Petileꞌ ia miꞌi tandaꞌ pototowina Pueꞌ Ala i Burahima
17
Magáná miꞌi tinuwuꞌna Abura hahioꞌ puloꞌna hai hahioꞌ parena,
mampatongawaꞌ miꞌi PUEꞌ i Abura,
Nauliꞌ,
“Kódóꞌ miꞌi Pueꞌ Ala to Makuasaꞌ.a
Mengkoruꞌmokoꞌ i Kódóꞌ hai mampeuláꞌimokoꞌ upu-upuna peundeꞌáNgkuꞌ.
2 Ina Kupaꞌara pototowi i hio,
hai ina Kuweꞌikoꞌ pemuleꞌámu to handaꞌ ntepuꞌu.”
3 Molingkudu miꞌi Abura,
motóngkóꞌ haweꞌ i tampoꞌ,
haneꞌi mongkóráꞌ wopiꞌi Pueꞌ Ala i hia,
Nauliꞌ,
4 “Deꞌe miꞌi pototowi to ina Kupaꞌara i hio:
ina mewaliꞌkoꞌ umáraꞌ handaꞌ kadatuá.
5 Onoꞌ miꞌi haneꞌi hangaꞌmu tiꞌara piꞌi rauliꞌ Abura,
lempóna:
‘umaꞌ to teádái’,
agáiáná rahangaꞌmokoꞌ Burahima,
lempóna:
‘umáraꞌ handaꞌ tauna’.
6 Ina Kuweꞌikoꞌ handaꞌ pemuleꞌámu duuꞌraꞌ mewaliꞌ handaꞌ kadatuá,
hai handaꞌ pemuleꞌámu ina mewaliꞌ datu.
7 Ina Kupaꞌara pototowi i hio hai i upu-upu pemuleꞌámu.
Pototowi iti tiꞌara ina mokahópóꞌá.
Kódóꞌ miꞌi to mewaliꞌ Pueꞌmu hai Pueꞌraꞌ pemuleꞌámu duuꞌna i rue-ruena.
8 Deꞌe-deꞌe tampoꞌ Kánáꞌá nikatoroꞌi nodo pekou tauna to haweꞌ.
Agáiáná tampoꞌ deꞌe ina Kuweꞌikoꞌ haweꞌ-haweꞌ i upu-upu pemuleꞌámu duuꞌna i rue-ruena,
hai Kódóꞌ miꞌi to ina mewaliꞌ Pueꞌraꞌ.”
9 Mongkóráꞌ wopiꞌi Pueꞌ Ala i Burahima,
Nauliꞌ,
“Noꞌonoꞌ woꞌo,
hangaa-ngaa nupeuláꞌi pototowi deꞌe,
io hai upu-upu pemuleꞌámu.
10 Deꞌe miꞌi pototowiNgkuꞌ to hangaa-ngaa nipeuláꞌi.
Io hai upu-upu pemuleꞌámu tobaleilo hangaa-ngaa ratileꞌ,
11 láwiꞌ iti to ina mewaliꞌ tandaꞌ to motakaꞌ pototowiNgkuꞌ i kómu.
12 Mewaliꞌ,
mantepuꞌu deꞌe-deꞌe,
io hai upu-upu pemuleꞌámu hangaa-ngaa motileꞌkou ánáꞌmi tobaleilo to tinuwuꞌna uwalu alona,
tepasuaꞌ upu-upu tauna to raꞌánáka i katoroꞌámi,
maroꞌa ánáꞌmi,
maroꞌa ánáꞌna hawiꞌmi.
Mogalo riꞌi hawiꞌmi to rahóló hangko i tauna ntániꞌna,
hangaa-ngaa nitileꞌheꞌ woꞌo.
13 Upu-upu tobaleilo hangaa-ngaa ratileꞌ,
láwiꞌ iti to motakaꞌ pototowiNgkuꞌ i kómu haweꞌ i rue-ruena.
14 Upu-upu tobaleilo to tiꞌara ratileꞌ,
tiꞌaraheꞌ rarekeꞌ taunáNgkuꞌ,
láwiꞌ tiꞌaraheꞌ mampeuláꞌi pototowiNgkuꞌ.”
15 Mongkóráꞌ wopiꞌi Pueꞌ Ala i Burahima,
Nauliꞌ,
“Ane toinámu,
ineeꞌ miꞌi nukióꞌ Sarai,
agáiáná nuhangaꞌ miꞌi Sáráꞌ.b
16 Sáráꞌ ina Kuwátiꞌ bona moánáka hadua ánángkóiꞌ tobaleilo to Kuweꞌikoꞌ,c
hai Sáráꞌ iti ina Kupopewaliꞌ ináraꞌ handaꞌ kadatuá.
Hangko i pemuleꞌána,
ina araheꞌ to mewaliꞌ datu.”
17 Molingkudu miꞌi Burahima motóngkóꞌ haweꞌ i tampoꞌ,
agáiáná matawa riꞌi hai nauliꞌ i laluna,
“Mesuaꞌ paꞌi i akala,
tobaleilo to hangatu miꞌi parena tinuwuꞌna,
nabuku mani memuleꞌ?
Hai Sáráꞌ toinángkuꞌ,
tinuwuꞌna hahioꞌ miꞌi puloꞌna parena,
nabuku mani paꞌi moánáꞌ?”
18 Roo onoꞌ,
nauliꞌ Burahima i Pueꞌ Ala,
“Ane peisái,
Sumaila miꞌi to mewaliꞌ pueꞌ sosora to Nudándiáꞌaꞌ.”
19 Agáiáná nauliꞌ Pueꞌ Ala,
“Tiꞌara.
Sáráꞌ toinámu,
ia riꞌi to ina moánáka hadua ánángkóiꞌ tobaleilo,
hai ina nuhangaꞌ Isakiꞌ,
lempóna:
‘matawa’.
Ina Kupaꞌara pototowiNgkuꞌ to tiꞌara mokahópóꞌá i ánáꞌmu iti hai i upu-upu pemuleꞌána.
20 Agáiáná Kupehádingi woꞌo pembiáꞌmu kana i Sumaila.
Onoꞌ miꞌi haneꞌi ina Kuwátiꞌ hai Kupahandaꞌ ntepuꞌu pemuleꞌána.
Ia ina mewaliꞌ toioruraꞌ hampuloꞌ hai rodua tadulako,
hai pemuleꞌánaheꞌ ina Kupopewaliꞌ hambuaꞌ kadatuá to mahile.
21 Agáiáná pototowiNgkuꞌ ina Kubukeki i Isakiꞌ,
ánáꞌmu to ina napoánáka Sáráꞌ pare mai i tempó to hibali hai deꞌe.”
22 Roo mongkóráꞌ noꞌonoꞌ,
Pueꞌ Ala mopálehi miꞌi Burahima.
23 Alo iti pemiꞌi,
Burahima mampeuláꞌi hawaꞌna Pueꞌ Ala,
motileꞌ Sumaila hai upu-upuheꞌ tobaleilo to ara i katoroꞌána,
tepasuaꞌ hawiꞌna to mesupaꞌheꞌ ionoꞌ hai hawiꞌna to nahóló hangko i tauna ntániꞌna.
24 I karatileꞌna Burahima,
tinuwuꞌna hahioꞌ miꞌi puloꞌna hai hahioꞌ parena,
25 hai Sumaila,
ánáꞌna,
hampuloꞌ miꞌi hai tálu parena tinuwuꞌna.
26 Hira rodua ratileꞌ alo iti,
27 noꞌonoꞌ woꞌo upu-upu hawiꞌna Burahima.