Isakiꞌ rapampeliꞌá to ina mewaliꞌ toinána
24
Burahima matoama ntepuꞌu miꞌi,
hai nawátiꞌ PUEꞌ i pákáꞌ-pákáꞌna.
2 Hangkani tempó,
Burahima molaluita i hawiꞌna to rapoinálái ntepuꞌua to mokádipurá upu-upu párewána,
nauliꞌ,
“Nuwoli taemu i páꞌángkuꞌ,
3 hai modándikoꞌ i lalu hangaꞌna PUEꞌ,
pueꞌna langiꞌ hai tampoꞌ hai upu-upu óntóꞌna,
bona ánáꞌkuꞌ Isakiꞌ ineeꞌ nupampeliꞌá to ina mewaliꞌ toinána i tampoꞌ Kánáꞌá deꞌe.
4 Ngkáliꞌna riꞌi,
hangaa-ngaa laokoꞌ i tampoꞌ kabubuána waheꞌkuꞌ,
nupampeliꞌá hadua ánáꞌntawine hangko i oloꞌraꞌ halalungkuꞌ to ina mewaliꞌ toinána ánáꞌkuꞌ Isakiꞌ.”
5 Mekuneꞌ hawiꞌna,
“Tuángkuꞌ,
noumbá ane towawine iti tiꞌara mau meuláꞌ i kódóꞌ mai ieneꞌ?
Ba kuánti peá ánáꞌmu lao i tampoꞌ kabubuána waheꞌmu?”
6 Agáiáná nahániki Burahima,
“Ineeꞌ nuánti ánáꞌkuꞌ lao ionoꞌ!
7 PUEꞌ,
pueꞌna langiꞌ,
Ia miꞌi to moántiaꞌ mai hangko i támbina umángkuꞌ hai hangko i tampoꞌraꞌ halalungkuꞌ,
hai modándi miꞌi i kódóꞌ node:
‘Ina Kupeweꞌi tampoꞌ deꞌe i pemuleꞌámuheꞌ.’
Mewaliꞌ,
Ia woꞌo ina mohuoꞌ malaꞌekaNa mampoioruákoꞌ bona nulámbiꞌ hadua towawine ionoꞌ to hintotoꞌ napotoina ánáꞌkuꞌ.
8 Agáiáná ane ánáꞌntawine iti tiꞌara mau meuláꞌ mai ieneꞌ,
tekábáhámokoꞌ hangko i dándimu deꞌe i kódóꞌ.
Kehapiꞌ noumbá miꞌi,
ánáꞌkuꞌ tiꞌara kupaliu nuánti lao ionoꞌ.”
9 Mewaliꞌ hawiꞌna mowoli taena i páꞌána Burahima,
hai modándi ina mampeuláꞌi apa to napehuoꞌá pueꞌna i hia.
10 Roo onoꞌ,
nakádipurá miꞌi hawiꞌ iti hampuloꞌ báꞌána untá hai párewána pueꞌna to masuliꞌ,
haneꞌiheꞌ pohuꞌ lao i wánuána Nahorib to karaoꞌ i tampoꞌ Árá-Mesopotamia.
11 Bahanoumbá alona molumao,
haweꞌ mpuꞌumoheꞌ i wánuána Nahori.
Kahaweꞌraꞌ ionoꞌ,
kalumbaꞌ miꞌi,
tempóraꞌ towawine lao mantámbuꞌ i tibubuꞌ.
I tempó iti,
napopengkaroo miꞌi untána i rawa kótá hungkuꞌ i tibubuꞌ.
12 Roo onoꞌ,
mekakae miꞌi hawiꞌ iti,
nauliꞌ,
“PUEꞌ to napenómbái pueꞌkuꞌ Burahima,
Nutulungiaꞌ wongkódóꞌá bona alo deꞌe kulámbiꞌ tunggáiángkuꞌ.
Kupembiáꞌ bona Nupatongawaꞌ ahiꞌMu i pueꞌkuꞌ Burahima.
