28
Tauna to kadake melangka, kehapiꞌ tiꞌara ara to modápáꞌ,agáiáná tauna to manótó pebáiꞌ nodo singá.
2 Ane handaꞌ topeꞌewaꞌ i kadatuá,
ina handaꞌ woꞌo tadulako,a
agáiáná ane ara hadua tadulako to moisá ntepuꞌu mepárentá,
tauna i kadatuá iti ina mampeuláꞌiheꞌ áturá-áturá.
3 Tauna to meahiahiꞌ to mampopeahiahiꞌ tauna to i wóiꞌ tueꞌraꞌ
hibali hai udá to rumihi to mopakarugiꞌ tudaꞌ-tudaꞌ.
4 Tauna to tiꞌara piꞌi mampeuláꞌi áturá-áturá,
mampomahileheꞌ tauna to kadake,
agáiáná tauna to mampeuláꞌi oaꞌ áturá-áturá,
moewaꞌheꞌ tauna to kadake.
5 Tauna to kadake tiꞌara moisá to rauliꞌ kahintimbá,
agáiáná tauna to moundeꞌ mengkoruꞌ i PUEꞌ, raisá ntepuꞌu.
6 Maroꞌa mani tauna to meahiahiꞌ to tiꞌara ara kamasalaꞌna,
haneꞌi tauna to pebuku to motengkoꞌ laluna.
7 Tauna to mampeuláꞌi áturá-áturá,
ia miꞌi tauna to bukeꞌ pekiri,
agáiáná tauna to morángá hai tauna to mehioroꞌ,
mopakahiliá tosaena.
8 Tauna to motámbái kapebukuna
hangko i dóiꞌna to napopebolo
láwiꞌ handaꞌ gaga bungaꞌna to naꞌala,
kahópóꞌána kapebukuna iti ina manawoꞌ
i to haduána to maꞌahiꞌ i tauna to i wóiꞌ tueꞌraꞌ.
9 Heáná to tiꞌara piꞌi mampehádingi áturána Pueꞌ,
mogalo riꞌi pekakaena, napokatidiꞌ Pueꞌ.b
10 Heáná to mopakanawoꞌ tauna to manótó
álána rárá katueꞌraꞌ mewaliꞌ kadake,
ia ina napakanawoꞌ bábehiána haduduána,
agáiáná tauna to tiꞌara ara salaꞌiána
ina molámbiꞌ pewátiꞌ.
11 Tauna to pebuku mampe to mapánde,
agáiáná tauna to peahiahiꞌ to bukeꞌ pekiri
moisá pambiárána topebuku iti.
12 Ane tauna to manótó makuasaꞌ mepárentá,
góeꞌheꞌ taunána,
agáiáná ane tauna to kadake to makuasaꞌ mepárentá,
ina mebuniheꞌ taunána.c
13 Heáná to mowuniángi dósána,
tiꞌara ina maroꞌa katueꞌna,d
agáiáná Pueꞌ ina mopatongawaꞌ kamaꞌahiꞌNa
i tauna to mopangákuꞌ dósána hai mokábáhá.e
14 Morasiꞌ miꞌi tauna to mengkoruꞌ oaꞌ i PUEꞌ,
agáiáná tauna to mopamatuꞌa laluna ina molámbiꞌ kapári.
15 Tauna to maseke to mopárentá tauna to i wóiꞌ tueꞌraꞌ,
nodo singá to merengge ba beruá to medápáꞌ ina mehakaꞌ.
16 Tauna to makuasaꞌ to tiꞌara moisá mampekiri to maroꞌa,
mampopeahiahiꞌ taunánaheꞌ,
agáiáná tauna to tiꞌara moundeꞌ molámbiꞌ rasiꞌ moliu pebagiuꞌ
ina matinuwuꞌ.
17 Tauna to mepapate
ina melangka haweꞌ i duniáꞌraꞌ tomate.f
Ineeꞌ nuperuruꞌi!
18 Tauna to tiꞌara ara kamasalaꞌna,
ina tueꞌ oaꞌ i kamaroꞌa-roꞌa,
agáiáná tauna to motengkoꞌ laluna,
hangkaꞌ-hangkaꞌ ina rapakanawoꞌ.
19 Tauna to madota mampobágóꞌ tampoꞌna
ina magáná oaꞌ pandeꞌna,
agáiáná tauna to moundeꞌ peá mobábehi to tiꞌara mobunduꞌ,
ina molámbiꞌ peá kamakuraꞌ.
20 Tauna to peisá rapoinálái, molámbiꞌ handaꞌ pewátiꞌ,
agáiáná tauna to moundeꞌ kawiáꞌ pebuku,
bateꞌna molámbiꞌ pehuku.
21 Tiꞌara maroꞌa mampopontaniꞌ tauna,
agáiáná ara tauna to mobábehi to tiꞌara hintotoꞌ
bona molámbiꞌ peá dóiꞌ hantódiꞌ.
22 Tauna to bohiꞌ mampoinao poloꞌ pebuku,
agáiáná tiꞌara naisá kaꞌina árána kamakuraꞌna.
23 Tauna to mekámbáróá, kahópóꞌána melumbuꞌ karabiláꞌna
hangko i tauna to meoreꞌ-oreꞌ peá.
24 Heáná to mopanakoi tosaena
hai narekeꞌ tiꞌaranto madósá,
ia hibali hai tauna to mepakarugiꞌ.
25 Tauna to mampeliꞌ peá porasiꞌána haduduána,
mopaꞌara peá posisalaꞌ,
agáiáná tauna to mehárungá i PUEꞌ,
ina maroꞌa ntepuꞌu katueꞌna.
26 Tauna to bebe mouláꞌ peá pekirina haduduána,
agáiáná tauna to tueꞌ i kanótó lalu, ina tekámpái.
27 Tauna to motulungi topeahiahiꞌ,
tiꞌara ina ara kamakuraꞌna,
agáiáná tauna to tiꞌara mau metulungi,
ina rakambo.
28 Ane tauna to kadake makuasaꞌ mepárentá,
taunána mebuniheꞌ.
Agáiáná ane tauna to kadake iti manawoꞌ hangko i popárentána,
tauna to manótó ina memuleꞌheꞌ hai mepárentá huleꞌ.