Karapoánákana Isakiꞌ
2 I kamatoámána miꞌi Burahima,
káláꞌeá miꞌi Sáráꞌ,
hai i tempó to napakanótó miꞌi ami Pueꞌ Ala,a
ia moánáka hadua ánángkóiꞌ tobaleilo.
3 Ánáꞌraꞌ iti nahangaꞌ Burahima Isakiꞌ,
lempóna:
“matawa”.b
4 Magáná miꞌi tinuwuꞌna Isakiꞌ uwalu alona,
ia natileꞌ Burahima hiolaꞌ hai hawaꞌna Pueꞌ Ala.c
5 I karapoánákana Isakiꞌ,
tinuwuꞌna Burahima hangatu miꞌi parena.
6 I tempó iti,
nauliꞌ Sáráꞌ,
“Pueꞌ Ala mampopatawaꞌaꞌ,
hai upu-upu tauna to mohádi poánáꞌkuꞌ ina matawaheꞌ woꞌo ánti kagóeꞌraꞌ hingkakani hai kódóꞌ.
7 Hangkoia heáná paꞌi to mohángáꞌá Burahima kaꞌina árána ánáꞌkiꞌ?
Agáiáná deꞌe-deꞌe moánáꞌntoaꞌ hadua ánángkóiꞌ tobaleilo i kasaeána toámángkuꞌ.”
Burahima mowuraheꞌ Hagari hai Sumaila
8 Kamahile-hileá Isakiꞌ,
i tempóna tiꞌara piꞌi mehuhu,d
Burahima mopaꞌara posusa mahile.
9 I tempó iti,
Sáráꞌ moita Sumaila mampopowadi-wadi Isakiꞌ.e
Sumaila iti ia miꞌi ánáꞌraꞌ Burahima hai Hagari,
towawine toMásiriꞌ.
10 Kanaitána Sáráꞌ apa to pewaliꞌ,
nauliꞌ i Burahima,
“Nuwuramoheꞌ hawiꞌtaꞌ iti hingkakani hai ánáꞌna,
láwiꞌ ánáꞌna iti tiꞌara peisá ina molámbiꞌ ba apa peá hangko i upu-upu to ina napososora ánáꞌkuꞌ Isakiꞌ.”
11 Masusa laluna Burahima mohádi laluitana toinána iti,
láwiꞌ Sumaila iti woꞌo ánáꞌna.
12 Agáiáná nauliꞌ Pueꞌ Ala i Burahima,
“Ineeꞌ nupomasusa lalu kana i ánáꞌmu hai Hagari.
Nupeuláꞌi peá peundeꞌána Sáráꞌ,
láwiꞌ Isakiꞌ riꞌi to ina momuleáka pemuleꞌámu mouláꞌ apa to Kudándiámokoꞌ hangkoia.
13 Ane ánáꞌna Hagari,
ina Kuweꞌi woꞌo handaꞌ pemuleꞌána duuꞌraꞌ mewaliꞌheꞌ hambuaꞌ kadatuá,
láwiꞌ ia woꞌo ánáꞌmu.”
14 Kahalona mepulo-pulo,
Burahima moala miꞌi rótiꞌ hai pemboliá uwai,f
naweꞌi Hagari rapoboku i rárá.
Bokuraꞌ napatiubangiá Burahima,
haneꞌi nahuoꞌ miꞌi pohuꞌ hingkakani hai ánáꞌna.
Mewaliꞌ Hagari pohuꞌ miꞌi,
hai polumaoraꞌ menggoli-nggoli peheꞌ i pádá loriꞌ Baraseba.
15 I kaupuna uwai to raꞌánti,
nawoli miꞌi ánáꞌna i tóáꞌ kau,
16 haneꞌi lao mehoda rekeꞌ-rekeꞌna hangatu mete kakaraoꞌna.
Nauliꞌ i laluna,
“Tiꞌara tuꞌu inaongkuꞌ mampeita ánáꞌkuꞌ mate.”
Tangaꞌna mehoda-hoda,
ia teriaꞌ rumihi.
