29
Tauna to handaꞌ miꞌi kánina rakámbáróá,agáiáná matuꞌa oaꞌ laluna,
hangkaꞌ-hangkaꞌ perái ia ina nahuku Pueꞌ,
hai katueꞌna tiꞌara ina maroꞌa huleꞌ.a
2 Ane tauna to manótó mepárentá,
góeꞌheꞌ taunána,
agáiáná ane tauna to kadake mepárentá,
meraruaꞌheꞌ taunána.
3 Tauna to moundeꞌ kanótó lalu
mopagóeꞌ umána,
agáiáná tauna to paka hingkakani hai towawine
to mampobaluꞌ wátána,
mopopu-popu peá kapebukuna.
4 Ane datu mepárentá i kahintimbáꞌána,
kadatuána ina maróhó,
agáiáná ane araheꞌ tauna to moróróꞌ ásele
melumbuꞌ hangko i to rapakanótó miꞌi,b
kadatuá iti ina magero.
5 Heáná to moꞌoreꞌ-oreꞌ hángká rángána
ina rapakanawoꞌ.
6 Tauna to kadake rapakanawoꞌ ánti dósána haduduána,
agáiáná tauna to manótó ina monani-nani ánti kagóeꞌna.
7 Tauna to manótó mamperuruꞌi tauna to i wóiꞌ tueꞌna,
agáiáná tauna to kadake tiꞌara.
8 Tauna to metitibei, mopaꞌara posisalaꞌ i lalu kótá,
agáiáná tauna to bukeꞌ pekiri, mopamalulu kamabukoꞌ.
9 Ane tauna to bukeꞌ pekiri mokara-kara
hai tauna to bebe,
to bebe iti mabukoꞌ hai mengee-ngee,
álána kara-kara iti tiꞌara hópóꞌ maroꞌa.
10 Tauna to manótó rakáhihiꞌ tauna to moundeꞌ mepapate,
agáiáná ia rakámpái tauna to manoroꞌ laluraꞌ.
11 Tauna to bebe mampopempuai kamabukoꞌna,
agáiáná tauna to bukeꞌ pekiri, nabuku momeeꞌ laluna.
12 Ane topopárentá mampehádingi laluita to tiꞌara toꞌu,
upu-upu topobágóꞌna ina kadake.
13 Topeahiahiꞌ hai to mampopeahiahiꞌheꞌ ara kahibaliáraꞌ,
ia miꞌi PUEꞌ mampoweꞌiheꞌ peinao.c
14 Ane datu mobutusi i katoꞌu-toꞌuána
kara-karana tauna to i wóiꞌ tueꞌna,
kadatuána ina mantaha.
15 Ánángkóiꞌ to rapatodáhi peá
ina mopakahiliá inána.
Agáiáná ane rakámbáróá hai rahepe,
ina manótó pekirina.
16 Ane tauna to kadake makuasaꞌ mepárentá,
tetámbái woꞌo kakadakena tauna.
Agáiáná karapopendáuluna lántiꞌraꞌ,
ina raita tauna to manótó.
17 Ane nukámbáróá ánáꞌmu, ina tinda lalumu,
hai ina napogóeꞌkoꞌ.
18 Ane tauna tiꞌara napoteteꞌá Pueꞌ Ala,
mantámbái kakadakena tauna,
agáiáná morasiꞌheꞌ tauna to mampeuláꞌi paturoꞌna Pueꞌ.
19 Ane mokámbáróákoꞌ topobágóꞌmu, laluita peá tiꞌara gáná.
Kehapiꞌ naisá apa to nutunggái, tiꞌarakoꞌ ina napeuláꞌi.
20 Magampaꞌ mani mopaturoꞌ tauna to bebe
haneꞌi tauna to molaluita hangko tiꞌara mani mampekiri.
21 Hawiꞌ to biásá peá i wóiꞌ káledáꞌ
hangko i kaꞌánángkóiꞌána mani,
kahópóꞌána ina matuꞌa laluna.
22 Tauna to paka mabukoꞌ mopaꞌara posisalaꞌ,
hai tauna to hengkeꞌ, handaꞌ dósána.
23 Tauna to mampepemahile ina rapaiwóiꞌ,
agáiáná tauna to mengkaiwóiꞌ ina rapomahile.
24 Tauna to modurei topanako hai molámbiꞌ gáláꞌna,
mopakarugiꞌ wátána haduduána.
Ane molindoꞌ topobutusi, hai molaluita i katoꞌu-toꞌuána,
ia ina molámbiꞌ pehuku.
Agáiáná ane maniiꞌ-niiꞌ peá,
bateꞌna molámbiꞌ pehuku hangko i Pueꞌ Ala.d
25 Ane malááꞌkeꞌ i tauna, peisákeꞌ rapakanawoꞌ,
agáiáná tauna to mehárungá i PUEꞌ, ina nakámpái.
26 Handaꞌ tauna moundeꞌ mampopeperuruꞌi i tauna to makuasaꞌ,
agáiáná PUEꞌ peá to hintotoꞌ pobutusiNa.
27 Tauna to manótó mokáhihiꞌ bábehiána tauna to kadake,
hai tauna to kadake mokáhihiꞌ tauna to tueꞌ i kamanótó.