Paturoꞌ 25

Paturoꞌ ntániꞌna to naukiꞌ Salomo

Deꞌe miꞌi bahangapa mani paturoꞌna Salomo to rapahirámpu topobágóꞌna Sikia, datu i tampoꞌ Iudá.^a

2 Tongawaꞌ kamahilena kuasaꞌna Pueꞌ Ala,

láwiꞌ ara to Nawuniángi i kitaꞌ.

Tongawaꞌ kamahilena kuasaꞌna datu,

láwiꞌ ia to mopáresáꞌ hai motótóráká.

3 Tiꞌara ara to moisá kamapángkáꞌna langiꞌ ba kakaladuna tampoꞌ.

Noꞌonoꞌ woꞌo datu, tiꞌara ara to moisá apa to i pekirina.

4 Ane dái rawehángi hangko i peráꞌ,

tauna peisá mobábehi párewá to mababe.

5 Noꞌonoꞌ woꞌo ane topobágóꞌna datu to kadake bábehiána

rapopendáulu lántiꞌna,

popárentána datu iti ina maróhó

láwiꞌ upu-upuna ina molumao i kanótó-nótóána.

6 Ineeꞌkoꞌ mampepemahile i lindoꞌna datu,

ba mehoda i pehodaꞌána tauna to mapángkáꞌ lántiꞌna.

7 Rángina miꞌi ara to mohángáꞌáꞌákoꞌ,

“Maikeꞌ, mehodakeꞌ i lindoꞌ!”

haneꞌikoꞌ rapakahiliá i lindoꞌraꞌ tauna to mapángkáꞌ lántiꞌraꞌ.^b

Ane arai to nuita mata,

8 ineeꞌkoꞌ gaga kawiáꞌ lao mobuáꞌ kara-kara i topobutusi,

láwiꞌ apa to ina nubábehi ane salaꞌkoꞌ?

Bateꞌna ina mahilikoꞌ.

9 Ane mosisalaꞌkoꞌ hai hadua tauna,

gáná miꞌi kómu peá rodua to mampolaluita.

Ineeꞌ nupahaweꞌ i tauna ntániꞌna

apa to tiꞌara paraluu naisá,

10 bona tauna to mohádi iti tiꞌarakoꞌ nasalaꞌi hai napakahiliá,

hai kamasalaꞌmu iti tiꞌara ina rakáláliꞌá tauna.

11 Laluita to rahuwárá i tempó to maroꞌa,

nodo wuaꞌngkau buláwá to rawoli i bakiꞌ peráꞌ.^c

12 Pekámbáróá hangko i tauna to bukeꞌ pekiri

nodo kamababena hingkoliꞌ hai áwóló buláwá

i tauna to moundeꞌ mampehádingi.

13 Huoꞌá to peisá rapoinálái mopagóeꞌ to mehuoꞌ,

nodo uwai laheꞌ to rapeweꞌi i tauna to mangkadoꞌu tempó mepare.

14 Tauna to modándi ara to ina napeweꞌi,

agáiáná tiꞌara nabukeki,

nodo peá gawu hai wui

to tiꞌara mopaꞌara udá to rahárungá.

15 Ane sabaraꞌkeꞌ, kahópóꞌána tadulako ina mampokana pembiáꞌtaꞌ,

hai laluita to maꞌálusuꞌ peisá mobáliki pekirina tauna to meꞌewaꞌ.^d

16 Ane molámbiꞌkoꞌ tináháꞌ, nuandeꞌ peá haweꞌ i kanuporáiána,

ineeꞌ gaga handaꞌ bodamu tebólá.

17 Noꞌonoꞌ woꞌo, ineeꞌkoꞌ gaga moleleuꞌ lao i hantámbiámu,

bona tiꞌarakoꞌ napoluleꞌ, kahópóꞌána nakáhihiꞌkoꞌ.

18 Ane mewaliꞌkoꞌ sabiꞌ dongkoꞌ mokana i tauna ntániꞌna,

nodokoꞌ to mobelái tauna iti hai pebóbáꞌ,

ba pihoꞌ, ba panaꞌ to mataru.

19 Ane i tempómu mapári,

hai mehárungákoꞌ i tauna to tiꞌara peisá rapoinálái,

hibali hai mokangaiꞌ pandeꞌ hai ngihi to moduá,

ba molumao hai biti to mokuda.

20 Tauna to monanika nani kagóeꞌ-góeꞌ

i tauna to masusa laluna,

hibali hai molósu baduna i tempó lengiꞌ,

ba mampoanaꞌi isu i tobelána.

21 Ane ewálimi marimi, nipaꞌandeꞌheꞌ.

Ane mangkadoꞌuheꞌ, nipopainuheꞌ.

22 Ane nibábehiꞌi noꞌonoꞌ, ina masandaꞌheꞌ hai rapokahili bábehiáraꞌ i kómu,^e

hai PUEꞌ ina moháwángi kamaroꞌami iti.

23 Tauna to mouliꞌ-uliꞌ kakadakena tauna ntániꞌna

bateꞌna mopaꞌara kamabukoꞌ,

hibali hai wui to hangko tándáꞌ i wongko,

bateꞌna moánti udá.

24 Maroꞌa mani lao mopataniꞌ i halopio támbi

haneꞌi toroꞌ hingkakani hai towawine to paka mohume-hume.

25 Bámbári to maroꞌa hangko i tampoꞌ to karaoꞌ,

nodo uwai to malaheꞌ i tauna to mangkadoꞌu.

26 Tauna to manótó to mengkoruꞌ i tauna to kadake,

hibali hai uwai to malibubu,

ba tibubuꞌ to kedái.

27 Tiꞌara maroꞌa mandeꞌ handaꞌ gaga tináháꞌ,

noꞌonoꞌ woꞌo, tiꞌara maroꞌa ane handaꞌ gaga potóiámu tauna.^f

28 Tauna to tiꞌara nabuku momeeꞌ kamabukoꞌna

nodo kótá to maꞌambaꞌ bentena.