Hagari hai Sumaila
16
Sarai toinána Abura tiꞌara mani ara ánáꞌna,
agáiáná ara hawiꞌna toMásiriꞌ,
hadua ánáꞌntawine to rahangaꞌ Hagari.
2 Onoꞌ miꞌi haneꞌi molaluita miꞌi Sarai i Abura,
nauliꞌ,
“Tiꞌaraꞌaꞌ naweꞌi PUEꞌ moánáꞌ.
Rángina miꞌi nupoiluhi miꞌi sieruꞌ deꞌe hawiꞌkuꞌ bona ane moánáꞌi,
ara ánáꞌtaꞌ to ina kupoánáꞌ.”
Napokana Abura apa to nauliꞌ toinána,
3 onoꞌ miꞌi haneꞌi Sarai mampeweꞌi hawiꞌna napoiluhi Abura.
I tempó iti,
hampuloꞌ miꞌi parena Abura toroꞌ i tampoꞌ Kánáꞌá.
4 Mewaliꞌ Abura hai Hagari hampapaturuámoheꞌ álána káláꞌeá miꞌi towawine iti.
Agáiáná kanaisána Hagari kakáláꞌeána,
mampepemahile hai tiꞌara piꞌi mengkoruꞌ i Sarai.
5 Onoꞌ miꞌi haneꞌi nauliꞌ Sarai i Abura,
“Kuweꞌimokoꞌ hawiꞌkuꞌ Hagari,
agáiáná ánti kanaisána kakáláꞌeána,
tiꞌara piꞌi mengkoruꞌ i kódóꞌ.
Io to masalaꞌ!
Kuhárungá PUEꞌ ina mopakanótóákeꞌ posisalaꞌ deꞌe.”
6 Mehániꞌ Abura,
“Ia hawiꞌmu,
mewaliꞌ io to makuasaꞌ i hia.
Nubábehi peundeꞌámu,
apa to maroꞌa nupekiri.”
Mantepuꞌu ionoꞌ,
Sarai mopakapári Hagari duuꞌna melangka.
7 I kapohuꞌna Hagari iti,
malaꞌekana PUEꞌ lao mampohidupaꞌá Hagari hungkuꞌ i katumbuꞌá uwai i pádá loriꞌ,
i rárá to lao i Suruꞌ.
8 Nauliꞌ malaꞌeka iti,
“Hagari hawiꞌna Sarai,
hangko iumbákoꞌ mai hai iumbákoꞌ lao?”
Mehániꞌ Hagari,
“Melangkaꞌaꞌ mai hangko i pueꞌkuꞌ Sarai.”
9 Nauliꞌ wopiꞌi malaꞌeka iti,
“Mesuleꞌmokoꞌ i pueꞌmu,
hai mengkoruꞌmokoꞌ i hia.”
10 Napaliliu miꞌi malaꞌeka laluitana nauliꞌ:
“Ina Kuweꞌikoꞌ handaꞌ pemuleꞌámu
duuꞌraꞌ tiꞌara piꞌi peisá raimbaꞌ.
11 Tiꞌara piꞌi marue ina moánákakoꞌ hadua ánángkóiꞌ tobaleilo.
Ánáꞌmu iti ina nuhangaꞌ Sumailaa
láwiꞌ nahádi miꞌi PUEꞌ kateriaꞌmu i lalu kamapárimu.
12 Ánáꞌmu iti ina tueꞌ nodo hambaꞌa kalide to maila.
Ia ina moewaꞌ upu-upu tauna,
hai ia woꞌo ina raewaꞌ upu-upu tauna.
I katoroꞌána,
ia ina moewaꞌ woꞌo upu-upu halaluna.”
13 Roo onoꞌ,
nauliꞌ Hagari,
“Toꞌu mpuꞌu paꞌi kuita miꞌi PUEꞌ to mampeitaꞌaꞌ?”
Onoꞌ miꞌi haneꞌi ia mohangaꞌ Pueꞌ Ala “El-Roi”,
lempóna:
“Pueꞌ Ala to mampeitaꞌaꞌ”.
14 Onoꞌ miꞌi haneꞌi tibubuꞌ iti rahangaꞌ tibubuꞌ Lahai-Roi,
lempóna:
“tibubuꞌNa To Tueꞌ hai Mampeitaꞌaꞌ”.
Tibubuꞌ iti ara mani i hiliꞌna Kadesi hai Bered.