Pueꞌ Ala mohuleki dándiNa i Burahima
18
PUEꞌ mampatongawaꞌ wopiꞌi i Burahima hungkuꞌ i kau to marumbu i Mamere.
Kalialo miꞌi,
Burahima mehoda-hoda i babaꞌ bambaruꞌna.
2 Tangaꞌna mehoda-hoda,
iaperái moita tálu tobaleilo to meángkáꞌ.
Kásáliu laoheꞌ nagagu hai molingkudu motóngkóꞌ haweꞌ i tampoꞌ,
3 haneꞌi nahángáꞌáheꞌ,
“Tuá,
ane tapokana,
ineeꞌkeꞌ sieruꞌ mopaliliu polumaontaꞌ.
Mehupeꞌkeꞌ hampaiꞌ i bambaruꞌtaꞌ.
4 Mehoda-hodakeꞌ sieruꞌ i tóáꞌ kau deꞌe.
Ina laoaꞌ moala uwai bona tapopobahoꞌi bitintaꞌ.
5 Ina mandeꞌkeꞌ sieruꞌ,
bona maróhókeꞌ huleꞌ mopaliliu polumaontaꞌ,
láwiꞌ bulá miꞌi laluntaꞌ mehupeꞌ i bambaruꞌtaꞌ deꞌe.”
Rauliꞌ,
“Peisánto.
Maroꞌa.”
6 Hawiáꞌ-wiáꞌ Burahima mesuaꞌ i bambaruꞌna mampohawaꞌá Sáráꞌ,
nauliꞌ,
“Hawiáꞌkoꞌ lao mai nuala tinámpu to maroꞌa hangkusau,a
hai nubábehi rótiꞌ to humambuaꞌ.”
7 Roo onoꞌ,
nagagu miꞌi Burahima lao i gimpu moala hambaꞌa ánáꞌ gapiꞌ to maruduꞌ,
haneꞌi naweꞌi hadua hawiꞌna bona poloꞌ mopatimama.
8 Roo onoꞌ,
naꞌala miꞌi uwai huhu to boku miꞌi,
hai uwai huhu gapiꞌ,
hai bauꞌ ánáꞌ gapiꞌ to leháꞌ miꞌi,
haneꞌi napopandeꞌheꞌ torarena.
Tangaꞌraꞌ mandeꞌ,
Burahima meángkáꞌ hungkuꞌ i hira naporángáheꞌ i tóáꞌ kau iti.
9 Roo onoꞌ,
mekuneꞌheꞌ,
“Iumbá riꞌi Sáráꞌ,
toinámu?”
Mehániꞌ Burahima,
“Aranto i lalu bambaruꞌ.”
10 Hadua hangko i hira molaluita,
nauliꞌ,
“Pare mai i tempó to hibali hai tempó deꞌe,
ina mesuleꞌAꞌ huleꞌ mai ieneꞌ,
hai i tempó iti woꞌo,
Sáráꞌ toinámu ina moánáka hadua ánángkóiꞌ tobaleilo.”
Tempó iti,
Sáráꞌ ara i babaꞌ bambaruꞌ i taleuꞌraꞌ torare,
hai nahádi laluitaraꞌ iti.
11 Sae ntepuꞌumoheꞌ Sáráꞌ hai Burahima,
hai Sáráꞌ tiꞌara piꞌi nahumba.
12 Onoꞌ miꞌi haneꞌi matawa ngkábuni,
hai nauliꞌ i laluna,
“Kódóꞌ deꞌe matoina ntepuꞌumoꞌ hai toámángkuꞌ matoama miꞌi woꞌo.
Mesuaꞌ paꞌi i akala ina moánáꞌaꞌ?”
13 Mewaliꞌ napekuneꞌ PUEꞌ i Burahima,
“Moapa riꞌi haneꞌi Sáráꞌ matawa?
Moapa riꞌi haneꞌi nauliꞌ i laluna,
‘Toꞌu paꞌi ina moánáꞌaꞌ,
kehapiꞌ matoinamoꞌ?’
14 Ara paꞌi to tiꞌara nabuku napopewaliꞌ PUEꞌ?
Nodo to Kuꞌuliꞌ ininá,
pare mai i tempó to tepakanótó miꞌi,
ina mesuleꞌAꞌ mai,
hai i tempó iti miꞌi Sáráꞌ ina moánáka hadua ánángkóiꞌ tobaleilo.”
15 Ánti kamalááꞌna,
mesápu miꞌi Sáráꞌ,
nauliꞌ,
“Tiꞌaraꞌaꞌ matawa.”
Agáiáná nahániki PUEꞌ,
“Toꞌu kamatawamu ininá.”
Burahima mampetawaꞌi toSodomo
16 Roo onoꞌ,
torare to tálu iti pohuꞌheꞌ lao i kótá Sodomo,
hai Burahima mamporángáheꞌ.
Kótá Sodomo rapetiro hangko karaoꞌ.