13 Nuitaꞌaꞌ meángkáꞌ i hintáiꞌ tibubuꞌ deꞌe,
hai ánáꞌntawine hangko i wánuá ina maiheꞌ mantámbuꞌ i tibubuꞌ deꞌe.
14 Mewaliꞌ,
ane haweꞌ hadua ánáꞌntawine,
ina kuꞌuliꞌ,
‘Nutulungiaꞌ.
Nukándó mai uwai to i gumbaꞌmu bona mainuaꞌ.’
Ane nahánikiaꞌ node:
‘Mainukoꞌ,
hai upu-upu untámu ina kupopainu woꞌo,’
ina kuisá kaꞌiana to Nupileꞌi bona napotoina Isakiꞌ huoꞌáMu,
hai ina kuisá woꞌo kamaꞌahiꞌMu i pueꞌkuꞌ Burahima.”
15-16 Tangaꞌna mani mekakae,
haweꞌ miꞌi hadua ánáꞌntawine to malásáꞌ ntepuꞌu to tiꞌara mani moisá tobaleilo.
Hangaꞌna Ribeka.
Ribeka iti ueꞌna Burahima,
ánáꞌna Betueli,
hai tosaena Betueli iamoheꞌ Mika hai Nahori wutuꞌna Burahima.
I tempó iti,
Ribeka mopáháꞌá gumbaꞌ uwai lao i tibubuꞌ iti.
Kahaweꞌna ionoꞌ,
ia moꞌóntóki miꞌi gumbaꞌna haneꞌi ina mesuleꞌ miꞌi.
17 Nagagu miꞌi hawiꞌna Burahima lao mohungkuki ánáꞌntawine iti,
nauliꞌ,
“Ánáꞌntawine,
membiáꞌaꞌ tulungi.
Nupoweꞌiaꞌ uwai to i gumbaꞌmu,
ina kuinu hantódiꞌ.”
18 Mehániꞌ Ribeka,
“Tuá,
mainukeꞌ.”
Kásáliu napopendáulu gumbaꞌna hangko i wángána haneꞌi mepopainu.
19 Roo miꞌi mepopainu,
nauliꞌ ánáꞌntawine iti,
“Tuá,
ina kupopainuheꞌ woꞌo deꞌe untámu duuꞌna raporái.”
20 Hangko ionoꞌ,
hawiáꞌ miꞌi nakándó uwai napopoꞌóntóki dulá,
mampopainuheꞌ untá.
Roo onoꞌ,
melangka wopiꞌi lao i tibubuꞌ moꞌóntóki gumbaꞌna,
hai mampopainuheꞌ untá iti duuꞌna raporái upu-upu.
21 Hawiꞌna Burahima mopailalu apa to nabábehi ánáꞌntawine iti,
láwiꞌ napoinao naisá ane PUEꞌ ina mobukeki tunggáiána.
22 Roomoheꞌ mainu upu-upu untána,
hawiꞌna Burahima moala dali hai kálá to matimi hai masuliꞌ hólóna.
Dali buláwá napatakaꞌ i hilóna Ribeka,
hai rombuaꞌ kálá buláwá napusaꞌ i taena,c
23 haneꞌi nauliꞌ,
“Heáná umámu?
Ba peisáꞌangkaiꞌ hambengi i támbina umámu?”
24 Mehániꞌ Ribeka,
“Umángkuꞌ Betueli,
ánáꞌraꞌ Nahori hai Mika.
25 Tuá,
i támbingkiꞌ aranto kahambengiá,
hai ara woꞌo pandeꞌ binataꞌ.”
26 Roo onoꞌ,
hawiꞌ iti molingkudu motóngkóꞌ haweꞌ i tampoꞌ menómbá i PUEꞌ,
nauliꞌ,
27 “KutóiáKoꞌ PUEꞌ to napenómbái pueꞌkuꞌ Burahima.
