Dósáraꞌ toSodomo
19
Kalumbaꞌ miꞌi,
malaꞌeka to rodua iti haweꞌheꞌ i kótá Sodomo.
Tempó onoꞌ,
Loꞌoti mehoda i babaꞌá bente kótá.a
Kamoitána malaꞌeka iti haweꞌ,
kásáliu meángkáꞌ lao mampombelámbiꞌáheꞌ hai molingkudu i lindoꞌraꞌ motóngkóꞌ haweꞌ i tampoꞌ,
2 nauliꞌ,
“Tuá,
mehupeꞌmokeꞌ sieruꞌ i támbingkuꞌ.
Tabahoꞌi miꞌi bitintaꞌ hai hambengimokeꞌ ieneꞌ.
Kahalo rái mepulo haneꞌi tapaliliu polumaontaꞌ.”
Rahániki,
rauliꞌ,
“Ineeꞌ miꞌi hampaiꞌ.
Ina maturu peangkaiꞌ i tanalapa i tangaꞌ kótá deꞌe.”
3 Agáiáná napembiáꞌ ntepuꞌu Loꞌoti bona hambengiheꞌ i támbina.
Kahópóꞌána mesuaꞌ mpuꞌumoheꞌ i lalu támbina.
Roo onoꞌ,
napatimama miꞌi pandeꞌraꞌ,
natunuámoheꞌ rótiꞌ to tiꞌara raragiꞌi,
haneꞌiheꞌ mandeꞌ.
4 Hangko tiꞌara maniheꞌ maturu,
upu-upu tobaleilo i humalele kótá iti,
mantepuꞌu hangko i pamuda haweꞌ-haweꞌ i tosae,
laoheꞌ molibuꞌ támbina Loꞌoti.
5 Monganga-ngangaheꞌ pueꞌ wánuá iti,
rauliꞌ,
“Iumbámoheꞌ tauna to mai hambengi i támbimu?
Nupopesuwuꞌheꞌ mai tobaleilo to roduaheꞌ iti bona kipakeꞌheꞌ!”
6 Mesuwuꞌ miꞌi Loꞌoti haneꞌi motuko ntaleuꞌ babaꞌ támbi iti.
7 Nahángáꞌáheꞌ toSodomo,
“Halalungkuꞌ,
kupembiáꞌ ntepuꞌu i kómu bona ineeꞌkou mobábehi to kadake iti.
8 Nipehádingi maroꞌa.
Araheꞌ ánáꞌkuꞌ rodua to ánáꞌntawine maniheꞌ.
Rángina miꞌi hira kuweꞌikou bona nibábehi apa peá mouláꞌ peundeꞌámi.
Agáiáná kupembiáꞌ ntepuꞌu ineeꞌkou mosilakai torarengkuꞌ deꞌe,
láwiꞌ maiheꞌ i kódóꞌ,
onoꞌ miꞌi haneꞌi kódóꞌ miꞌi to hangaa-ngaa mokámpáiheꞌ.”
9 Agáiáná rauliꞌ peá tauna to handaꞌ iti i Loꞌoti,
“Pobaeꞌ!
Io tiꞌara ara kuasaꞌmu mopárentáꞌangkaiꞌ láwiꞌ io tohaweꞌ pekoꞌ.
Ina melumbuꞌ bábehiángkiꞌ i hio haneꞌi i tauna to rodua iti!”
Roo onoꞌ,
rahumbángá miꞌi Loꞌoti ina laoheꞌ mogero babaꞌ.
10 Agáiáná torare to rodua iti modiiꞌ Loꞌoti mesuaꞌ i lalu támbi,
haneꞌi motukoheꞌ babaꞌ.
11 Roo onoꞌ,
rapabilo miꞌi mátáraꞌ upu-upu tauna to ara i rawa.
Mewaliꞌ kehapiꞌ noumbá miꞌi kamampeliꞌraꞌ babaꞌ támbi,
mbero-mbero peá.
