26
Lengiꞌ tangaꞌ kealo hai udá i tempó mepare tiꞌara hintotoꞌ,noꞌonoꞌ woꞌo, pebiláꞌ tiꞌara hintotoꞌ i tauna to bebe.
2 Pekambo tiꞌara ina kana i tauna to tiꞌara masalaꞌ,
nodo tádáhi to membara-mbara peá, tiꞌara mengkatóá.
3 Dárá paraluu rahepe, kalide paraluu rasamaꞌi,
hai tauna to bebe paraluu rakándángi.
4 Ineeꞌkoꞌ mohániki tobebe mouláꞌ kabebena,
bona tiꞌarakoꞌ hibali hai ia.
5 Ane tauna to bebe mohuwárá to tiꞌara mesuaꞌ i akala,
nuhániki woꞌo hai laluita to tiꞌara mesuaꞌ i akala,
bona naisá katiꞌárána mapánde.
6 Heáná to mopakatu tewái moliu tobebe
mopakarugiꞌ wátána haduduána.a
7 Paturoꞌ to napahaweꞌ tauna to bebe tiꞌara mobunduꞌ,
nodo katiꞌárána mobunduꞌ bitina topaluꞌ.
8 Mobiláꞌ tauna to bebe
hibali hai motakaꞌ watu i wehiꞌ.
9 Paturoꞌ to napahaweꞌ tauna to bebe
hibali hai dui to motohuꞌ taena tauna to malangu.
10 Heáná to mampopobágóꞌ tauna to melempó peá ba tobebe,
hibali hai tauna to mepanaꞌ mobelái handaꞌ tauna.
11 Tobebe to mohuleki bábehiána,
hibali hai ahu to mandeꞌ huleꞌ bólána.b
12 Magampaꞌ mani mopaturoꞌ tauna to bebe
haneꞌi mopaturoꞌ tauna to mampe to mapánde.
13 Tauna to lohe manguliꞌ, “Ara singá i rawa!
Ara binataꞌ to maila i rárá!”
14 Tauna to lohe menggoli-nggoli peá i paturuána,
nodo babaꞌ to tebungkáhi hai tetuko.
15 Tauna to lohe, mogalo mopáhóꞌ pandeꞌ
napotonggo.
16 I pekirina tolohe, mapánde mani ia
hangko i pitu tauna to bukeꞌ pekiri.
17 Tauna to mampesuaꞌi posisalaꞌ tauna ntániꞌna,
hibali hai tauna to modiiꞌ talingana ahu to melempó.
18-19 Tauna to mebagiuꞌ haneꞌi manguliꞌ, “Mohudoꞌ-hudoꞌ peaꞌ,”
hibali hai tauna to magila to mampopowadi-wadi pángáguntu.
20 Ane pumpu miꞌi kau,
mate miꞌi api.
Noꞌonoꞌ woꞌo, ane tiꞌara piꞌi ara to modaiꞌ-daiꞌ laluita,
mengkaroo posisalaꞌ.
21 Nodo buri mewaliꞌ awaa to roreꞌ,
hai kau moparoreꞌ api,
noꞌonoꞌ woꞌo tauna to moundeꞌ oaꞌ mohioro
mopamaꞌámuꞌ tauna bona mosisalaꞌheꞌ.
22 Ara tauna to moundeꞌ mohádi laluita to mepakadake,
láwiꞌ mesuaꞌ i laluraꞌ.
23 Tauna to maꞌálusuꞌ polaluitana agáiáná kadake laluna,
hibali hai kori tampoꞌ to ralapisi peráꞌ.
24 Tauna to mekáhihiꞌ, maroꞌa polaluitana,
agáiáná laluna bukeꞌ pepakanawoꞌ.
25 Ane maꞌálusuꞌ polaluitana, ineeꞌ nupoinálái,
láwiꞌ laluna bukeꞌ hai to kadake.c
26 Kehapiꞌ miꞌi mowuniángi pekáhihiꞌna,
kakadakena laluna ina tongawaꞌ i upu-upu tauna.
27 Ia nodo tauna to mokae taroboꞌ bona ara to manawoꞌ,
agáiáná ia haduduána to ina manawoꞌ.
Noꞌonoꞌ woꞌo tauna to monduli watu i hángká rángána,
ia haduduána ina nandulingi watu iti.
28 Modongkoki tauna hibali hai mekáhihiꞌ,
noꞌonoꞌ woꞌo laluita to meoreꞌ-oreꞌ mepakanawoꞌ.