Tongawaꞌ miꞌi kamaꞌahiꞌMu to Nupatongawaꞌ oaꞌ i pueꞌkuꞌ!
Io to moteteꞌaꞌ haneꞌiaꞌ haweꞌ i halaluna pueꞌkuꞌ to toroꞌ ieneꞌ.”
28 Hangko ionoꞌ,
melangka miꞌi Ribeka lao i támbina inána,
hai napolaluita apa to mewaliꞌ.
29-30 Wutuꞌna Ribeka,
hangaꞌna Lábá.
Kanahádina Lábá laluitana ádina hai kanaitána ara woꞌo dali hai kálá buláwá i taena,
kásáliu mesuwuꞌ hangko i támbiraꞌ mogagu mampohidupaꞌá hawiꞌna Burahima to meángkáꞌ mani i hintáiꞌraꞌ untána hungkuꞌ i tibubuꞌ.
31 Nauliꞌ Lábá,
“Tuá to nawátiꞌ PUEꞌ!
Ineeꞌkeꞌ ieneꞌ i rawa.
Maikeꞌ,
laokeꞌ i támbi.
Kipatimama miꞌi lintuꞌ to peisá takatoroꞌi,
hai kipatimama miꞌi woꞌo katoroꞌáraꞌ untántaꞌ.”
32 Mewaliꞌ,
meuláꞌ miꞌi hawiꞌna Burahima i Lábá.
Kahaweꞌraꞌ i támbina,
natáurá miꞌi Lábá inántiraꞌ untá,
haneꞌi moala rumpuꞌ napopopaꞌandeꞌáheꞌ untá iti.
Roo onoꞌ,
naꞌala miꞌi uwai napopobahoꞌi bitina hawiꞌ iti hai taunánaheꞌ.
33 Hangko ionoꞌ,
rahuhuꞌáheꞌ pandeꞌraꞌ,
agáiáná hawiꞌna Burahima molaluita,
nauliꞌ,
“Tiꞌara maniaꞌ ina mandeꞌ ane tiꞌara mani kupohaweꞌ tunggáiángkuꞌ mai ieneꞌ.”
Nauliꞌ Lábá,
“Maroꞌa ane tapolaluita miꞌi deꞌe-deꞌe.”
34 Mewaliꞌ,
natepuꞌu miꞌi hawiꞌ iti molaluita,
nauliꞌ,
“Kódóꞌ miꞌi deꞌe hawiꞌna Burahima.
35 PUEꞌ Ala mowátiꞌ ntepuꞌu miꞌi pueꞌkuꞌ Burahima haneꞌi mewaliꞌ topebuku.
Naweꞌi PUEꞌ handaꞌ dimbána,
bekeꞌ,
gapiꞌ,
untá,
hai kalide.
Handaꞌ woꞌo peráꞌ,
buláwá hai hawiꞌnaheꞌ tobaleilo hai towawine.
36 I kamatoinána miꞌi,
Sáráꞌ toinána moánáꞌ hadua ánángkóiꞌ tobaleilo.
Upu-upu párewána pueꞌkuꞌ napososora ánáꞌna iti.
37 Hai nahuoꞌaꞌ modándi bona kupeuláꞌi hawaꞌna,
nauliꞌ,
‘Ineeꞌkoꞌ mopileꞌi to ina mewaliꞌ toinána ánáꞌkuꞌ hangko i oloꞌraꞌ ánáꞌntawine toKánáꞌá,
i tampoꞌ to kukatoroꞌi deꞌe.
38 Ngkáliꞌna riꞌi hangaa-ngaa laokoꞌ i támbina umángkuꞌ hai halalungkuꞌheꞌ,
hai nuala hadua ánáꞌntawine to ina napotoina ánáꞌkuꞌ.’
39 Haneꞌi kupekuneꞌ i hia,
‘Noumbá ane tiꞌarai mau towawine iti meuláꞌ i kódóꞌ?’