Loꞌoti mopálehi kótá Sodomo
12 Hangko ionoꞌ,
rauliꞌ tauna to rodua iti i Loꞌoti,
“Ane ara maniheꞌ ánáꞌmu,
mániámu ba halalumu i kótá deꞌe,
hangaa-ngaa laoheꞌ nuala bona pohuꞌkou upu-upu hangko ieneꞌ,
13 láwiꞌ kótá deꞌe ina kigero.
Nahádi miꞌi PUEꞌ peraruaꞌraꞌ tauna kana i kótá deꞌe,
hai Naisá miꞌi kakadakena tauna to toroꞌ ieneꞌ.
Onoꞌ miꞌi haneꞌiangkaiꞌ Nahuoꞌ mai mogero kótá Sodomo deꞌe hai moropuꞌ upu-upu óntóꞌna.”
14 Roo onoꞌ,
lao miꞌi Loꞌoti mampombelámbiꞌá rodua tobaleilo to mokalembákimoheꞌ ánáꞌna,
haneꞌi nahángáꞌáheꞌ,
“Kawiáꞌmokou pohuꞌ hangko i kótá deꞌe,
láwiꞌ ina nagero miꞌi PUEꞌ.”
Agáiáná rauliꞌ riꞌi wadi-wadina peá Loꞌoti.
15 Mepulo-pulo,
malaꞌeka to rodua iti mopahumpeꞌheꞌ Loꞌoti,
rauliꞌ,
“Kawiáꞌmokou pohuꞌ hingkakani hai toinámu hai ánáꞌmu towawine to rodua,
bona tiꞌarakou meuláꞌ mate ane kótá deꞌe ragero.”
16 Bata-bata mani laluna Loꞌoti,
agáiáná ánti kamaꞌahiꞌna PUEꞌ i hia,
onoꞌ miꞌi haneꞌi malaꞌeka to rodua iti motibaaꞌ taeraꞌ Loꞌoti,
toinána hai ánáꞌna to rodua iti,
moántiheꞌ mesuwuꞌ hangko i kótá Sodomo.
17 Kahaweꞌraꞌ i rawa kótá,
nahángáꞌá wopaheꞌ hadua malaꞌeka,
“Melangkamokou bona tueꞌ pekou.
Ineeꞌkou mehaileꞌ i taleuꞌmi hai ineeꞌkou mengkaroo i apa peá i lembo Iarade.
Melangkamokou lao i buluꞌ,
bona tiꞌarakou mate!”
18 Agáiáná nauliꞌ Loꞌoti,
“Tuá,
ineeꞌ wongkaiꞌkaa nihuoꞌ melangka lao i buluꞌ.
19 Maroꞌa ntepuꞌu lalumi i kódóꞌ,
hai toꞌu-toꞌu mpuꞌu nitulungi hai nipatueꞌmoꞌ.
Agáiáná buluꞌ rupeꞌo karaoꞌ.
Tiꞌara kubuku.
Kupokalááꞌ ina nalámbiꞌ peangkaiꞌ to mepakarugiꞌ iti,
hai ina mateangkaiꞌ hangko tiꞌara maniangkaiꞌ haweꞌ ionoꞌ.
20 Peita,
i lindoꞌtaꞌ ara wánuá to kókóiꞌ,
tiꞌara gaga karaoꞌ.
Ane peisái,
nipaliuangkaiꞌ melangka lao ionoꞌ bona tueꞌ peangkaiꞌ.”
21 Mehániꞌ malaꞌeka,
“Peisánto.
Pembiáꞌmu iti woꞌo kutarima.
Wánuá to kókóiꞌ iti tiꞌara ina kugero,
22 agáiáná hangaa-ngaa melangkakou hawiáꞌ-wiáꞌ,
láwiꞌ tiꞌara mani peisá kubábehi ba apa-apa ane tiꞌara manikou haweꞌ ionoꞌ.”
Onoꞌ miꞌi haneꞌi wánuá iti rahangaꞌ Soa,
lempóna:
“kókóiꞌ”.
