Pototowina Pueꞌ Ala i Abura
15
Hangko ionoꞌ,
PUEꞌ mampatongawaꞌ miꞌi i Abura moliu pampetudeꞌá,
Nauliꞌ:
“Abura,
ineeꞌkoꞌ malááꞌ.
Kódóꞌ to ina mokámpáikoꞌ hangko i hinángkáꞌna to mepakarugiꞌ,
hai ina Kuweꞌikoꞌ háwángina to mahile ntepuꞌu.”
2-3 Agáiáná nauliꞌ Abura,
“Ó Pueꞌ ALA.
Tiꞌaraꞌaꞌ wongkódóꞌá Nupopemuleꞌ.
To ina mampososora párewángkuꞌ,
bateꞌna peá Eliese hawiꞌkuꞌ toDamasiꞌ.
Mewaliꞌ apa miꞌi bunduꞌna Nuweꞌiaꞌ párewá to handaꞌ?”
4 Agáiáná mongkóráꞌ wopiꞌi PUEꞌ i Abura,
Nauliꞌ,
“Tiꞌara hawiꞌmu to ina mampososora párewámu,
agáiáná ina Kuweꞌikoꞌ ánáꞌmu haduduámu,
hadua tobaleilo.
Ia to ina mampososora párewámu.”
5 Roo onoꞌ,
PUEꞌ moánti Abura lao i rawa,
haneꞌi Nahángáꞌá,
“Mengoaꞌmokoꞌ i langiꞌ hai nupehukáꞌ moimbaꞌ betue.
Ba upui nuimbaꞌ?
Ina noꞌonoꞌ kahandaꞌraꞌ pemuleꞌámu duuꞌraꞌ tiꞌara piꞌi peisá raimbaꞌ.”
6 Abura mepoinálái i Pueꞌ Ala,
onoꞌ miꞌi haneꞌi narekeꞌ Pueꞌ Ala hadua tauna to manótó i peitáNa.
7 Hangko ionoꞌ,
nauliꞌ wopiꞌi PUEꞌ i hia,
“Kódóꞌ miꞌi PUEꞌ to moántikoꞌ hangko i kótá Uri i tampoꞌraꞌ toKasidimia bona tampoꞌ deꞌe Kuweꞌikoꞌ ina mewaliꞌ sosoramu.”
8 Agáiáná mekuneꞌ Abura,
nauliꞌ,
“Ó Pueꞌ ALA,
noumbá miꞌi kakuisána tampoꞌ deꞌe ina mewaliꞌ sosorangkuꞌ?”
9 Mehániꞌ PUEꞌ,
Nauliꞌ,
“Lao mai nuala hambaꞌa gapiꞌ lundara,
hambaꞌa bekeꞌ lundara hai hambaꞌa dimbá laki.
Upu-upuraꞌ iti to motinuwuꞌ tálu parena.
Noꞌonoꞌ woꞌo,
hangaa-ngaa lao mai nuala hambaꞌa kokou hai hambaꞌa manggebodoꞌ.”
10 Mewaliꞌ,
naꞌala mpuꞌu miꞌi Abura upu-upu binataꞌ iti bona napopenómbáheꞌ i PUEꞌ.
Hambaꞌa gapiꞌ,
hambaꞌa bekeꞌ hai hambaꞌa dimbá iti nabikáꞌ ntangaꞌheꞌ haneꞌi natereha rontere hambiká-hambiká napopombetoto.
Agáiáná tádáhi to rombaꞌa iti tiꞌara nabikáꞌ.
11 Roo onoꞌ,
bahangapa tádáhi to mandeꞌ bauꞌ mengkatóá ina mandeꞌheꞌ óntóꞌ binataꞌ iti,
agáiáná nawuraheꞌ Abura.
12 Hangko kaꞌina támpuna alo,
letaꞌ mposoꞌ miꞌi Abura.
Hangkaꞌ-hangkaꞌ perái modediꞌ,
hai rumihi ntepuꞌu kamalááꞌna Abura.
13 Hangko ionoꞌ,
nauliꞌ PUEꞌ i hia,
“Bona nuisá ntepuꞌu,
pemuleꞌámu ina toroꞌheꞌ nodo tauna to haweꞌ peá i tampoꞌraꞌ tauna ntániꞌna,
hai iba átuna parena kamaruena,
ina rapohawiꞌheꞌ hai rapopeahiahiꞌheꞌ i tampoꞌ iti.b
14 Agáiáná hangkani tempó,
ina Kuhukuheꞌ tauna to mampohawiꞌheꞌ,c
hai i kapohuꞌraꞌ pemuleꞌámu hangko i tampoꞌ iti,
ina moántiheꞌ handaꞌ párewá.d
15 Hai io,
ina matinuwuꞌkoꞌ,
hai ina matekoꞌ i katinda lalu.
16 Ane roomoheꞌ rapohawiꞌ iba lápina pemuleꞌámu,
ina mesuleꞌheꞌ huleꞌ i tampoꞌ deꞌe,
láwiꞌ deꞌe-deꞌe tiꞌara mani tempóna Kuwuraheꞌ toAmori hangko i tampoꞌ deꞌe.
Ane rumihi miꞌi kakadakeraꞌ,
hangko Kuhukuraheꞌ.”
17 Támpu miꞌi alo hai káindi miꞌi,
iaperái naita Abura hambuaꞌ tándi to merámbu hai hambuaꞌ huluꞌ to roreꞌ moliu i hiliꞌraꞌ binataꞌ to rabikáꞌ ntangaꞌ ininá.
18 Tempó iti miꞌi mototowi PUEꞌ i Abura,
Nauliꞌ,
“Kódóꞌ modándi i hio.
Ina Kuweꞌiheꞌ pemuleꞌámu upu-upu tampoꞌ deꞌe,
mantepuꞌu i parailiꞌna tampoꞌ Másiriꞌ haweꞌ-haweꞌ i uwai Epara.
19 Tepasuaꞌ woꞌo tampoꞌraꞌ toKeni,
toKenasi,
toKadamo,
20 toHeti,
toPerisi,
toRepaimi,
21 toAmori,
toKánáꞌá,
toGirigasi hai toEbusi.”e