Peturuꞌ hai Iohane mopakauriꞌ hadua topaluꞌ
3
Hangkani tempó,
tintiꞌ tálu miꞌi kalumbaꞌ,
Peturuꞌ hai Iohane laoheꞌ i tangabaa Támbina Pueꞌ Ala i tempóna pekakaeáraꞌ toIahudiꞌ.
2 I babaꞌá to rahangaꞌ Babaꞌá Meawaꞌ,a
ara hadua tobaleilo to paluꞌ mantepuꞌu i karapoánákaꞌána.
Alo-alona tauna iti raꞌánti woia lao mehoda i babaꞌá iti bona membiáꞌ ahiꞌ i tauna to mesuaꞌ i Támbina Pueꞌ Ala.
3 Kanaitána Peturuꞌ hai Iohane ina mesuaꞌ,
liu-liu membiáꞌ ahiꞌ i hira.
4 Ratótói topaluꞌ iti,
haneꞌi nauliꞌ Peturuꞌ i hia,
“Tótóiangkaiꞌ mai!”
5 Topaluꞌ iti motótói mpuꞌuheꞌ,
láwiꞌ nahárungá ba ina molámbiꞌ dóiꞌ.
6 Agáiáná nauliꞌ Peturuꞌ,
“Buláwá ba peráꞌ tiꞌara ara i kódóꞌ,
agáiáná apa to ara i kódóꞌ,
iti to ina kuweꞌikoꞌ:
i lalu hangaꞌna Iesu Kerisitu toNasare,
molumaomokoꞌ!”
7 Haneꞌi natibaaꞌ tae kuánána topaluꞌ iti hai napopeángkáꞌ.
Kásáliu maróhó bitina hai kátipáhuna.
8 Ia mesendeꞌ meángkáꞌ,
haneꞌi molumao ngkálu soꞌu ngkálu mai.
Hangko ionoꞌ,
meuláꞌ miꞌi i Peturuꞌ hai Iohane mesuaꞌ hingkakani i lalu tangabaa Támbina Pueꞌ Ala,
ia molumao hai mentimboꞌ-ntimboꞌ motóiá Pueꞌ Ala.
9 Handaꞌ tauna to moita topaluꞌ iti molumao hai motóiá Pueꞌ Ala.
10 Tingkáráꞌ ntepuꞌuheꞌ hai mokamaleáheꞌ apa to pewaliꞌ iti,
láwiꞌ raisá ia topaluꞌ to alo-alona membiáꞌ-mbiáꞌ peá i Babaꞌá Meawaꞌ to ara i Támbina Pueꞌ Ala.
Tuntuna Peturuꞌ i Támbina Pueꞌ Ala
11 Mewaliꞌ,
topaluꞌ to hangko rapakauriꞌ iti meuláꞌ oaꞌ i Peturuꞌ hai Iohane.
Kahaweꞌraꞌ i tambaleꞌ Támbina Pueꞌ Ala to rahangaꞌ Tambaleꞌ Salomo,
handaꞌ tauna to lao mogagu,
láwiꞌ tingkáráꞌheꞌ.
12 Kanaitána Peturuꞌ tauna to handaꞌ iti,
nahángáꞌáheꞌ,
“Halalungkuꞌ toSáráeliꞌ!
Moapa riꞌi haneꞌi nipotingkáráꞌ apa to niꞌita deꞌe?
Moapa riꞌi haneꞌi nitótóiangkaiꞌ oaꞌ?
Ba niuliꞌ ripaꞌi,
tauna deꞌe molumao ánti kuasaꞌkiꞌ,
ba hangko i kamagasaꞌna lalungkiꞌ?
Tiꞌara!
13 Pueꞌ Ala to rapenómbái toioruntaꞌ,
to rapenómbái Burahima,
Isakiꞌ hai Iako,
Pueꞌ Ala iti,
Ia to mampomahile HuoꞌáNa,b
Ia miꞌi Iesu.c
Halalu-halalu,
Iesu iti to nihuhuꞌ i topopárentá Roma,
hai to nisapuáka miꞌi i lindoꞌna Mágáuꞌ Pilatu i tempóna ina nakábáhá.
14 Ia to Magasaꞌ hai Manótó LaluNa,d
agáiáná nisapuáka riꞌi,
hai nipembiáꞌ i Pilatu bona nakábáháꞌákou hadua topepapate.e
15 Iesu iti pentóáꞌána katueꞌ to tiꞌara mokahópóꞌá.
Kehapiꞌ noꞌonoꞌ,
nipapate miꞌi,
agáiáná Pueꞌ Ala mopatueꞌ huleꞌ.
