Paulu mokámbáróáheꞌ tauna to mosapuáka kuasaꞌna mewaliꞌ suro
10
Halalu-halalu,
kódóꞌ deꞌe Paulu,
ara to ina kupahaweꞌ i kómu.
Araheꞌ tauna i oloꞌmi to manguliꞌ,
“Ane Paulu karaoꞌ hangko i kaiꞌ,
laluitana mahárá i lalu surana,
agáiáná ane mombelindoꞌkeꞌ,
maꞌálusuꞌ ntepuꞌu.”
Mewaliꞌ,
hangko i lalungkuꞌ to mengkaiwóiꞌ hai maꞌálusuꞌ,
nodo laluna Kerisitu,
2 kupembiáꞌ halalu-halalu,
bona ane haweꞌaꞌ i kómu,
tiꞌara paraluu kupatongawaꞌ i kómu kamakasaraꞌkuꞌ.
Láwiꞌ ara mani i oloꞌmi to manguliꞌ bábehiángkiꞌ nodo bábehiána tauna to tiꞌara moisá Pueꞌ Ala hai tiꞌara hintotoꞌ i suro.
3-4 Kaiꞌ,
tauna biásá peangkaiꞌ.
Agáiáná ane moewaꞌangkaiꞌ tauna {to mosapuáka paturoꞌkiꞌ},
kiewaꞌheꞌ hai kuasaꞌ to hangko i Pueꞌ Ala,
tiꞌara hangko i kamapándengkiꞌ peá nodo tauna to tiꞌara moisá Pueꞌ Ala.
Kaiꞌ peisá rapándiriꞌ nodo surudadoꞌ to mogero benteraꞌ ewálingkiꞌ.a
Lempóna,
ánti kuasaꞌ to hangko i Pueꞌ Ala,
kiewaꞌ pekiri to hangko i tauna peá,
5 kinangiheꞌ tauna to moewaꞌ paturoꞌ to toꞌu,
to mampepemahile hai to mosalempori ráráraꞌ tauna to mampoinao moisá Pueꞌ Ala.
Ánti kuasaꞌ to kilámbiꞌ hangko i Pueꞌ Ala,
kibáliki pekiriraꞌ tauna iti,
bona mengkoruꞌheꞌ i Kerisitu.b
6 Mewaliꞌ,
ane maroꞌa pengkoruꞌmi i kaiꞌ,
ina kihukuheꞌ tauna to mosapuáka maniangkaiꞌ.
7 Nipekiri maroꞌa!
Ane arai i oloꞌmi to manguliꞌ kakómuna mpuꞌu taunána Kerisitu,
hangaa-ngaa nipangákuꞌ woꞌo kakaiꞌna taunáNa.
8 Ba niuliꞌ mampepemahileaꞌ?
Tiꞌara,
láwiꞌ tiꞌara kuꞌundeꞌ mampepemahile.
Agáiáná tiꞌaraꞌaꞌ mahili mopakanótó kuasaꞌkuꞌ to naweꞌiaꞌ Pueꞌ.
Tiꞌaraꞌaꞌ Naweꞌi kuasaꞌ mopakanawoꞌ pepoináláimi,
ngkáliꞌna mopakaróhóraꞌaꞌ pepoináláimi.
9 Tiꞌara kuꞌundeꞌ ane nipekiri kutunggáiákou kupopalááꞌ moliu surangkuꞌ to mahárá.c
10 Kuꞌuliꞌ noꞌonoꞌ,
láwiꞌ araheꞌ tauna i oloꞌmi to mosasalaꞌiaꞌ,
rauliꞌ,
“Ane tabásá surana,
makuasaꞌ hai kaladu pepaturoꞌna,
agáiáná ane arai ieneꞌ hingkakani hai kitaꞌ,
ia nodo tauna to maledeꞌ hai laluitana tiꞌara mobunduꞌ!”