40 Nahániki,
‘PUEꞌ to kupengkoruꞌi ina mohuoꞌ malaꞌekaNa mamporángákoꞌ bona nulámbiꞌ tunggáiámu.
Ina molámbiꞌkoꞌ to ina mewaliꞌ toinána ánáꞌkuꞌ hangko i oloꞌraꞌ halalungkuꞌ,
ia miꞌi pemuleꞌána umángkuꞌ.
41 Ane haweꞌmokoꞌ ionoꞌ,
hai tiꞌaraheꞌ mau mampeweꞌi ánáꞌraꞌ,
tekábáhámokoꞌ hangko i dándimu iti.’
42 Kahaweꞌkuꞌ i tibubuꞌ ininá,
mekakaeaꞌ i lalungkuꞌ,
kuꞌuliꞌ,
‘Ó PUEꞌ to napenómbái pueꞌkuꞌ Burahima,
kupembiáꞌ i Hio bona Nupopewaliꞌ apa tunggáiána polumaongkuꞌ mai ieneꞌ.
43 Meángkáꞌaꞌ i hintáiꞌ tibubuꞌ deꞌe.
Ane haweꞌ hadua ánáꞌntawine to mai mantámbuꞌ,
ina kupembiáꞌ i hia bona naweꞌiaꞌ uwai kuinu.
44 PUEꞌ,
ane rápáꞌna naweꞌiaꞌ uwai kuinu,
hai napopainu woꞌo untángkuꞌ,
ina kuisá kaꞌiana to Nupileꞌi to ina mewaliꞌ toinána ánáꞌna pueꞌkuꞌ Burahima.’
45 Tiꞌara mani hópóꞌ pekakaengkuꞌ,
haweꞌ miꞌi Ribeka mopáháꞌá gumbaꞌna,
hai mantámbuꞌ uwai i tibubuꞌ iti.
Hangko ionoꞌ,
kuꞌuliꞌ i hia,
‘Membiáꞌaꞌ tulungi,
nupoweꞌiaꞌ uwai ina kuinu.’
46 Kásáliu napopendáulu gumbaꞌna hangko i wángána,
nauliꞌ,
‘Tuá,
mainukeꞌ,
hai untántaꞌ ina kupopainuheꞌ woꞌo.’
Roo onoꞌ,
mainuaꞌ,
hai upu-upu untángkuꞌ napopainuheꞌ woꞌo.
47 Onoꞌ miꞌi haneꞌi kupekuneꞌ,
‘Heáná umámu?’
Nahániki,
‘Umángkuꞌ Betueli,
ánáꞌraꞌ Nahori hai Mika.’
Hangko ionoꞌ,
kupatakaꞌ dali buláwá i hilóna hai kupusaꞌ kálá buláwá i taena.
48 Roo onoꞌ,
molingkuduaꞌ motóngkóꞌ i tampoꞌ menómbá hai motóiá PUEꞌ to napenómbái pueꞌkuꞌ Burahima,
láwiꞌ Ia miꞌi to moteteꞌaꞌ haneꞌi kubuku haweꞌ ieneꞌ i halalunaheꞌ pueꞌkuꞌ.
Hai Ia to motulungiaꞌ mampohidupaꞌá ánáꞌntawine deꞌe,
ánáꞌna halaluna pueꞌkuꞌ,
bona napotoina ánáꞌna pueꞌkuꞌ.
49 Mewaliꞌ deꞌe-deꞌe,
ane maꞌahiꞌkou hai bulá lalumi i pueꞌkuꞌ iti,
nipahaweꞌáꞌaꞌ noumbá polámbiꞌmi bona kuisá apa to hangaa-ngaa kubábehi.”
50 Mehániꞌheꞌ Lábá hai Betueli,
“To mewaliꞌ deꞌe,
PUEꞌ miꞌi to mopakanótó upu-upuna.
Mewaliꞌ tiꞌara piꞌi ara to peisá kiuliꞌ.
