Burahima hai Datu Abimeleꞌ
20
Roo onoꞌ,
Burahima melimbá miꞌi lao i tampoꞌ Negeꞌ to ara i tampoꞌ Kánáꞌá tándáꞌ i wóiꞌ.
Kahaweꞌraꞌ ionoꞌ,
toroꞌheꞌ i kótá Gera i hiliꞌna tampoꞌ Kadesi hai Suruꞌ.
Toroꞌheꞌ nodo tohaweꞌ i kótá iti.
2 I tempó onoꞌ,
nauliꞌ Burahima,
“Sáráꞌ deꞌe ádingkuꞌ.”
Onoꞌ miꞌi haneꞌi Abimeleꞌ,
daturaꞌ toGera,
mohuoꞌ taunána lao moala Sáráꞌ ina napohambokoá.
3 Hangkani tempó tangaꞌ káindi,
mampatongawaꞌ miꞌi Pueꞌ Ala i Abimeleꞌ moliu paturuna,
Nauliꞌ,
“Hangaa-ngaa matekoꞌ láwiꞌ towawine to nuala iti,
ara miꞌi toámána!”
4 Agáiáná Abimeleꞌ tiꞌara mani mampoiluhi Sáráꞌ,
onoꞌ haneꞌi nauliꞌ,
“Pueꞌ!
Tiꞌara kódóꞌ to masalaꞌ.
Ba ina Nupapateaꞌ hai taunángkuꞌheꞌ?
5 Tiꞌara paꞌi Burahima haduduána to manguliꞌ Sáráꞌ iti ádina?
Noꞌonoꞌ woꞌo panguliꞌna towawine iti.
Kubábehi iti hangko i kabulána lalungkuꞌ,
tiꞌaraꞌaꞌ masalaꞌ.”
6 Mehániꞌ Pueꞌ Ala i Abimeleꞌ moliu paturuna,
Nauliꞌ,
“Kuisá tiꞌara nutunggái mobábehi salaꞌ,
onoꞌ miꞌi haneꞌi Kukámpáikoꞌ bona tiꞌarakoꞌ mampoiluhi towawine iti haneꞌi mobábehi dósá i Kódóꞌ.
7 Agáiáná deꞌe-deꞌe,
hangaa-ngaa nupopasuleꞌ towawine iti i toámána láwiꞌ toámána iti hadua nabiꞌ.
Ia to ina mampekakaeákoꞌ bona tiꞌarakoꞌ mate.
Agáiáná ane tiꞌarai nupopasuleꞌ,
io hai upu-upu taunámu hangaa-ngaa matekou.”
8 Kahalona mepulo-pulo,
nakióꞌmoheꞌ Abimeleꞌ upu-upu topobágóꞌna,
haneꞌiheꞌ napopaisáꞌá apa to pewaliꞌ.
I karahádina,
malááꞌ ntepuꞌuheꞌ.
9 Roo onoꞌ,
ia mokióꞌ Burahima,
haneꞌi nakuneꞌ,
“Moapa riꞌi haneꞌi nupanoꞌonoꞌaꞌ?
Apa riꞌi salaꞌkuꞌ i hio haneꞌi nupaꞌara kapári i kódóꞌ hai rugiꞌ i popárentáꞌángkuꞌ.
Tiꞌara maroꞌa bábehiámu iti!
10 Apa riꞌi tunggáiámu haneꞌi nubábehi noꞌonoꞌ.”
11 Mehániꞌ Burahima,
“Kuꞌuliꞌ riꞌi tiꞌara ara tauna ieneꞌ to mengkoruꞌ i Pueꞌ Ala,
mewaliꞌ kupekiri ina rapapateaꞌ ánti pepokaeluraꞌ tauna i toinángkuꞌ.
12 Hai katoꞌuána,
ia ádingkuꞌ,
láwiꞌ kaiꞌ hadua peá umángkiꞌ,
agáiáná tiꞌaraꞌangkaiꞌ hangina-ngina.
Hai hambokoangkaiꞌ woꞌo.
13 I kanahuoꞌkuꞌ Pueꞌ Ala mopálehi tampoꞌna umángkuꞌ,
moliloangkaiꞌ i tampoꞌraꞌ tauna ntániꞌna.
Onoꞌ miꞌi haneꞌi kuhángáꞌá toinángkuꞌ,
‘Ane nupokaꞌahiꞌ ntepuꞌuaꞌ,
iumbá peá kalaoántaꞌ,
hangaa-ngaa nupahaweꞌáheꞌ kaꞌiona ádingkuꞌ.’ ”
14 Roo onoꞌ,
Abimeleꞌ mampopasuleꞌ Sáráꞌ i Burahima,
hai naweꞌi woꞌo hawiꞌ,
dimbá hai gapiꞌ.
15 Nauliꞌ datu iti i Burahima,
“Deꞌe miꞌi tampoꞌkuꞌ to talindoꞌ.
Peisákoꞌ toroꞌ iumbá peá peundeꞌámu.”
16 Haneꞌi nahángáꞌá woꞌo Sáráꞌ,
“Wutuꞌmu kuweꞌi miꞌi hasábu dóiꞌ peráꞌ ánti karaꞌántimu i támbingkuꞌ,
bona tongawaꞌ i upu-upu tauna katiꞌárámu masalaꞌ.”
17-18 Roo onoꞌ,
Burahima mampekakaeá Datu Abimeleꞌ hantámbi,
láwiꞌ ánti kanaꞌalana Sáráꞌ,
nahukuheꞌ PUEꞌ,
álána laloheꞌ toinána hai upu-upu hawiꞌna.
Roo Burahima mekakae,
Datu Abimeleꞌ mauriꞌ miꞌi hai to i támbina tiꞌarapoheꞌ lalo,
agáiáná moánáꞌ wopaheꞌ.