27
Ineeꞌkoꞌ motóiá wátámu haduduámukana i apa to ina nubábehi i alo to ina haweꞌ,
láwiꞌ tiꞌara nuisá apa to ina mewaliꞌ.a
2 Maroꞌa mani ratóiákoꞌ hángká rángámu,
haneꞌi motóiákoꞌ wátámu haduduámu.
3 Watu hai wungi matimi,
agáiáná melumbuꞌ mani kamatimina
hái lalu to napaꞌara tobebe.
4 Tauna to mohiriꞌ melumbuꞌ pepakarugiꞌna
hangko i tauna to masodo hai mabukoꞌ.
5 Maroꞌa mani nuhuwárá laluita pekámbáróá,
haneꞌi mowuniángikoꞌ kamaꞌahiꞌmu.
6 Maroꞌa mani nakámbáróákoꞌ ádáꞌmu ba balemu
ánti kamaroꞌana laluna i hio,
haneꞌikoꞌ natarima maroꞌa tauna,
mole laluna tauna iti kadake i hio.
7 Tauna to mabuhu miꞌi,
kehapiꞌ miꞌi tináháꞌ to matáni tiꞌara piꞌi naꞌandeꞌ,
agáiáná tauna to marimi,
mogalo riꞌi to mapaiꞌ, matamaꞌ nahádi.b
8 Tauna to molilo karaoꞌ hangko i wánuána,
nodo tádáhi to membara karaoꞌ hangko i hárána.
9 Mina-mina to mawongi mopagóeꞌ laluntaꞌ,
noꞌonoꞌ woꞌo paturoꞌna rángántaꞌ mopakaróhókeꞌ.c
10 Ineeꞌ nukáláliꞌá rángámuheꞌ ba rángánaheꞌ umámu.
Maroꞌa mani membiáꞌkoꞌ tulungi i hantámbiámu
haneꞌi i halalumu to karaoꞌ.
11 Ánáꞌkuꞌ, ane manótó lalumu, ina góeꞌ lalungkuꞌ,
bona peisáꞌaꞌ mohániki tauna to mosalaꞌiaꞌ.
12 Ane tauna to bukeꞌ pekiri moita to ina mepahurewuꞌ,
ia mebuni,
agáiáná tauna to tiꞌara hangka iumbá pekirina
molumao oaꞌ duuꞌna hurewuꞌ.
13 Heáná to modándi ina mohómpóki indána tauna to tiꞌara naisá,
hangaa-ngaa raꞌala sieruꞌ kumbána tauna iti popakaróhóna dándina.
14 Petabe to masimbuku mepulo-pulo
rarekeꞌ laluita to meganggu.d
15 Towawine to paka mohume-hume,
nodo udá to tudoꞌ oaꞌ.
16 Ia tiꞌara peisá rapakaniiꞌ,
hibali hai wui tiꞌara peisá rataha,
hai lana tiꞌara peisá rakumuꞌ.
17 Tauna meguru hangko i tauna ntániꞌna
bona mataru pekirina,
nodo besiꞌ mopamataru ladiꞌ.
18 Tauna to mopiaraꞌ kau ara, ina mandeꞌ wuaꞌna,
noꞌonoꞌ woꞌo topobágóꞌ to mokádipurá apa to ara i tuána, ina rabiláꞌ.e
19 Nodo babaiona lindoꞌtaꞌ tongawaꞌ i uwai to lintuꞌ,
noꞌonoꞌ woꞌo laluntaꞌ tongawaꞌ i pambiárántaꞌ.
20 Tauna to tiꞌara mamporái
naundeꞌ oaꞌ motámbái,
hibali hai duniáꞌraꞌ tomate,
timama oaꞌ motarima tauna to mesuaꞌ.
21 Pengkilaꞌna buláwá hai peráꞌ tongawaꞌ
ane rapáresáꞌ i api,
noꞌonoꞌ woꞌo pambiárána tauna tongawaꞌ
ane ia ratóiá.
22 Tauna to matuꞌa laluna,
kehapiꞌ rapanoumbá miꞌi,
tiꞌara ina tebáliki pekirina.
23 Hangaa-ngaa nukamata hai nukádipurá mpakaroꞌa
binataꞌ to nupiaraꞌ,
24 láwiꞌ kapebukumu tiꞌara ina ara oaꞌ,
hai kuasaꞌmu mepárentá tiꞌara ina tetidaꞌ haweꞌ i rue-ruena.
25 Ane rumpuꞌ i pádá hai i buluꞌ mapángkáꞌ miꞌi,
nuhambe, nutomboꞌ hai nuwoli, bona ara pandeꞌna binataꞌmu.
Tiꞌara marue ina tueꞌ huleꞌ rumpuꞌ to woꞌu.
26 Wulu dimbámu peisá nupakeꞌ mobábehi waruꞌmu.
Bekeꞌmu peisá nupobaluꞌ hanggááꞌ
bona hólóna nupakeꞌ mohóló tampoꞌ.
27 Bekeꞌmu to ntániꞌna peisá nupoalai susu.
Susu iti ina gáná i hio, i toinámu, i ánáꞌmuheꞌ hai i topedureimuheꞌ.