Laluitana Aguri
30
Deꞌe miꞌi laluitana Aguri ánáꞌna Iake to hangko i Masa, nauliꞌ:“Ó Pueꞌ Ala, maledeꞌmoꞌ.
Upu róhóngkuꞌ.
2 Bebe ntepuꞌuaꞌ hangko i tauna ntániꞌna.
Pekiringkuꞌ tiꞌara nodo pekiri tauna.
3 Tiꞌaraꞌaꞌ meguru mewaliꞌ tauna to bukeꞌ pekiri,
tiꞌara woꞌo kuisá kaheánána Pueꞌ Ala To Magasaꞌ.
4 Heáná to mengkaoreꞌ miꞌi lao i surugáꞌ
haneꞌi mendáulu mai huleꞌ?
Heáná to mokámumu miꞌi wui?
Heáná to mopótóꞌ miꞌi uwai i báná?
Heáná to mopakanótó miꞌi páráiliꞌna duniáꞌ?
Heáná hangaꞌna, hai heáná hangaꞌna ánáꞌna?
Ane nuisái, nupahaweꞌáꞌaꞌ.”
5 Upu-upu laluitana Pueꞌ Ala peisá rapoinálái.
Ia nodo lábá to mokámpái upu-upu tauna to mengkatueꞌ i Hia.a
6 Ineeꞌ nutámbái laluitaNa,
bona tiꞌarakoꞌ Nakámbáróá,
hai tiꞌarakoꞌ woꞌo Narekeꞌ topodongkoꞌ.
7 Rompákáꞌ to kupembiáꞌ i Hio PUEꞌ, hangko tiꞌara maniꞌaꞌ mate,
ineeꞌ Nusapuáka pembiáꞌkuꞌ deꞌe:
8 Kaꞌisáꞌ, Nupakaraoꞌ hangko i kódóꞌ pebagiuꞌ hai dongkoꞌ.
Kaduá, ineeꞌaꞌ Nuweꞌi kamakuraꞌ ba kapebuku.
Nupoweꞌiaꞌ pandeꞌ i kagáná-gánáꞌána,
9 bona ane mewaliꞌaꞌ topebuku, tiꞌaraKoꞌ kusapuáka,
haneꞌi kuꞌuliꞌ, “TiꞌaraKoꞌ kuparaluu PUEꞌ.”
Tiꞌara woꞌo kuꞌundeꞌ mewaliꞌ topeahiahiꞌ,
bona tiꞌaraꞌaꞌ manako hai mopakahiliáKoꞌ.
10 Ineeꞌ nupakadake topobágóꞌ i tuána,
bona tiꞌarakoꞌ nakambo topobágóꞌ iti,
hai tiꞌarakoꞌ molámbiꞌ háwángina kamasalaꞌmu iti.
11 Ara tauna to mokambo umáraꞌ,
hai tiꞌaraheꞌ mobiláꞌ ináraꞌ.
12 Ara tauna to manguliꞌ ia tiꞌara madósá,
mole handaꞌ riꞌi dósána to tiꞌara tewoe.
13 Ara tauna to maꞌángkáꞌ ntepuꞌuheꞌ,
hai mopaiwóiꞌ tauna ntániꞌna.
14 Ara tauna to maseke ntepuꞌu,
nodo binataꞌ to mekeki hai ngihi to mataru,
ba tauna to mopakeꞌ pihoꞌ mebataꞌ.
Pakaheꞌ morámpáki tauna to i wóiꞌ tueꞌraꞌ,
topeahiahiꞌ rapopeahiahiꞌheꞌ.
15 Alintaꞌ rombaꞌa ánáꞌna paka tawine.
Hangaꞌraꞌ “Anungkuꞌ!” hai “Anungkuꞌ!”
Tálu pákáꞌna to tiꞌara mamporái,
iba pákáꞌna to tiꞌara haweꞌ hangkani manguliꞌ, “Gáná miꞌi!” iamoheꞌ:
16 duniáꞌraꞌ tomate,
towawine to lalo,
tampoꞌ to moparaluu oaꞌ uwai,
hai api to tiꞌara mau mate.
17 Tauna to mopakóiꞌ umána
hai tiꞌara mau mampehádingi inána,
mátána ina natilóꞌ kaaꞌ,
hai wátána naꞌandeꞌ tádáhi koꞌaaꞌ.
18 Tálu pákáꞌna to mehelei,
iba pákáꞌna to tiꞌara kuisá noumbá haneꞌi mewaliꞌ, iamoheꞌ:
19 noumbá rárána haneꞌi tádáhi koꞌaaꞌ peisá membara i laerawa,
noumbá rárána haneꞌi lelótó peisá mendólóꞌ i watu pealeꞌ,
noumbá rárána haneꞌi kapalaꞌ peisá molumao i wongko tahiꞌ,
hai noumbá riꞌi haneꞌi tobaleilo hai towawine mombeundeꞌ.
20 Deꞌe miꞌi rárána towawine to mebuálósi:
Ia mandeꞌ, moumpáhi humena,
haneꞌi nauliꞌ, “Tiꞌara ara salaꞌkuꞌ.”
21 Tálu pákáꞌna to mampoporidiꞌ tauna i duniáꞌ,
iba pákáꞌna to tiꞌara mpuꞌu raundeꞌ, iamoheꞌ:
22 hawiꞌ to mewaliꞌ datu,
tauna to bebe to handaꞌ gaga pandeꞌna,
23 towawine to motoama, agáiáná tiꞌara maroꞌa pambiárána,
hai topedurei i támbi to morámpáki tuána towawine.
24 Ara iba pákáꞌna binataꞌ to tepakóika i duniáꞌ,
agáiáná mapánde ntepuꞌuheꞌ, iamoheꞌ:
25 lántiꞌ, tiꞌaraheꞌ gaga maróhó,
agáiáná i tempó madiiꞌ, morámpuheꞌ pandeꞌ.
26 Walehuꞌ, maledeꞌ wátáraꞌ,
agáiáná mobábehiheꞌ hárá i buluꞌ watu.
27 Katupeeꞌ, tiꞌara ara tadulakoraꞌ,
agáiáná motereheꞌ nodo surudadoꞌ.
28 Hai asaꞌ-asaꞌ, peisáheꞌ rapakaꞌ hai tae,
agáiáná araheꞌ woꞌo i támbina datu.
29 Tálu pákáꞌna binataꞌ to maroꞌa polumaona,
ba iba pákáꞌna to mababe pelingkaꞌraꞌ, iamoheꞌ:
30 singá to melumbuꞌ kamaróhóna hangko i upu-upu binataꞌ.
Ia tiꞌara mosuliꞌ, kehapiꞌ apa miꞌi to i lindoꞌna.
31 Manuꞌ bangkoiloꞌ to keate,
bekeꞌ laki,
hai datu to molumao i lindoꞌna taunánaheꞌ.
32 Ane bebekoꞌ hai mampepemahilekoꞌ,
ba moliwokoꞌ mobábehi to kadake,
maingáꞌ-ingáꞌkoꞌ, hai nukámumu humemu!
33 Láwiꞌ ane susu rairu oaꞌ, ina mewaliꞌ mantegá,
ane hiló rajangguruꞌ, ina kewaheꞌ,
noꞌonoꞌ woꞌo, ane tauna rapapamaꞌámuꞌ,
ina mopaꞌara posisalaꞌ.