Abura hai Loꞌoti mogááꞌ
13
Mewaliꞌ Abura pohuꞌ hangko i tampoꞌ Másiriꞌ mesuleꞌ lao i tampoꞌ Negeꞌ to ara i tampoꞌ Kánáꞌá tándáꞌ i wóiꞌ.
Toinána hai Loꞌoti meuláꞌheꞌ woꞌo,
hai upu-upu to ara i hira raꞌánti woꞌo.
2 I tempó onoꞌ,
pebuku ntepuꞌu miꞌi Abura;
handaꞌ dimbána,
bekeꞌ,
gapiꞌ hai handaꞌ woꞌo peráꞌ hai buláwána.
3 Hangko i tampoꞌ Negeꞌ,
Abura melimbá-limbá haneꞌi haweꞌ i wánuá Beteli,
hai lao i hambuaꞌ katoroꞌá i hiliꞌna wánuá Beteli hai kótá Ai.
Hangkoia ia moaró bambaruꞌna ionoꞌ
4 hai paintuá popenómbá.a
Ionoꞌ ia menómbá i PUEꞌ.
5 Loꞌoti,
to meuláꞌ i Abura,
handaꞌ woꞌo dimbána,
bekeꞌ hai gapiꞌna.
Handaꞌ woꞌo bambaruꞌna hai taunána.
6 Agáiáná kamaeláꞌna tampoꞌ iti tiꞌara gáná i hira rodua,
láwiꞌ handaꞌ ntepuꞌu binataꞌraꞌ.
7 Onoꞌ miꞌi haneꞌi topoewuraꞌ Abura hai Loꞌoti mohioroheꞌ.
Tempó iti,
toKánáꞌá hai toPerisi toroꞌ maniheꞌ i tampoꞌ iti.
8 Mewaliꞌ Abura molaluita miꞌi i Loꞌoti,
nauliꞌ,
“Kitaꞌ deꞌe topohalalukeꞌ.
Tiꞌara maroꞌa ane topoewuntaꞌ mohioroheꞌ.
9 Rángina miꞌi mogááꞌkeꞌ.
Tiꞌara paꞌi tampoꞌ deꞌe maeláꞌ?
Mewaliꞌ nupileꞌi iumbá to nuꞌundeꞌ.
Ane io lao tándáꞌ i kabeoꞌ,
kódóꞌ ina laoaꞌ tándáꞌ i kuáná.
Ane io lao tándáꞌ i kuáná,
kódóꞌ hangaa-ngaa laoaꞌ tándáꞌ i kabeoꞌ.”
10 Loꞌoti mampetiro humalele tampoꞌ iti,
hai naita kamaruduꞌna tampoꞌ i lembona uwai Iarade haweꞌ-haweꞌ i kótá Soa.
Ionoꞌ handaꞌ uwaina,
naita nodo hinoena PUEꞌ hai nodo tampoꞌ Másiriꞌ.
Iti mewaliꞌ hangko tiꞌara mani PUEꞌ mogero kótá Sodomo hai Gumora.
11 Kaupuána Loꞌoti mopileꞌi upu-upu tampoꞌ i lembona uwai Iarade haneꞌi melimbá lao tándáꞌ i mata alo.
Noꞌonoꞌ miꞌi pogááꞌraꞌ topohalalu iti.
12 Abura toroꞌ oaꞌ i tampoꞌ Kánáꞌá,
agáiáná Loꞌoti moaró bambaruꞌna i lembo hungkuꞌ i kótá Sodomo hai i kótá-kótá ntániꞌna.
13 Kótá Sodomo iti rakatoroꞌi tauna to madósá ntepuꞌuheꞌ woꞌo i peitána PUEꞌ láwiꞌ kadake ntepuꞌu bábehiáraꞌ.
Abura melimbá lao i Hebero
14 I kapohuꞌna Loꞌoti,
PUEꞌ mongkóráꞌ i Abura,
Nauliꞌ,
“Hangko i tampoꞌ to nupeángkáꞌi deꞌe,
nupetiro ngkaraoꞌ mantoleli.
15 Upu-upu tampoꞌ to nuita deꞌe ina Kuweꞌikoꞌ mewaliꞌ gáláꞌmu hai gáláꞌraꞌ pemuleꞌámu duuꞌna i rue-ruena.
16 Ina Kupahandaꞌ pemuleꞌámu nodo kahandaꞌna awu tampoꞌ i duniáꞌ to tiꞌara peisá raimbaꞌ.
Ane rápáꞌna ara to peisá moimbaꞌ awu tampoꞌ,
hangaa-ngaa pemuleꞌámu woꞌo peisá raimbaꞌ.
17 Lao miꞌi nulumaohi nupeita humalele tampoꞌ deꞌe,
láwiꞌ iti to ina Kuweꞌikoꞌ.”
18 Hangko ionoꞌ,
nalimbá miꞌi Abura pobambaruꞌána hungkuꞌ i kau to marumbu hungkuꞌ i kótá Hebero.
Kau iti káuna hadua tauna to rahangaꞌ Mamereb Ionoꞌ ia mampopombeusu-usu watu moaró hambuaꞌ paintuá popenómbá i PUEꞌ.