17 Nahádi miꞌi Pueꞌ Ala kateriaꞌna Sumaila,
onoꞌ miꞌi haneꞌi molaluita miꞌi malaꞌekana Pueꞌ Ala i Hagari hangko i langiꞌ,
nauliꞌ,
“Hagari,
apa to nuposusa?
Ineeꞌkoꞌ malááꞌ,
láwiꞌ Pueꞌ Ala mohádi miꞌi kateriaꞌna ánáꞌmu.
18 Laomokoꞌ i ánáꞌmu,
nupopeángkáꞌ hai nupalindó,
láwiꞌ ina Kupahandaꞌ pemuleꞌána duuꞌraꞌ mewaliꞌheꞌ hambuaꞌ kadatuá to mahile.”
19 Roo onoꞌ,
napetudeꞌá miꞌi Pueꞌ Ala i Hagari hambuaꞌ tibubuꞌ,
haneꞌi lao miꞌi Hagari moꞌóntóki pemboliá uwairaꞌ hai mampopainu ánáꞌna.
20 Pueꞌ Ala mamporángá oaꞌ Sumaila duuꞌna mahile.
Ia toroꞌ i pádá loriꞌ,
hai mewaliꞌ topoahu to mapánde.
21 Tangaꞌraꞌ toroꞌ i pádá loriꞌ Para,
Sumaila napopohamboko miꞌi inána hai hadua towawine to hangko i tampoꞌ Másiriꞌ.
Podándiraꞌ Burahima hai Datu Abimeleꞌ
22 I tempó iti,
Datu Abimeleꞌ hingkakani hai Pikoloꞌ tadulako surudadoꞌna,
laoheꞌ mampohidupaꞌá Burahima.
Nauliꞌ Abimeleꞌ i Burahima,
“Tongawaꞌ Pueꞌ Ala mamporángákoꞌ hai motulungikoꞌ i upu-upu to nubábehi.
23 Onoꞌ miꞌi haneꞌi kupembiáꞌ bona modándikoꞌ deꞌe-deꞌe i lindoꞌna Pueꞌ Ala,
bona tiꞌaraꞌaꞌ nubagiuꞌ ba ánáꞌkuꞌ ba pemuleꞌángkuꞌheꞌ.
Nodo kamaroꞌana lalungkuꞌ i hio,
kupembiáꞌ bona hangaa-ngaa nubábehi woꞌo noꞌonoꞌ i kódóꞌ hai i upu-upu taunángkuꞌ to ara i tampoꞌ to nikatoroꞌi deꞌe.”
24 Nauliꞌ Burahima,
“Kódóꞌ modándiaꞌ noꞌonoꞌ.”
25 Agáiáná ara woꞌo to mopamasusa laluna Burahima,
onoꞌ miꞌi haneꞌi napahaweꞌ miꞌi i Datu Abimeleꞌ kana i bábehiáraꞌ hawiꞌna datu to morámpáki hambuaꞌ tibubuꞌna.
26 Nahániki Abimeleꞌ,
“Tiꞌara kuisá heáná to mobábehi iti,
hai tiꞌara mani haweꞌ hangkani nupolaluita i kódóꞌ.
Hangko deꞌe-deꞌe riꞌi kakuhádina.”
27 Hangko ionoꞌ,
Burahima mampeweꞌi dimbá hai gapiꞌ i Datu Abimeleꞌ,
haneꞌi tauna to rodua iti mopaꞌaraheꞌ podándi.
28 Roo onoꞌ,
lao miꞌi Burahima mopataniꞌ pitu báꞌána ánáꞌ dimbá lundara.
29 Napekuneꞌ Abimeleꞌ i hia,
“Apa riꞌi tunggáiámu haneꞌi nubábehi noꞌonoꞌ?”
30 Mehániꞌ Burahima,
“Kupembiáꞌ bona nutarima pitu báꞌána ánáꞌ dimbá deꞌe,
tandaꞌ kamosabikimu kakódóꞌna miꞌi to mokae tibubuꞌ deꞌe.”
31 Onoꞌ miꞌi haneꞌi katoroꞌá iti rahangaꞌ Baraseba,
lempóna:
“tibubuꞌ podándiá”,g
láwiꞌ ionoꞌ miꞌi podándiraꞌ tauna to rodua iti.