungkiꞌ.
Kiꞌisá kaꞌina mantahami i lalu kapári.
Kiꞌisá kapári to nilámbiꞌ hibali hai kapári to kilámbiꞌ,
hai bateꞌna Pueꞌ Ala ina mopakaróhó lalumi hibali hai kaiꞌ.
8 Halalu-halalu,
kiundeꞌ bona niꞌisá karumihina kapári to morampeangkaiꞌ hangkoia i poropensi Asia,c
hai kapári iti melumbuꞌ hangko i pebukuángkiꞌ.
Mapári ntepuꞌu lalungkiꞌ.
Pehádingkiꞌ nodoangkaiꞌ to ina mate.
9 Pehádingkiꞌ nodoangkaiꞌ to rabutusi ina rahuku mate.
Agáiáná kapári iti hangaa-ngaa mewaliꞌ bona tiꞌaraꞌangkaiꞌ mehárungá i róhóngkiꞌ haduduángkiꞌ,
ngkáliꞌna riꞌi bona mehárungá peangkaiꞌ i Pueꞌ Ala,
láwiꞌ Ia miꞌi to makuasaꞌ mopatueꞌ huleꞌ tauna to mate.
10 Kehapiꞌangkaiꞌ hurewuꞌ,
Pueꞌ Ala mokábáhá mpuꞌumongkaiꞌ hangko i kapári to rumihi iti,
haneꞌi tiꞌaraꞌangkaiꞌ mate.
Hai kiꞌisá Pueꞌ Ala ina mokábáháꞌangkaiꞌ hangko i hinángkáꞌna kapári,
maroꞌa to morampeangkaiꞌ deꞌe-deꞌe ba i alo to ina haweꞌ.
11 Hai kómu woꞌo,
hangaa-ngaa nipekakaeáꞌangkaiꞌ,
láwiꞌ ánti pekakaena handaꞌ tauna,
Pueꞌ Ala ina motulungiangkaiꞌ,
álána handaꞌ tauna ina manguliꞌ handaꞌ kamaroꞌana i Hia.
Paulu mopakanótó apa ntóáꞌna haneꞌi tebáliki tunggáiána lao moweoꞌheꞌ
12 Halalu-halalu,
góeꞌ lalungkiꞌ láwiꞌ kiꞌisá bulá lalungkiꞌ.
Iti tongawaꞌ,
i upu-upu bábehiángkiꞌ tiꞌara ara kamasalaꞌkiꞌ,
pelumbuꞌna miꞌi i kómu.
I hinángkáꞌna to kibábehi,
tiꞌara ara to kiwuniángi;
tunggáiángkiꞌ manótó i peitána Pueꞌ Ala.
Apa to kibábehi,
kibábehi hangko i kamaroꞌana to kilámbiꞌ hangko i Pueꞌ Ala,
tiꞌara hangko i kapánde tauna.
13-14 Apa to kiukiꞌ i lalu surangkiꞌ,
tongawaꞌ lempóna,
tiꞌara ara to kiwuniángi.
Kehapiꞌ tiꞌara manikou moisá ntepuꞌu tunggáiángkiꞌ,
kuhárungá kahópóꞌána ina niꞌisá upu-upuna,
hai i kahaweꞌna huleꞌ Pueꞌtaꞌ Pueꞌ Iesu,
ina góeꞌ lalumi ánti kakaiꞌna,
hai kaiꞌ woꞌo ina góeꞌ lalungkiꞌ ánti kakómuna.
15 Mewaliꞌ,
ánti kakuisána upu-upuna iti,d
onoꞌ miꞌi haneꞌi ara tunggáiángkuꞌ ina lao moweoꞌkou karongkánina,
bona rongkanikou molámbiꞌ pewátiꞌ.
16 Mouláꞌ poliwongkuꞌ to rungu-runguna iti,
ina kuweoꞌkou i tempóngkuꞌ lao i tampoꞌ Makedonia,
hai ane mesuleꞌaꞌ hangko i tampoꞌ Makedonia,
ina mehupeꞌ wopaꞌaꞌ i kómu,
bona nitulungiaꞌ i polumaongkuꞌ lao i tampoꞌ Iudá.e
17 Agáiáná tunggáiángkuꞌ iti tebáliki.
Ba niuliꞌ riꞌi tiꞌaraꞌaꞌ tetidaꞌ i dándingkuꞌ?
Ba niuliꞌ riꞌi mouláꞌ peaꞌ peundeꞌángkuꞌ haduduángkuꞌ nodo tauna i duniáꞌ,
haneꞌi kuꞌuliꞌ “Ió,”
haneꞌi woꞌo kuꞌuliꞌ “Tiꞌara”?
18 Halalu-halalu,
tiꞌara noꞌonoꞌ!
Nodo Pueꞌ Ala mobukeki upu-upu dándiNa i kitaꞌ,
noꞌonoꞌ woꞌo laluitangkiꞌ i kómu.
Peisáꞌangkaiꞌ rapoinálái.
Tiꞌara kiuliꞌ “Ió” i kómu ane tunggáiángkiꞌ “Tiꞌara”.
19 Láwiꞌ kódóꞌ,
Silasif hai Timotiu,
mopahaweꞌangkaiꞌ bámbári i kómu mokana i Iesu Kerisitu,
Ánáꞌna Pueꞌ Ala.
Hai Iesu Kerisitu iti,
tiꞌara ara katebálikiána tunggáiáNa i kitaꞌ.
Tiꞌara hangkani Nauliꞌ “Ió” ane tunggáiáNa “Tiꞌara”.
Manótó ntepuꞌu tiꞌara ara katebálikiána tunggáiáNa i kitaꞌ.
20 Handaꞌ dándina Pueꞌ Ala i kitaꞌ,
hai moliu Iesu,
Ia mobukeki upu-upu dándiNa iti.
Ánti kaꞌIesuna,
peisákeꞌ motóiá Pueꞌ Ala hai manguliꞌ,
“Ami!”
21 Pueꞌ Ala haduduáNa to mopakaróhó lalungkiꞌ hai lalumi woꞌo,
bona kitaꞌ upu-upu mohintuwuꞌ hai Kerisitu.
Ia to mopileꞌikeꞌ mewaliꞌ taunáNa,
22 hai mampoweꞌikeꞌ Inao to Magasaꞌ to mopakanótó kakitaꞌna taunáNa.
Inao to Magasaꞌ iti miꞌi to mewaliꞌ petándáina Pueꞌ Ala i laluntaꞌ,
láwiꞌ Ia mopakaróhó dándina Pueꞌ Ala i kitaꞌ,
bona manótó i kitaꞌ {i alo pobutusi},
ina Naweꞌikeꞌ upu-upuna to Nadándiákeꞌ.g
23 Halalu-halalu,
tiꞌaraꞌaꞌ modongkoꞌ,
Pueꞌ Ala sabiꞌkuꞌ.
Ia to moisá lalungkuꞌ.
Tiꞌaraꞌaꞌ lao i kómu i Korintu hangkoia láwiꞌ tiꞌara kuꞌundeꞌ mokámbáróákou hai laluita to mahárá.
24 Tiꞌara kiundeꞌ kipárentákou oaꞌ,
láwiꞌ kiꞌisá maróhó pepoináláimi i Kerisitu.
Kiundeꞌ mobágóꞌ hingkakani hai kómu bona mantámbái kagóeꞌna lalumi.