Burahima mohóló tampoꞌ popatawuána Sáráꞌ
23
Magáná miꞌi tinuwuꞌna Sáráꞌ hangatu rompuloꞌ hai pitu parena,
2 hangko mate riꞌi i tampoꞌ Kánáꞌá i kótá Kiria-Aba to rauliꞌ woꞌo Hebero.
Wiora ntepuꞌu laluna Burahima i kamatena toinána,
hai moteriahi.
3 Roo onoꞌ,
napálehi miꞌi hampaiꞌ Sáráꞌ toinána to tangaꞌna rapowátá,
haneꞌi lao i toHeti to toroꞌ i tampoꞌ iti,
4 nauliꞌ,
“Kódóꞌ deꞌe tohaweꞌ peaꞌ to toroꞌ i oloꞌmi.
Maiaꞌ wongkódóꞌá membiáꞌ tampoꞌ ina kupopatawui toinángkuꞌ.”
5 Mehániꞌheꞌ rauliꞌ,
6 “Tuá,
nupehádingi.
Kiádáikoꞌ láwiꞌ io miꞌi hadua tadulako to makuasaꞌ i oloꞌkiꞌ.
Mewaliꞌ góeꞌ lalungkiꞌ ane nupileꞌi popatawuá to maroꞌa ntepuꞌu bona peisá nupopatawui toinámu ionoꞌ.
Tiꞌara ara tauna to tiꞌara mampokana toinámu ratawu i popatawuána.”
7 Roo onoꞌ,
motóngkóꞌ miꞌi Burahima i lindoꞌraꞌ toHeti,
pueꞌ tampoꞌ,
8 haneꞌi nauliꞌ,
“Ane nipokana pembiáꞌkuꞌ,
toinángkuꞌ ina kutawu ieneꞌ.
Kupembiáꞌ tulungi bona nipembiáꞌáꞌaꞌ i Epero ánáꞌna Soha,
9 bona napobaluꞌáꞌaꞌ hambuaꞌ balamba watu i Mapela to ara i wiwi hinoena.
Hólóna tampoꞌ iti ina kubaiari bukeꞌ-bukeꞌ i lindoꞌmi bona mewaliꞌ tampoꞌkuꞌ to ina kipopatawui.”
10 Hangko ionoꞌ,
Epero,
to tangaꞌna mehoda i oloꞌraꞌ toHeti hungkuꞌ i babaꞌá bente kótá,
mohániki Burahima i lindoꞌraꞌ tauna iti,
nauliꞌ,
11 “Tuá,
tiꞌara paraluu nuhóló tampoꞌ iti,
láwiꞌ hinoengkuꞌ hai balamba to ara ionoꞌ kuhuhuꞌ i hio bona nupotawui toinámu.
Halalungkuꞌheꞌ deꞌe to mewaliꞌ sabiꞌkuꞌ.”
12 Mewaliꞌ Burahima motóngkóꞌ wopiꞌi i lindoꞌraꞌ toHeti,
13 haneꞌi nauliꞌ i Epero bona rahádi upu-upu,
“Kupembiáꞌ bona nipehádingi laluitangkuꞌ deꞌe.
Ina kubaiari hólóna hinoemu.
Kupembiáꞌ hangaa-ngaa nutarima dóiꞌ hólóna tampoꞌ iti,
bona toinángkuꞌ peisá kutawu ionoꞌ.”
14 Mehániꞌ Epero,
15 “Tuá,
nupehádingi.
Halimboꞌ tampoꞌ iti hólóna iba peá átuna dóiꞌ peráꞌ.
Agáiáná tapoapa paꞌi dóiꞌ iti i kitaꞌ rodua.
Nutawu miꞌi ionoꞌ toinámu.”
16 Burahima mampokana hólóna iti.
Naimbaꞌ miꞌi kahandaꞌna dóiꞌ hintotoꞌ hai panguliꞌna Epero,
ia miꞌi iba átuna dóiꞌ peráꞌ.
Dóiꞌ iti ratimbá i timbánga to rapakeꞌ topobaluꞌ-baluꞌ,
haneꞌi nabaiari i Epero i lindoꞌraꞌ upu-upu toHeti to ara ionoꞌ.
17 Mewaliꞌ tampoꞌna Epero i Mapela,
to tándáꞌ i mata alo i Mamere,
mewaliꞌ miꞌi gáláꞌna Burahima.
Tampoꞌ iti tepasuaꞌ hinoena,
balamba,
hai upu-upu kau to ara ionoꞌ,
raweꞌi Burahima.
18 Upu-upu toHeti to moromu-romuheꞌ hungkuꞌ i babaꞌá bente kótá iti,
mosabikiheꞌ kanahólóna Burahima tampoꞌ iti.