Surana Paulu to Rungu-runguna
i toSarani i Kótá
Korintu
Laluita to mopakanótó óntóꞌna sura
Korintu ia miꞌi kótá to mahile i tampoꞌ Akaia.a Hangkoia, tauna to toroꞌ i kótá Korintu, kahandaꞌáraꞌ tiꞌara maniheꞌ moisá Pueꞌ Iesu. Paulu to rungu-runguna moánti Ngkóráꞌ Marasa i Korintu, rekeꞌ-rekeꞌna pare lima puloꞌna hai lima roo karapoánákana Iesu (55M), hai ia toroꞌ ionoꞌ hampare hantangaꞌ (básá Suro 18:1-11). I kapohuꞌna Paulu hangko i kótá Korintu lao moánti Ngkóráꞌ Marasa i kótá ntániꞌna, napaháwángi Apolo, hadua tadulako toSarani to mapánde mepaturoꞌ (básá Suro 18:24–19:1). Apolo iti mopaliliu bágóꞌna Paulu mopaguru hai mokádipurá toSarani i kótá Korintu (básá 1 Korintu 3:6).
Tiꞌara marue hangko ionoꞌ, toSarani i Korintu moukiꞌ sura, rapakatu i Paulu. I lalu suraraꞌ, handaꞌ pekuneꞌraꞌ. Onoꞌ miꞌi haneꞌi i lalu sura deꞌe, Paulu mohániki pekuneꞌraꞌ iti (7:1,25; 8:1; 12:1; 16:1,12). Ara woꞌo bámbári to nahádi Paulu to manguliꞌ katiꞌárána maroꞌa bábehiáraꞌ toSarani i Korintu (1:10-11; 5:1; 11:18; 15:12), onoꞌ miꞌi haneꞌi Paulu mokámbáróáheꞌ bona tiꞌaraheꞌ mombeheheꞌ hai mobábehi salaꞌ (gáláꞌna ka-1 haweꞌ ka-6). Handaꞌ mani paturoꞌna Paulu, hai ia woꞌo mopakanótóákeꞌ apa to taparaluu ntepuꞌu, ia miꞌi, hangaa-ngaa mombepokaꞌahiꞌkeꞌ (gáláꞌna ka-13).
Óntóꞌna
1. Tabeá: Paulu manguliꞌ handaꞌ kamaroꞌana i Pueꞌ Ala (1:1-9)
2. Paulu mokámbáróáheꞌ toKorintu (1:10–6:20)
a. Tiꞌaraheꞌ mohintuwuꞌ, hai araheꞌ to mosapuáka kuasaꞌna Paulu mewaliꞌ suro (1:10–4:21)
b. Ara hadua tobaleilo to mobuálósi umána (5:1-13)
c. Araheꞌ to mobuáꞌ halalu hampepepoináláiraꞌ i topopárentá (6:1-11)
d. Araheꞌ to mobábehi bábehiá to metitidiꞌi (6:12-20)
3. Paulu mepaturoꞌ kana i ádá pohamboko (7:1-40)
4. Paulu mepaturoꞌ kana i pandeꞌ to rapopenómbá i ánitu (8:1–11:1)
5. Paulu mepaturoꞌ kana i ádá petótóku i pamingguá (11:2-16)
6. Paulu mepaturoꞌ kana i ádá mandeꞌ rótiꞌ hai mainu anggoroꞌ i pambuhinaoraꞌ kamatena Pueꞌ Iesu (11:17-34)
7. Paulu mepaturoꞌ kana i kapánde to hangko i Inao to Magasaꞌ (12:1–14:40)
8. Paulu mepaturoꞌ kana i katueꞌraꞌ huleꞌ toSarani to mate (15:1-58)
9. Paulu mampolaluita kana i dóiꞌ to rarámpu bona rapakatuáheꞌ toSarani i kótá Ierusale to meahiahiꞌ tueꞌraꞌ (16:1-4)
10. Pembiáꞌna to kaupuána hai tabeá (16:5-24)