Támbi peántóꞌá i Bábeli
11
Rungu-runguna tauna i humalele duniáꞌ,
hangaa peá básáraꞌ.
2 I tempóraꞌ melimbá lao tándáꞌ i mata alo,
teduuꞌheꞌ i hambuaꞌ ngamba i tampoꞌ Bábelia hai toroꞌheꞌ ionoꞌ.
3 Hangkani tempó,
molaluitaheꞌ hadua hai hadua,
rauliꞌ,
“Maroꞌa ane tabábehi watu telá hai tatunu leháꞌ-leháꞌ bona matuꞌa.”
Mobábehi mpuꞌuheꞌ watu telá,b
hai rapakeꞌ taru to maiti rapopodaiꞌ.
4 Roo onoꞌ,
mangkaliwo wopaheꞌ,
rauliꞌ,
“Maroꞌa ntepuꞌu ane taꞌaró hambuaꞌ kótá,
hai taꞌaró woꞌo hambuaꞌ támbi peántóꞌá to mahile hai tapamapángkáꞌ duuꞌna haweꞌ i langiꞌ.
Hangaa-ngaa tabábehi noꞌonoꞌ bona tebámbári kamahilena hangaꞌtaꞌ hai bona tiꞌarakeꞌ tegááꞌ-gááꞌ i humalele duniáꞌ.”
5 Agáiáná tangaꞌraꞌ moaró kótá hai támbi peántóꞌá iti,
mendáulu miꞌi PUEꞌ mampeita apa to rabábehi,
6 haneꞌi Nauliꞌ,
“Tauna deꞌe hantina hai hangaa peá básáraꞌ.
Demiꞌe hangko pantepuꞌuána apa to ina rabábehi.
Ane marue-rueheꞌ mobágóꞌ nodeꞌe,
apa peá to ratunggái ina mewaliꞌ.
7 Maroꞌa ane mendáuluKeꞌ lao mampopontaniꞌ-ntaniꞌ básáraꞌ bona tiꞌarapoheꞌ mombeisá básá hadua hai hadua.”
8-9 Mewaliꞌ Napopontaniꞌ-ntaniꞌ mpuꞌu miꞌi básáraꞌ duuꞌna mengkarooheꞌ moaró kótá iti.
Onoꞌ miꞌi haneꞌi kótá iti rahangaꞌ Bábeli,
to ina hibali hai “wuli”,
hai mahawuꞌheꞌ tauna i humalele duniáꞌ.
Pemuleꞌánaheꞌ Semuꞌ
10 Deꞌe miꞌi daritakáná pemuleꞌánaheꞌ Semuꞌ.
Liu miꞌi rompare hangko i kanalábóꞌána uwai duniáꞌ,
Semuꞌ momuleáka hadua tobaleilo to rahangaꞌ Aripasa.
I tempó iti,
tinuwuꞌna Semuꞌ hangatu miꞌi parena.
11 Hangko ionoꞌ,
Semuꞌ tueꞌ mani lima átuna parena,
hai moánáꞌ maniheꞌ bahangapa ánáꞌraꞌ tobaleilo hai towawine.
12 Magáná miꞌi tinuwuꞌna Aripasa tálu puloꞌna hai lima parena,
moánáꞌmoheꞌ hadua tobaleilo to rahangaꞌ Sela.
13 Hangko ionoꞌ,
Aripasa tueꞌ mani iba átuna hai tálu parena,
hai moánáꞌ maniheꞌ bahangapa ánáꞌraꞌ tobaleilo hai towawine.
14 Magáná miꞌi tinuwuꞌna Sela tálu puloꞌna parena,
moánáꞌmoheꞌ hadua tobaleilo to rahangaꞌ Eberi.c
15 Hangko ionoꞌ,
Sela tueꞌ mani iba átuna hai tálu parena,
hai moánáꞌ maniheꞌ bahangapa ánáꞌraꞌ tobaleilo hai towawine.
16 Magáná miꞌi tinuwuꞌna Eberi tálu puloꞌna hai iba parena,
moánáꞌmoheꞌ hadua tobaleilo to rahangaꞌ Peleꞌ.
17 Hangko ionoꞌ,
Eberi tueꞌ mani iba átuna tálu puloꞌna parena,
hai moánáꞌ maniheꞌ bahangapa ánáꞌraꞌ tobaleilo hai towawine.
18 Magáná miꞌi tinuwuꞌna Peleꞌ tálu puloꞌna parena,
moánáꞌmoheꞌ hadua tobaleilo to rahangaꞌ Rehu.
19 Hangko ionoꞌ,
Peleꞌ tueꞌ mani rongatu hai hahioꞌ parena,
hai moánáꞌ maniheꞌ tobaleilo hai towawine.
20 Magáná miꞌi tinuwuꞌna Rehu tálu puloꞌna hai rompare,
moánáꞌmoheꞌ hadua tobaleilo to rahangaꞌ Seru.
21 Hangko ionoꞌ,
Rehu tueꞌ mani rongatu hai pitu parena,
hai moánáꞌ maniheꞌ bahangapa ánáꞌraꞌ tobaleilo hai towawine.
22 Magáná miꞌi tinuwuꞌna Seru tálu puloꞌna parena,
moánáꞌmoheꞌ hadua tobaleilo to rahangaꞌ Nahori.
23 Hangko ionoꞌ,
Seru tueꞌ mani rongatu parena,
hai moánáꞌ maniheꞌ bahangapa ánáꞌraꞌ tobaleilo hai towawine.
24 Magáná miꞌi tinuwuꞌna Nahori rompuloꞌ hai hahioꞌ parena,
momuleáka miꞌi hadua tobaleilo to rahangaꞌ Tera.
25 Hangko ionoꞌ,
Nahori tueꞌ mani hangatu hampuloꞌ hai hahioꞌ parena,
hai moánáꞌ maniheꞌ bahangapa ánáꞌraꞌ tobaleilo hai towawine.
26 Liu miꞌi tinuwuꞌna Tera pitu puloꞌna parena,
moánáꞌmoheꞌ tálu tobaleilo,
hangaꞌraꞌ iamoheꞌ Abura,d
Nahori hai Hara.
Pemuleꞌánaheꞌ Tera
27 Deꞌe miꞌi daritakáná pemuleꞌánaheꞌ Tera.
Tera momuleáka Abura,
Nahori hai Hara.
Hara momuleáka hadua tobaleilo to rahangaꞌ Loꞌoti.
28 Tueꞌ mani umána,
Hara mate i tampoꞌ kabubuána waheꞌna,
i kótá Uri i tampoꞌraꞌ toKasidimi.e
29 Abura mampotoina Sarai,
hai Nahori mampotoina Mika ánáꞌna Hara.
Ara mani ánáꞌna Hara,
hangaꞌna Isika.
30 Sarai iti tiꞌara peisá moánáꞌ láwiꞌ lalo.