11 Mewaliꞌ,
hangaa-ngaa nipakanótóáheꞌ tauna iti:
nodo kamahárána laluitangkiꞌ i lalu surangkiꞌ,
noꞌonoꞌ woꞌo kaꞌina makasaraꞌkiꞌ i kahaweꞌkiꞌ!
Paulu mopakanótó kuasaꞌna mopaturoꞌheꞌ
12 Tiꞌaraꞌangkaiꞌ pebáiꞌ mampeuláꞌi bábehiáraꞌ bahangapa tauna i oloꞌmi to mampepemahile.
Tiꞌaraꞌangkaiꞌ hibali hai hira.
Tauna iti,
motóiáheꞌ wátáraꞌ haduduáraꞌ.
Rauliꞌ maroꞌa ntepuꞌu bábehiáraꞌ,
mole bebe ntepuꞌuheꞌ láwiꞌ mouláꞌ peheꞌ pekiriraꞌ haduduáraꞌ,
{tiꞌaraheꞌ moisá kamakuraꞌraꞌ}.
13 Kaiꞌ tiꞌaraꞌangkaiꞌ noꞌonoꞌ.
Ane motóiáꞌangkaiꞌ wátángkiꞌ haduduángkiꞌ,
tiꞌara kipopelumbuꞌ hangko i apa to hintotoꞌ.
Ane kitóiá wátángkiꞌ haduduángkiꞌ,
kipolaluita peá bágóꞌkiꞌ to napakanótóangkaiꞌ Pueꞌ Ala.
Hai bágóꞌkiꞌ iti haweꞌ woꞌo i kómu halalu-halalu,
{láwiꞌ Pueꞌ Ala mohuoꞌangkaiꞌ moánti Ngkóráꞌ Marasa haweꞌ i kómu}.
14 Mewaliꞌ,
i tempóngkiꞌ mopatongawaꞌ kuasaꞌkiꞌ i kómu,
tiꞌaraꞌangkaiꞌ moliungi apa to hintotoꞌ.
Ane ketiꞌaraꞌangkaiꞌ haweꞌ i kómu moánti Ngkóráꞌ Marasa,
ketiꞌara woꞌo ara kuasaꞌkiꞌ mopaturoꞌkou.
Agáiáná ara mpuꞌu kuasaꞌkiꞌ mopaturoꞌkou,
láwiꞌ kaiꞌ to rungu-runguna moánti Ngkóráꞌ Marasa i kómu.
15 Ane kaiꞌ,
tiꞌaraꞌangkaiꞌ nodo tauna ntániꞌna.
Tiꞌara kipolaluita wuaꞌna pobágóꞌkiꞌ to i rawa hangko i bágóꞌ to naweꞌiangkaiꞌ Pueꞌ Ala.
Agáiáná kihárungá halalu-halalu,
ane tetámbái kamaróhóna pepoináláimi,
ina tetámbái woꞌo wuaꞌna pobágóꞌkiꞌ i oloꞌmi,
16 duuꞌna kamaeláꞌ-eláꞌá pobágóꞌángkiꞌ,
láwiꞌ kipoinao moánti Ngkóráꞌ Marasa i katoroꞌá to karaoꞌ mani hangko i kómu.
Tiꞌara kiundeꞌ moánti Ngkóráꞌ Marasa i tauna to mohádimoheꞌ bámbári to maroꞌa iti,
bona tiꞌaraꞌangkaiꞌ mampepemahile ánti wuaꞌna pobágóꞌkiꞌ to katoꞌuána rapobágóꞌ tauna ntániꞌna i kaꞌaraꞌána pobágóꞌraꞌ.
17 Ara to teukiꞌ i lalu Sura Magasaꞌ node:
“Heáná to ina mampolaluita apa ntóáꞌna kagóeꞌna laluna
hangaa-ngaa mampolaluita kagóeꞌna iti ánti kamaroꞌana Pueꞌ i hia.” (Ieremia 9:24)
18 Tauna to rauliꞌ ratóiá,
ia miꞌi tauna to natóiá Pueꞌ,
tiꞌara tauna to motóiá wátána haduduána.