Pueꞌ Ala mampehukáꞌ pepoináláina Burahima
22
Marue hangko ionoꞌ,
Pueꞌ Ala mokióꞌ Burahima bona Napehukáꞌ pepoináláina,
Nauliꞌ,
“Burahima.”
Mehániꞌ Burahima,
“Deꞌentoaꞌ,
Pueꞌ.”
2 Nauliꞌ wopiꞌi Pueꞌ Ala,
“Laomokoꞌ i tampoꞌ Moria,
hai nuánti Isakiꞌ,
ánáꞌmu to haduduána to nupokaꞌahiꞌ ntepuꞌu.
Ionoꞌ ara hambuaꞌ buluꞌ to ina Kutudeꞌákoꞌ.a
Nusambale ánáꞌmu iti hai nuintu mewaliꞌ popenómbámu i Kódóꞌ.”
3 Kahalona mepulo-pulo,
mearó miꞌi Burahima haneꞌi molámpiꞌi kalidena.
Roo onoꞌ,
mobeho kau popeintu popenómbá,
natomboꞌ hai napateke i kalidena.
Timama miꞌi upu-upuna,
pohuꞌmoheꞌ hingkakani hai Isakiꞌ hai rodua hawiꞌna,
laoheꞌ i katoroꞌá to ina natudeꞌá Pueꞌ Ala.
4 Tálu miꞌi aloraꞌ molumao,
naita miꞌi ngkaraoꞌ buluꞌ iti.
5 Mewaliꞌ nahángáꞌáheꞌ hawiꞌna to rodua,
“Ieneꞌmokou mepegiá hingkakani hai kalidentaꞌ.
Kaiꞌ ntaliánáꞌ ina laoangkaiꞌ indoreá menómbá i Pueꞌ Ala.
Roo onoꞌ,
ina mesuleꞌangkaiꞌ mai huleꞌ.”
6 Roo onoꞌ,
Burahima moángkáꞌ kau popeintu popenómbá nahumpádá i wángána Isakiꞌ,
hai ia to moánti ladiꞌ hai api.
Tangaꞌraꞌ molumao,
7 nauliꞌ Isakiꞌ i umána,
“Umaꞌ!”
Mehániꞌ Burahima,
“Apa riꞌi,
ánáꞌkuꞌ?”
Mekuneꞌ Isakiꞌ,
“Ara miꞌi api hai kau,
agáiáná iumbá miꞌi ánáꞌ dimbá to ina tapopenómbá?”
8 Mehániꞌ Burahima,
“Pueꞌ Ala to ina mopaꞌara ánáꞌ dimbá iti,”
haneꞌi rapaliliu polumaoraꞌ.
9 Kahaweꞌraꞌ i katoroꞌá to napakanótó Pueꞌ Ala i Burahima,
naꞌaró miꞌi Burahima hambuaꞌ paintuá popenómbá,
naparampiꞌ kau i wongkona,
hai ia motimpuku ánáꞌna,
haneꞌi nawoli i wongko kau iti.
10 Roo onoꞌ,
ia moala ladiꞌna ina napoposambale ánáꞌna.
11 Agáiáná malaꞌekana PUEꞌ mekióꞌ hangko i langiꞌ,
nauliꞌ,
“Burahima,
Burahima!”
Mehániꞌ Burahima,
“Deꞌentoaꞌ,
Pueꞌ.”
12 Nauliꞌ malaꞌekana PUEꞌ,
“Ineeꞌ nupopoapa ánáꞌmu iti.
Kuisá miꞌi deꞌe-deꞌe noumbá kamaróhóna pengkoruꞌmu i Kódóꞌ,
láwiꞌ tiꞌara mpuꞌu nupekabohiꞌ ánáꞌmu to haduduána,
nupeweꞌi i Kódóꞌ.”
13 Roo onoꞌ,
mehaileꞌ miꞌi Burahima hai moita hambaꞌa dimbá laki to tekaika tánduꞌna i wáláá.
Naꞌala dimbá iti,
nasambale,
haneꞌi naintu napopenómbá i Pueꞌ Ala,
onoꞌ miꞌi paháwángina ánáꞌna.b
14 Onoꞌ miꞌi haneꞌi katoroꞌá iti nahangaꞌ Burahima,
“PUEꞌ Mopaꞌara Apa to Paraluu.”c
Mewaliꞌ haweꞌ deꞌe-deꞌe,
paka rauliꞌ tauna,
“I wongko buluꞌna PUEꞌ,
Ia ina mopaꞌara apa to raparaluu.”d
15 Hangkani mani malaꞌeka iti molaluita i Burahima hangko i langiꞌ,
16 nauliꞌ,
“Node laluitana PUEꞌ:
‘Kutotowi miꞌi i lalu hangaꞌKuꞌ haduduáNgkuꞌ.
Ánti kanupeuláꞌina hawaꞌKuꞌ hai katiꞌárána nupekabohiꞌ ánáꞌmu to haduduána,
17 ina Kuwátiꞌ mpuꞌukoꞌ bona maroꞌa katueꞌmu hai ina Kupahandaꞌ pemuleꞌámu nodo kahandaꞌna betue i langiꞌ hai nodo wungi i wiwi tahiꞌ.e
Pemuleꞌámu iti ina monangiheꞌ ewáliraꞌ hai mokatoroꞌiheꞌ kótáraꞌ.
18 Hangko i pemuleꞌámu,
upu-upu tauna i duniáꞌ ina molámbiꞌheꞌ pewátiꞌ.f
Upu-upu iti ina Kubukeki,
láwiꞌ nupeuláꞌi ntepuꞌu miꞌi hawaꞌKuꞌ.’ ”
19 Roo onoꞌ,
Burahima hai Isakiꞌ mesuleꞌmoheꞌ lao i hawiꞌraꞌ to rodua,
haneꞌi mesuleꞌheꞌ hingkakani lao i wánuá Baraseba hai toroꞌheꞌ ionoꞌ.
Pemuleꞌánaheꞌ Nahori
20 Tangaꞌna Burahima i wánuá Baraseba,
nahádi miꞌi bámbári kana i Nahori wutuꞌna hai Mika toinána.
Moánáꞌmoheꞌ uwalu,
paka tobaleilo,
iamoheꞌ:
21 to towutuꞌ Us,
ádina Us,
Bus,
ádina Bus,
Kemueli to mewaliꞌ umána Árá,
22 haneꞌi Keseꞌ,
Haso,
Pilida,
Idala hai Betueli
23 to mewaliꞌ umána Ribeka.
24 Noꞌonoꞌ woꞌo,
Nahori mokarodua hai hadua hawiꞌ to rahangaꞌ Reuma,
hai moánáꞌheꞌ Teba,
Gahama,
Tahasi hai Maꞌaka.