Kaiꞌ miꞌi deꞌe mewaliꞌangkaiꞌ sabiꞌNa to moita katueꞌna huleꞌ Iesu.
16 Kuasaꞌna Iesu to mopakaróhó bitina topaluꞌ deꞌe.
Mewaliꞌ apa to niꞌita hai nisabiki deꞌe,
iti mewaliꞌ ánti pepoináláingkiꞌ i Iesu.
Onoꞌ miꞌi haneꞌi tauna deꞌe Napakauriꞌ.
17 Halalu-halalu,
kómu miꞌi hai tadulakomi to mopapate Iesu.
Agáiáná kuisá,
apa to nibábehi iti,
nibábehi ánti katiꞌárána niꞌisá kaꞌIesuna miꞌi to mewaliꞌ Datu Topehómpóꞌ.
18 Agáiáná kehapiꞌ noꞌonoꞌ,
apa to nibábehi iti,
mobukeki apa to napahaweꞌ miꞌi Pueꞌ Ala hangkoia moliu upu-upu nábiꞌNa to manguliꞌ:
Datu Topehómpóꞌ hangaa-ngaa molámbiꞌ kapári.f
19 Halalu-halalu,
onoꞌ miꞌi haneꞌi hangaa-ngaa menosoꞌmokou hangko i dósámi hai mengkoruꞌkou i Pueꞌ Ala,
bona Naꞌámpungi dósámi.
20 Ane noꞌonoꞌ nibábehi,
Pueꞌ Ala ina mopakaróhó lalumi,
hai ina mohuoꞌ Iesu mai i kómu,
láwiꞌ Ia miꞌi to napakanótó Pueꞌ Ala mewaliꞌ Datu Topehómpóꞌ.
21 Deꞌe-deꞌe,
Iesu toroꞌ i surugáꞌ,
hai bateꞌna ina ara oaꞌ ionoꞌ duuꞌna haweꞌ tempóna Pueꞌ Ala mopawoꞌu upu-upuna,g
nodo to rapahaweꞌ hangkoia moliu nábiꞌ-nábiꞌNa to magasaꞌ.
22 Rápáꞌna,
ara laluitana nabiꞌ Musa hangkoia mokana i Pueꞌ Iesu to manguliꞌ node:
‘Pueꞌ Ala ina mopileꞌi hadua hangko i halalumi
bona mewaliꞌ nabiꞌ nodo kódóꞌ deꞌe.h
Hangaa-ngaa nipeuláꞌi apa to nahángáꞌákou nabiꞌ iti.
23 Heáná peá to tiꞌara mampeuláꞌi apa to nauliꞌ nabiꞌ iti,
ia ina raꞌala hangko i oloꞌna taunána Pueꞌ Ala,
hai bateꞌna ina rahuku haweꞌ i rue-ruena.’ ” (Pohuleki 18:15,18,19)
24 Napaliliu Peturuꞌ laluitana nauliꞌ,
“Nabiꞌ-nabiꞌ to mopahaweꞌ laluitana Pueꞌ Ala,
mantepuꞌu hangko i nabiꞌ Semueli hai nabiꞌ-nabiꞌ ntániꞌna to peusungi i Semueli,
upu-upuheꞌ mampolaluita kana i apa to mewaliꞌ i tempó deꞌe.i
25 Kómu miꞌi halalu-halalu,
to molámbiꞌ apa to nadándi Pueꞌ Ala hangkoia to rapahaweꞌ nabiꞌ-nabiꞌ iti.
Kómu miꞌi woꞌo to molámbiꞌ pewátiꞌ hangko i dándina Pueꞌ Ala i toioruntaꞌ hangkoia,
láwiꞌ hangkoia Pueꞌ Ala mongkóráꞌ i Burahima node:
‘Hangko i pemuleꞌámu,
upu-upu tauna i duniáꞌ ina molámbiꞌheꞌ pewátiꞌ.’ ”j (Pewaliꞌána 22:18; 26:4)
26 Peturuꞌ mopahópóꞌ laluitana nauliꞌ,
“I tempóna Pueꞌ Ala mohuoꞌ Iesu mai i duniáꞌ,
rungu-runguna Ia mohuoꞌ Iesu mai i kitaꞌ toIahudiꞌ,
bona Nawátiꞌkeꞌ hai Nateteꞌkeꞌ mampenosoꞌi upu-upu bábehiántaꞌ to kadake.”