51 Deꞌe miꞌi Ribeka.
Niánti miꞌi bona ia mewaliꞌ toinána ánáꞌna pueꞌmu hintotoꞌ hai apa to natudeꞌákoꞌ PUEꞌ.”
52 Kanahádina hawiꞌna Burahima laluitaraꞌ,
ia molingkudu motóngkóꞌ haweꞌ i tampoꞌ menómbá i PUEꞌ.
53 Roo onoꞌ,
hawiꞌna Burahima moala párewá to rabábehi hangko i buláwá hai peráꞌ,
hai waruꞌ to masuliꞌ.
Upu-upuna iti napeweꞌi i Ribeka,
noꞌonoꞌ woꞌo i wutuꞌna hai i hinána.
54 Roo onoꞌ,
hawiꞌna Burahima hai taunánaheꞌ,
mandeꞌmoheꞌ hai mainu,
haneꞌi hambengiheꞌ ionoꞌ.
Mearómoheꞌ mepulo,
nauliꞌ hawiꞌna Burahima,
“Mepálákánámoꞌ.
Ina mesuleꞌmongkaiꞌ i pueꞌkuꞌ.”
55 Agáiáná wutuꞌna hai inána Ribeka manguliꞌ,
“Nupatodáhi sieruꞌ Ribeka i kaiꞌ hubaꞌ haminggu ba hampuloꞌ alona,
hangko peisá riꞌi lao.”
56 Agáiáná hawiꞌ iti manguliꞌ,
“Ineeꞌmoꞌ nitaha,
láwiꞌ natulungiaꞌ PUEꞌ duuꞌna mewaliꞌ tunggáiána pueꞌkuꞌ.
Nipaliumoꞌ mesuleꞌ i hia.”
57 Mehániꞌheꞌ,
“Takióꞌ sieruꞌ mai Ribeka bona taisá noumbá pekirina.”
58 Rakióꞌ mpuꞌu miꞌi Ribeka haneꞌi rakuneꞌ,
“Ba nuꞌundeꞌ miꞌi meuláꞌ i tauna deꞌe?”
Mehániꞌ Ribeka,
“Ió,
kuꞌundeꞌ miꞌi.”
59 Mewaliꞌ Ribeka hai hadua to mopaꞌala hangko kókóiꞌ,d
rapaliumoheꞌ pohuꞌ hingkakani hai hawiꞌna Burahima hai taunánaheꞌ.
60 Roo onoꞌ,
Ribeka rawátiꞌ,
rauliꞌ:
“Ribeka,
tapembiáꞌ Pueꞌ Ala mowátiꞌkoꞌ
bona mewaliꞌkoꞌ ináraꞌ i sábuna tauna
hai pemuleꞌámu monangiheꞌ upu-upu ewáliraꞌ.”
61 Roo ionoꞌ,
mangkádipurámoheꞌ Ribeka hai bahangapa hawiꞌna towawine,
haneꞌi mesaweꞌheꞌ i untá,
pohuꞌmoheꞌ meuláꞌ i hawiꞌna Burahima.
62 Tempó iti,
Isakiꞌ toroꞌ i tampoꞌ Negeꞌ.
Ia mesuleꞌ miꞌi hangko i tibubuꞌ to rauliꞌ “Lahai-Roi.”e
63 Kalumbaꞌ miꞌi,
ia mesuwuꞌ hangko i bambaruꞌna ina lao molulumao i pádá.
Naita araheꞌ untá to haweꞌ.
64 I kanaitána Ribeka iti Isakiꞌ,
mendáulu miꞌi hangko i untána,
65 haneꞌi napekuneꞌ i hawiꞌna Burahima,
nauliꞌ,
“Heáná tobaleilo iti to maikeꞌ modupaꞌ?”
Mehániꞌ hawiꞌ iti,
“Ia miꞌi pueꞌkuꞌ Isakiꞌ.”
Kanahádina noꞌonoꞌ,
Ribeka moala miꞌi bóbóna napopotuko lindoꞌna.f