Kamaropuꞌna kótá Sodomo hai Gumora
23 Membeto miꞌi alo hangko haweꞌ riꞌi Loꞌoti i wánuá Soa.
24 Hangkaꞌ-hangkaꞌ perái PUEꞌ mampopendáulu hangko i langiꞌ udá watu belerang to keapi i kótá Sodomo hai Gumora.
25 Kótá to rombuaꞌ iti maropuꞌ haweꞌ-haweꞌ i humalele lembona Iarade.
Tudaꞌ-tudaꞌ,
binataꞌ hai tauna,
upu aha maropuꞌ.
26 Agáiáná toinána Loꞌoti to metuntungi i hia,
mehaileꞌ riꞌi i taleuꞌna,
onoꞌ miꞌi haneꞌi mewaliꞌ watu bure.
27 Kahalona mepulo-pulo,
mearó miꞌi Burahima haneꞌi nagagu lao i peángkáꞌáraꞌ hai PUEꞌ iamáindina.b
28 Napetiro tándáꞌ i Sodomo,
Gumora,
hai i humalele lembona Iarade iti.
Naita miꞌi rámbu to rumukuꞌ mentumbuꞌ hangko i tampoꞌ iti,
nodo rámbu topohunui.
29 Noꞌonoꞌ miꞌi kótá iti nagero Pueꞌ Ala,
agáiáná Nabuhinao miꞌi pembiáꞌna Burahima,
onoꞌ miꞌi haneꞌi Loꞌoti Napopesuwuꞌ hangko tiꞌara mani kótá iti Nagero.
Pantepuꞌuána toioruraꞌ toMoabiꞌ hai toAmoni
30 Loꞌoti malááꞌ toroꞌ oaꞌ i Soa,
onoꞌ haneꞌi ia pohuꞌ miꞌi lao i buluꞌ hingkakani hai ánáꞌna towawine to rodua,
hai toroꞌheꞌ ionoꞌ i lalu balamba watu.
31 Hangkani tempó,
ánáꞌna towutuꞌ molaluita i ádina,
nauliꞌ,
“Umántaꞌ matoama miꞌi,
hai tiꞌara ara tobaleilo ieneꞌ to peisá tapotoama bona ara ánáꞌtaꞌ nodo to biásá i humalele duniáꞌ.
32 Rángina miꞌi tapamalangu umántaꞌ haneꞌi tapoiluhi.
Ina moánáꞌkeꞌ bona tiꞌara madepuꞌ pemuleꞌána umántaꞌ.”
33 Káindi iti,
umáraꞌ rapopainu miꞌi anggoroꞌ duuꞌna malangu,
haneꞌi ánáꞌna towutuꞌ lao mampoiluhi.
Ánti kamalanguna,
tiꞌara piꞌi naisá umáraꞌ apa to mewaliꞌ.
34 Kahalona wopiꞌi ánáꞌna towutuꞌ molaluita i ádina,
“Iakáindi,
mampoiluhimoꞌ umántaꞌ.
Deiná káindi,
tapamalangu wopiꞌi,
bona io to mampoiluhi.
Ane tabábehi noꞌonoꞌ,
kitaꞌ rodua ina moánáꞌkeꞌ bona pemuleꞌána umántaꞌ tiꞌara madepuꞌ.”
35 Loꞌoti rapamalangu wopiꞌi,
hai ánáꞌna to adi lao mampoiluhi.
Ánti kamalanguna,
tiꞌara piꞌi naisá apa to mewaliꞌ.
36 Mewaliꞌ káláꞌeámoheꞌ ánáꞌna to rodua iti hangko i umáraꞌ.
37 Ánáꞌna towutuꞌ moánáka hadua ánángkóiꞌ tobaleilo to nahangaꞌ Moabiꞌ.c
Ia miꞌi to momuleꞌákaheꞌ toMoabiꞌ to tueꞌ maniheꞌ deꞌe-deꞌe.
38 Ánáꞌna to adi moánáka woꞌo hadua tobaleilo to nahangaꞌ Beni-Ami.d
Ia miꞌi to momuleꞌákaheꞌ toAmoni to tueꞌ maniheꞌ deꞌe-deꞌe.e