17 Nauliꞌ PUEꞌ i laluna,
“Tiꞌara maroꞌa ane Kuwuniángi hangko i Burahima apa to ina Kubábehi,
18 láwiꞌ pemuleꞌánaheꞌ ina mewaliꞌ hambuaꞌ kadatuá to mahile hai makuasaꞌ,
hai ánti kaꞌiana,
upu-upu kadatuá i duniáꞌ ina molámbiꞌ pewátiꞌ hangko i Kódóꞌ.
19 Ia miꞌi to Kupileꞌi ina mopaturoꞌheꞌ ánáꞌna hai pemuleꞌána bona mobábehiheꞌ apa to maroꞌa hai hintotoꞌ mouláꞌ peundeꞌáNgkuꞌ.
Ane rapeuláꞌi upu-upuna iti,
dándiNgkuꞌ i Burahima ina Kubukeki.”
20 Roo onoꞌ,
PUEꞌ mongkóráꞌ wopiꞌi i Burahima,
Nauliꞌ,
“Kuhádi miꞌi peraruaꞌraꞌ tauna to manguliꞌ kadake ntepuꞌu bábehiáraꞌ toSodomo hai toGumora.
Ánti kateriaꞌraꞌ iti,
21 ina mendáuluAꞌ lao ionoꞌ mopáresáꞌ upu-upu bábehiáraꞌ bona Kuisá ntepuꞌu katoꞌuna ba tiꞌara.”
22 Roduaheꞌ hangko i torare iti moioruheꞌ lao i Sodomo.
Agáiáná PUEꞌ ara mani hingkakani hai Burahima.
23 Burahima mohungkuki PUEꞌ hai mekuneꞌ,
“Toꞌu mpuꞌu paꞌi ina Nuropuꞌheꞌ tauna to manótó laluraꞌ hingkakani hai tauna to masalaꞌ?
24 Noumbá ane rápáꞌna arantoheꞌ lima puloꞌraꞌ tauna to manótó laluraꞌ i kótá iti,
ba ina Nugero?
Tiꞌaraheꞌ paꞌi Nuámpungi bona lima puloꞌraꞌ iti tepelaeheꞌ?
25 Ineeꞌ tauna to manótó laluraꞌ iti Nuhukuheꞌ hingkakani hai tauna to masalaꞌ.
Ineeꞌ,
Pueꞌ!
Peisá paꞌi Topobutusi duniáꞌ deꞌe mobábehi to tiꞌara hintotoꞌ?”
26 Nahániki PUEꞌ,
“Kehapiꞌ lima peá puloꞌraꞌ tauna to manótó laluraꞌ Kulámbiꞌ i kótá Sodomo,
tiꞌara ina Kugero.
Ina tueꞌheꞌ upu-upu tauna ánti to lima puloꞌraꞌ iti.”
27 Nauliꞌ wopiꞌi Burahima,
“Pueꞌ,
kupembiáꞌ ámpu láwiꞌ kuꞌumpuki wopiꞌi laluitangkuꞌ deꞌe.
Kódóꞌ deꞌe tauna biásá peaꞌ.
Tiꞌaraꞌaꞌ makuasaꞌ mopakanótó apa peá.
28 Agáiáná noumbá ane iba peá puloꞌraꞌ hai lima tauna to manótó laluraꞌ,
ba ina Nugero kótá iti?”
Nahániki PUEꞌ,
“Ane ara maniheꞌ iba puloꞌraꞌ hai lima tauna to manótó laluraꞌ,
kótá iti tiꞌara ina Kugero.”
29 Napekuneꞌ wopiꞌi Burahima,
“Noumbá ane ara maniheꞌ iba puloꞌraꞌ tauna to manótó laluraꞌ?”
Nahániki PUEꞌ,
“Ane ara maniheꞌ iba puloꞌraꞌ tauna to manótó laluraꞌ,
tiꞌara ina Kupopewaliꞌ tunggáiáNgkuꞌ.”
30 Nauliꞌ wopiꞌi Burahima,
“Pueꞌ,
ineeꞌKoꞌ mabukoꞌ.
Nupatodáhi maniaꞌ molaluita.
Noumbá ane ara maniheꞌ tálu puloꞌraꞌ tauna to manótó laluraꞌ?”
Nahániki PUEꞌ,
“Ane Kulámbiꞌ tálu puloꞌraꞌ tauna to manótó laluraꞌ,
kótá iti tiꞌara ina Kugero.”
31 Nauliꞌ wopiꞌi Burahima,
“Pueꞌ,
membiáꞌaꞌ ámpu.
Kupengkabáiki mani mopahaweꞌ laluitangkuꞌ deꞌe.
Noumbá ane rompuloꞌ perái tauna to manótó laluraꞌ?”
Nahániki PUEꞌ,
“Ane Kulámbiꞌ rompuloꞌ tauna to manótó laluraꞌ,
kótá iti tiꞌara ina Kugero.”
32 Kahópóꞌána,
nauliꞌ wopiꞌi Burahima,
“Pueꞌ,
ineeꞌKoꞌ mabukoꞌ.
Molaluita maniaꞌ hangkani.
Noumbá ane Nulámbiꞌ ba hampuloꞌ perái tauna to manótó laluraꞌ?”