Abura mampelae Loꞌoti
14
I tempóna Abura toroꞌ i Hebero,
ara bahangapa datu to mombealaheꞌ.
Ara iba datu to makuasaꞌ,
iamoheꞌ:
Kedolaome datu hangko i tampoꞌ Ela,
Amarape datu hangko i tampoꞌ Sinea,
Ario datu hangko i tampoꞌ Elasa,
hai Tidea datu hangko i tampoꞌ Goimi.
2 Kaꞌiba datu iti moewaꞌheꞌ lima datu iamoheꞌ:
Bera datu hangko i kótá Sodomo,
Bisa datu hangko i kótá Gumora,
Sinabi datu hangko i kótá Adma,
Semebe datu hangko i kótá Seboimi
hai hadua datu hangko i kótá Bela to rauliꞌ woꞌo Soa.
3-4 I lalu hampuloꞌ hai rompare kamaruena,
datu to limaheꞌ iti napárentáiheꞌ Datu Kedolaome,
agáiáná i pare kahampuloꞌ hai tálu,
láwiꞌ ina moewaꞌheꞌ Datu Kedolaome,
datu to lima iti mohintuwuꞌheꞌ morámpu surudadoꞌraꞌ i lembo Sidimi to deꞌe-deꞌe rauliꞌ tahiꞌ Mate.
5 Liu miꞌi hampare,
ia miꞌi i pare kahampuloꞌ hai iba,
lao miꞌi Datu Kedolaome hai tálu datu hampohintuwuꞌna ina mombeala.
Mehupeꞌheꞌ mombeala,
hai monangiheꞌ toRepaimi i wánuá Asetero-Kanai,
toSusimi i wánuá Hama,
toEmimia i Sawe-Kiriatai,
6 hai toHori i tampoꞌ Sei to mobuluꞌ-buluꞌ,
duuꞌraꞌ manangi.
ToHori iti radápáꞌheꞌ haweꞌ-haweꞌ i El-Parani i wiwi pádá loriꞌ.
7 Roo onoꞌ,
surudadoꞌ to modápáꞌheꞌ iti,
mesuleꞌheꞌ huleꞌ i Ene-Misipaꞌ,
to deꞌe-deꞌe rauliꞌ Kadesi.
Ionoꞌ miꞌi,
monangiheꞌ toAmaleꞌ haneꞌi mokuasaꞌiheꞌ upu-upu tampoꞌraꞌ,
hai monangiheꞌ woꞌo toAmori to toroꞌ i Haseso-Tama.
8 Hangko ionoꞌ,
lima datu to hangko i kótá Sodomo,
Gumora,
Adma,
Seboimi hai Bela mopatimamamoheꞌ surudadoꞌraꞌ i lembo Sidimi,
haneꞌiheꞌ mombeala.
9 Lima datu iti moewaꞌheꞌ iba datu to hangko i Ela,
Goimi,
Sinea hai Elasa.
10 I lembo iti,
handaꞌ taroboꞌ to kaladu to moꞌóntóꞌ taru to maiti.
I tempóraꞌ daturaꞌ toSodomo hai daturaꞌ toGumora melangka rapobitiheꞌ ewáliraꞌ,
ara to manawoꞌ i taroboꞌ iti.
To ntániꞌna melangkaheꞌ lao i buluꞌ.
11 Mewaliꞌ datu to iba iti menangiheꞌ,
onoꞌ miꞌi haneꞌi moántiheꞌ hinángkáꞌ párewáraꞌ toSodomo hai toGumora,
hai upu-upu pandeꞌraꞌ.
12 Tempó onoꞌ woꞌo,
Loꞌoti pinoánáꞌna Abura to toroꞌ i Sodomo,
ratawani raꞌánti woꞌo hingkakani hai párewána.
13 Ara hadua tauna to melangka hangko i pombealaꞌá iti lao mobuáꞌ i Abura apa to pewaliꞌ.
I tempó onoꞌ,
Abura toIberani iti,
toroꞌ hungkuꞌ i bahangapa kau to marumbu.
Pueꞌna kau to marumbu iti ia miꞌi hadua toAmori to rahangaꞌ Mamere.
