Pemuleꞌánaheꞌ Burahima hangko i Ketura
25
Burahima mampotoina wopiꞌi hadua towawine to rahangaꞌ Ketura.
2 Ánáꞌna Burahima to napoánáka toinána iti iamoheꞌ:
Simara,
Iokasa,
Meda,
Midia,
Isibaꞌ hai Sua.
3 Iokasa momuleáka Seba hai Deda,
hai pemuleꞌána Deda ia miꞌi toAsu,
toLetusi hai toLeuma.
4 Midia momuleáka:
Epa,
Epe,
Henoꞌ,
Abida hai Eleda.
Upu-upu tauna iti tepasuaꞌ pemuleꞌánaheꞌ Ketura.
5 Upu-upu párewána Burahima napososora Isakiꞌ,
6 agáiáná i tempóna mani tueꞌ,
nagáláꞌ-gáláꞌámoheꞌ woꞌo ánáꞌna hangko i rodua towawinenaheꞌ to nakarodua,
ia miꞌi Hagari hai Ketura,
hai nahuoꞌheꞌ melimbá lao i tampoꞌ ntániꞌna to tándáꞌ i mata alo bona karaoꞌheꞌ hangko i Isakiꞌ.
Kamatena Burahima hai karatawuna
7-8 Matinuwuꞌ ntepuꞌu Burahima,
magáná miꞌi hangatu pitu puloꞌna hai lima parena,
hangko mate riꞌi.
9 Isakiꞌ hai Sumaila motawuheꞌ wátána umáraꞌ i lalu balamba Mapela i hambuaꞌ hinoe tándáꞌ i mata alo i Mamere.
Hangkoia hinoe iti tampoꞌna Epero ánáꞌna Soha toHeti,
10 agáiáná tampoꞌ iti nahóló miꞌi Burahima.
Ionoꞌ miꞌi woꞌo Sáráꞌ toinána Burahima ratawu.a
11 Mate miꞌi Burahima,
Pueꞌ Ala mowátiꞌ Isakiꞌ ánáꞌna.
I tempó iti,
Isakiꞌ toroꞌ hungkuꞌ i tibubuꞌ Lahai-Roi.
Pemuleꞌánaheꞌ Sumaila
12 Deꞌe miꞌi daritakáná pemuleꞌánaheꞌ Sumaila.
Sumaila iti ia miꞌi ánáꞌna Burahima hangko i Hagari toMásiriꞌ,
hawiꞌna Sáráꞌ.
13 Ia momuleáka hampuloꞌ hai rodua ánángkóiꞌ tobaleilo.
Deꞌe miꞌi hangaꞌraꞌ mouláꞌ pombeusuána karapoánákaraꞌ:
Nebaioꞌ,
Keda,
Adebele,
Mibesa,
14 Misama,
Duma,
Masa,
15 Hadaꞌ,
Tema,
Etu,
Napisi haneꞌi Kedema.
16 Ánáꞌnaheꞌ Sumaila deꞌe mewaliꞌheꞌ tadulakoraꞌ hampuloꞌ hai rontina.
Hangaꞌna wánuáraꞌ mouláꞌ woꞌo hangaꞌraꞌ hadua-hadua.
17 Magáná miꞌi tinuwuꞌna Sumaila hangatu tálu puloꞌna hai pitu parena,
hangko mate riꞌi.
18 Pemuleꞌána iti,b
toroꞌheꞌ i tampoꞌ i hiliꞌna Hawila hai Suruꞌ tándáꞌ i mata alo tampoꞌ Másiriꞌ to mombetoto hai tampoꞌ Asu.
Hira megáákiheꞌ hangko i pemuleꞌána Burahima to ntániꞌna.c
Karapoánákana Esau hai Iako
19 Deꞌe miꞌi daritakáná Isakiꞌ ánáꞌna Burahima.
20 Magáná miꞌi tinuwuꞌna Isakiꞌ iba puloꞌna parena,
hambokomoheꞌ hai Ribeka,
ádina Lábá ánáꞌna Betueli.
Betueli iti,
hadua toÁrá to toroꞌ i tampoꞌ Pádá-Árá.
