Abura nakióꞌ Pueꞌ Ala
12
Mongkóráꞌ miꞌi PUEꞌ i Abura,a
Nauliꞌ,
“Pohuꞌmokoꞌ,
nupálehi miꞌi tampoꞌmu,
tinámu hai támbina umámu,
hai laomokoꞌ i tampoꞌ to ina Kutudeꞌákoꞌ.
2 Ina Kupahandaꞌ pemuleꞌámu
duuꞌna mewaliꞌkou hambuaꞌ kadatuá to mahile.
Ina Kuwátiꞌkoꞌ,
hai ina Kupomahile hangaꞌmu
bona mewaliꞌkoꞌ hambuaꞌ pewátiꞌ i upu-upu tauna.
3 Ina Kuwátiꞌheꞌ tauna to mowátiꞌkoꞌ,
hai ina Kuhukuheꞌ tauna to mampopeahiahiꞌkoꞌ.
Ánti kaꞌiona,
ina Kuwátiꞌ upu-upu tauna i humalele duniáꞌ.”b
4-5 Mewaliꞌ pohuꞌ mpuꞌu miꞌi Abura hangko i kótá Hara,
hiolaꞌ hai hawaꞌna PUEꞌ.
I tempó onoꞌ,
tinuwuꞌna Abura pitu puloꞌna hai lima parena.
Ia lao i tampoꞌ Kánáꞌá hingkakani hai toinána hai Loꞌoti pinoánáꞌna.
Naꞌánti woꞌo upu-upu párewána hai upu-upuheꞌ hawiꞌna to nalámbiꞌ i kótá Hara.
Kahaweꞌraꞌ i tampoꞌ Kánáꞌá,
6 mopaliliuheꞌ polumaoraꞌ duuꞌraꞌ haweꞌ i kótá Sikeꞌ.
Ionoꞌ mengkarooheꞌ i hampóꞌá kau to marumbu i More.
I tempó iti,
toKánáꞌá toroꞌ maniheꞌ i tampoꞌ iti.
7 Tempó onoꞌ,
PUEꞌ mampatongawaꞌ miꞌi i Abura haneꞌi Nauliꞌ,
“Tampoꞌ deꞌe ina Kuweꞌiheꞌ pemuleꞌámu.”
Onoꞌ miꞌi haneꞌi Abura moaró hambuaꞌ paintuá popenómbá i PUEꞌ.
8 Hangko ionoꞌ,
rapaliliu wopiꞌi polumaoraꞌ lao i tampoꞌ to mobuluꞌ-buluꞌ tándáꞌ i mata alo wánuá Beteli,
haneꞌi ionoꞌ ia moaró bambaruꞌ to rabábehi hangko i koliꞌ binataꞌ.
Hangko i pobambaruꞌána iti,
Beteli ara tándáꞌ i katámpuá alo,
hai kótá Ai ara tándáꞌ i mata alo.
Ionoꞌ napopombeusu-usu miꞌi watu moaró hambuaꞌ paintuá popenómbá,
haneꞌi menómbá i PUEꞌ.
9 Roo onoꞌ,
pohuꞌ wopiꞌi ina lao i tampoꞌ Negeꞌ tándáꞌ i wóiꞌ.
Abura i tampoꞌ Másiriꞌ
10 I tempó iti,
tampoꞌ Kánáꞌá narampe rimi,
onoꞌ haneꞌi Abura hantámbi melimbá wopaheꞌ lao tándáꞌ i wóiꞌ i tampoꞌ Másiriꞌ bona toroꞌheꞌ ionoꞌ láwiꞌ rumihi ntepuꞌu rimi iti.
11 Ina haweꞌmoheꞌ i tampoꞌ Másiriꞌ,
molaluita miꞌi Abura i Sarai toinána,
nauliꞌ,
“Io to malásáꞌ ntepuꞌukoꞌ.
12 Ane raitakoꞌ toMásiriꞌ,
bateꞌna ina rauliꞌkoꞌ toinángkuꞌ,
haneꞌi ina rapapateaꞌ bona raꞌalakoꞌ.
13 Mewaliꞌ kupembiáꞌ bona nuhángáꞌáheꞌ ádingkuꞌ pekoꞌ.
Ane nuꞌuliꞌ noꞌonoꞌ,
ina rapatodáhiaꞌ tueꞌ hai ina rabábehi to maroꞌa i kódóꞌ ánti kaꞌiona.”
14 I kahaweꞌraꞌ i tampoꞌ Másiriꞌ,
raita toMásiriꞌ kamalásáꞌna Sarai.
15 Karaitána topobágóꞌna Piraoꞌ,
laomoheꞌ mopahaweꞌ i Piraoꞌ daturaꞌc kaꞌárána to malásáꞌ,
onoꞌ miꞌi haneꞌi Piraoꞌ mampopeala lao i támbina ina napohambokoá.
16 Ánti kaSaraina,
Piraoꞌ maroꞌa ntepuꞌu laluna i Abura,
onoꞌ miꞌi haneꞌi handaꞌ to napeweꞌi i hia,
ia miꞌi hawiꞌ,
dimbá,
bekeꞌ,
gapiꞌ,
kalide hai untá.
17 Agáiáná ánti poalana Sarai,
PUEꞌ mopaꞌara mampopengaa hakiꞌ to meriringkuꞌi i Piraoꞌ hai i upu-upu tauna to toroꞌ i támbina.
18 Mewaliꞌ Piraoꞌ mokióꞌ miꞌi Abura,
nahángáꞌá,
“Apa tunggáiámu haneꞌi nubábehi noꞌonoꞌ i kódóꞌ?
Moapa riꞌi haneꞌi tiꞌaraꞌaꞌ nuhángáꞌá kaꞌiana toinámu?
19 Moapa riꞌi haneꞌi nuꞌuliꞌ ádimu?
Ánti bábehiámu iti,
onoꞌ haneꞌi kuala ina mewaliꞌ toinángkuꞌ.
Masalaꞌ ntepuꞌukoꞌ!
Deꞌe miꞌi toinámu.
Nuala miꞌi hai pohuꞌmokou!”
20 Roo onoꞌ,
Piraoꞌ mopárentá bahangapa topobágóꞌna bona lao mowawa Abura hai toinána hangko i tampoꞌ Másiriꞌ hingkakani hai upu-upu to ara i hia.