Mamere hai halalunaheꞌ,
to rahangaꞌ Esekoloꞌ hai Ane,
hampohintuwuꞌna Abura.
14 Kanahádina Abura pinoánáꞌna ratawani miꞌi ewáliraꞌ,
ia morámpu upu-upu taunána to raꞌánáka i katoroꞌánab to mapánde mombeala.
Kahandaꞌraꞌ tálu átuna hampuloꞌ hai uwalu.
Roo onoꞌ,
laomoheꞌ modápáꞌ datu to iba iti haweꞌ-haweꞌ i kótá Daa.
15 I tangaꞌ káindi,
Abura mogáláꞌ-gáláꞌ taunána i lalu bahangapa taguna,
hai laomoheꞌ mampombealaꞌá ewáliraꞌ iti álána menangiheꞌ.
Roo onoꞌ,
radápáꞌheꞌ haweꞌ-haweꞌ i wánuá Hoba,
tándáꞌ i wongko kótá Damasiꞌ.
16 Abura hai taunánaheꞌ mamperampaꞌi huleꞌ hinángkáꞌ párewá to raperampaꞌi miꞌi ewáliraꞌ.
Loꞌoti hai párewána ralámbiꞌ woꞌo.
Noꞌonoꞌ woꞌo upu-upu towawine hai taunána ntániꞌna to ratawani.
Mekisedeꞌ mowátiꞌ Abura
17 Karoona Datu Kedolaome hai datu hampohintuwuꞌna nanangiheꞌ Abura,
mesuleꞌ miꞌi Abura lao i tampoꞌna.
I pesuleꞌna,
daturaꞌ toSodomo lao miꞌi modupaꞌ Abura i lembo Sawe to rauliꞌ woꞌo lembo Datu.
18 I tempó iti,
haweꞌ miꞌi woꞌo hadua datu to rahangaꞌ Mekisedeꞌ,
ia miꞌi datu i kótá Salec hai ia woꞌo tadulako menómbá i Pueꞌ Ala to i Surugáꞌ.
Mekisedeꞌ iti mampoántiá Abura rótiꞌ hai anggoroꞌ,
19 nauliꞌ:
“Nawátiꞌkoꞌ Pueꞌ Ala to i Surugáꞌd
to mampopewaliꞌ duniáꞌ hai upu-upu óntóꞌna.
20 Tetóiá miꞌi Pueꞌ Ala to i Surugáꞌ
to mampopenangikoꞌ hangko i ewálimu.”
Roo onoꞌ,
Abura mohuhuꞌ i Mekisedeꞌ hanggáláꞌ hampuloꞌ hangko i upu-upu párewá to napakaꞌala huleꞌ hangko i ewáliraꞌ.
21 Roo onoꞌ,
daturaꞌ toSodomo molaluita i Abura,
nauliꞌ,
“Nuala miꞌi párewá to nuperampaꞌi iti,
agáiáná taunángkuꞌ nupopasuleꞌáꞌaꞌ.”
22 Agáiáná nahániki Abura,
“Modándimoꞌ i lindoꞌna Pueꞌ Ala to i Surugáꞌ,
to mampopewaliꞌ duniáꞌ hai upu-upu óntóꞌna.
23 Tiꞌaraꞌaꞌ ina moala ba apa-apa hangko i hio.
Mogalo riꞌi hangkau peá lero ba petakaꞌ sandale,
tiꞌaraꞌaꞌ pebáiꞌ moala bona ineeꞌ nuꞌuliꞌ ánti kaꞌiona haneꞌiaꞌ mewaliꞌ pebuku.
24 Tiꞌara kuꞌundeꞌ moala ba apa-apa bona kupopueꞌ haduduángkuꞌ.
Bateꞌna peá kutarima apa to raꞌandeꞌ miꞌi taunángkuꞌ.
Agáiáná rángángkuꞌ to hampohintuwuꞌkuꞌheꞌ,
ia miꞌi Ane,
Esekoloꞌ hai Mamere,
kupembiáꞌ bona peisáheꞌ moala gáláꞌraꞌ.”