21 Bahangapa miꞌi kamaruena hangko ionoꞌ,
Ribeka tiꞌara mani moánáꞌ,
onoꞌ miꞌi haneꞌi napekakaeá Isakiꞌ,
hai pekakaena iti napehádingi PUEꞌ,
haneꞌi káláꞌeá miꞌi Ribeka.
22 To nakákáláꞌeánga iti,
moropaꞌheꞌ.
Hangko tiꞌara maniheꞌ mesupaꞌ,
momberusuꞌ-rusuꞌmoheꞌ i lalu taꞌina ináraꞌ.
Nauliꞌ Ribeka,
“Moapa riꞌi haneꞌi node riꞌe wátángkuꞌ?”
Onoꞌ miꞌi haneꞌi napembiáꞌ paturoꞌ i PUEꞌ.
23 Nauliꞌ PUEꞌ i hia:
“To nukákáláꞌeánga iti
ina mampopewaliꞌheꞌ rombuaꞌ kadatuá,
hai ina moewaliheꞌ.
Maróhó mani ádina haneꞌi wutuꞌna,
hai towutuꞌ ina mengkoruꞌ i toadi.”d
24 Haweꞌ miꞌi tempóna Ribeka moánáꞌ,
mesupaꞌ miꞌi rodua tobaleilo.
25 Towutuꞌ lenggeꞌna mangkakalei,
hai mowulu wátána,
onoꞌ miꞌi haneꞌi rahangaꞌ Esau,
lempóna:
“mowulu”.
26 I karapoánákana,
ánáꞌna to adi tangaꞌna motibaaꞌ padóꞌna Esau,
onoꞌ miꞌi haneꞌi rahangaꞌ Iako,
lempóna:
“motibaaꞌ padóꞌna”.e
I karapoánákaraꞌ toporopaꞌ iti,
tinuwuꞌna Isakiꞌ ini miꞌi puloꞌna parena.
Esau mampobaluꞌ katowutuꞌna
27 Kamarue-rueá kamahile-hileáheꞌ ánángkóiꞌ to rodua iti.
Esau mapánde moahu,
hai naundeꞌ peá toroꞌ i pádá,
agáiáná Iako tinda pampekirina hai naundeꞌ peá roo-roo i bambaruꞌ.
28 Isakiꞌ mampomahile ntepuꞌu Esau láwiꞌ naundeꞌ mandeꞌ rasiꞌna moahu,
agáiáná Ribeka mampomahile ntepuꞌu Iako.
29 Hangkani tempó,
tangaꞌna Iako moundá tambue to malei,
haweꞌ miꞌi Esau hangko i poahuána,
hai rumihi kamarimina.
30 Nauliꞌ Esau i Iako,
“Marimi mpiiꞌaꞌ noeneꞌ!
Nuweꞌiaꞌ wongkódóꞌá hantóiꞌ tambue to malei to nuꞌundá iti.”
Onoꞌ miꞌi haneꞌi ia rauliꞌ woꞌo Edo,
lempóna:
“malei”.
31 Mehániꞌ Iako,
“Peisánto kuweꞌikoꞌ,
agáiáná hangaa-ngaa nulimbá sieruꞌ katowutuꞌmu i kódóꞌ.”
32 Nauliꞌ Esau,
“Apa paꞌi pobunduꞌána katowutuꞌkuꞌ haneꞌiaꞌ mate holo.”
33 Nauliꞌ wopiꞌi Iako,
“Modándimokoꞌ sieruꞌ kanuweꞌingkuꞌ miꞌi katowutuꞌmu.”
Mewaliꞌ modándi mpuꞌu miꞌi Esau,
hai napeweꞌi miꞌi katowutuꞌna i Iako.
34 Roo onoꞌ,
hangko naweꞌi riꞌi Iako rótiꞌ hai haloꞌ tambue to malei iti.
Mandeꞌ miꞌi Esau hai mainu haneꞌi pohuꞌ.
Moliu bábehiána iti,
tongawaꞌ miꞌi katiꞌárána mobiláꞌ katowutuꞌna.f