--19--
24
Ineeꞌkoꞌ mahiniꞌ i tauna to kadake,hai ineeꞌ nupoinao morángá hai hira,
2 láwiꞌ mampepekiri peheꞌ bábehiá to kadake,
hai mampolaluita peheꞌ to mepakarugiꞌ.
--20--
3-4 Ane támbi raꞌaró i kanótó lalu hai kapánde,
upu-upu lintuꞌna raóntóki hai párewá
to mababe hai masuliꞌ hólóna.
--21--
5 Maroꞌa mani tauna to bukeꞌ pekiri
haneꞌi tauna to maróhó wátána,
6 láwiꞌ ane ara miꞌi poliwo,
peisákou lao mombeala,
hai ane mampehádingikou handaꞌ paturoꞌ,
bateꞌna ina menangikou.
--22--
7 Tauna to bebe, maꞌángkárá kamoisána apa to rapaturoꞌá,
tiꞌara woꞌo naisá apa to paraluu nahuwárá i pogómbóá.
--23--
8 Heáná to moliwo mobábehi to kadake
ina rauliꞌ topebagiuꞌ.
9 Poliwona tauna to bebe mopaꞌara dósá,
hai tauna to paka mesasalaꞌi, rakáhihiꞌ tauna.
--24--
10 Ane mosuliꞌkoꞌ i tempómu narampe kapári,
tongawaꞌ kamaledeꞌna pepoináláimu.
--25--
11 Ane arai tauna raꞌánti ina rahuku mate,
mole tiꞌara ara salaꞌna, nukábáháheꞌ.
Nupelae tauna to moridiꞌmoheꞌ
láwiꞌ raꞌánti lao i karapapateáraꞌ.
12 Ane nuꞌuliꞌ, “Tiꞌara wongkódóꞌá kuisá
apa to ina mewaliꞌ iti!”
tiꞌara paꞌi Pueꞌ Ala to mopáresáꞌ laluna tauna
moisá ntepuꞌu apa to i lalumu?
Tiꞌara paꞌi Ia to mokámpái katueꞌmu,
ina moháwángikoꞌ hintotoꞌ hai bábehiámu.
--26--
13 Ánáꞌkuꞌ, mandeꞌkoꞌ tináháꞌ láwiꞌ maroꞌa,
tináháꞌ to hangko i támbi uwani matáni.
14 Noꞌonoꞌ woꞌo kanótó lalu.
Ane nulámbiꞌi, ina maroꞌa katueꞌmu,
hai to nuhárungá ina mewaliꞌ.
--27--
15 Ineeꞌkoꞌ nodo tauna to kadake
to mangawu i katoroꞌána tauna to manótó.
Ineeꞌkoꞌ mogero támbina,
16 láwiꞌ tauna to manótó, kehapiꞌ pitu kánina molámbiꞌ kapári,
bateꞌna ina mearó huleꞌ.
Agáiáná tauna to kadake tiꞌara rabuku mearó
ane narumpaheꞌ kapári.
--28--
17 Ineeꞌkoꞌ góeꞌ ane ewálimu molámbiꞌ kapári,
hai ineeꞌ nupogóeꞌ ane ia rapakanawoꞌ,
18 láwiꞌ ane góeꞌkoꞌ,
babilaꞌ PUEꞌ morekeꞌ bábehiámu iti kadake,
haneꞌi tiꞌara mewaliꞌ mohuku ewálimu iti.
--29--
19 Ineeꞌ karaoꞌ inaomu i tauna to mobábehi bábehiá to kadake,
hai ineeꞌ kóiꞌ inaomu,a
20 láwiꞌ i alo to ina haweꞌ,
katueꞌraꞌ tiꞌara ina maroꞌa.
Ina nodoheꞌ palita to upu minána.
--30--
21 Ee ánáꞌkuꞌ, hangaa-ngaa mengkoruꞌkoꞌ i PUEꞌ hai i datu.b
Ineeꞌkoꞌ morángá hai tauna to moewaꞌheꞌ.
22 Láwiꞌ PUEꞌ hai datu hangkaꞌ-hangkaꞌ ina mopaꞌara pehuku.
Heáná paꞌi to moisá, pehuku apa to ina rapaꞌara?
Paturoꞌ-paturoꞌ to ntániꞌna
23 Deꞌe woꞌo paturoꞌ-paturoꞌ to ntániꞌna
hangko i tauna to bukeꞌ pekiri:
Ane mohoda-hodakoꞌ kara-kara,
tiꞌara maroꞌa mampopontaniꞌ tauna.
24 Heáná to manguliꞌ i tauna to kadake bábehiána:
“Tiꞌarakoꞌ masalaꞌ,”
ina rakáhihiꞌ hai rakambo upu-upu tauna i duniáꞌ.
25 Agáiáná topobutusi to mohuku tauna to masalaꞌ,
ia ina góeꞌ hai maroꞌa katueꞌna.
26 Tauna to mohániki laluita i katoꞌu-toꞌuána
mopagóeꞌ laluna rángána.
27 Nuparoo hampaiꞌ bágóꞌmu i rawa,
hai nutudaꞌi hinoemu,
hangko moarórakoꞌ támbimu.
28 Ineeꞌkoꞌ mewaliꞌ sabiꞌ moewaꞌ hángká rángámu
ane tiꞌara ara ntóáꞌna.
Ineeꞌkoꞌ mohuwárá laluita to tiꞌara toꞌu.
29 Ineeꞌ nuꞌuliꞌ, “Apa to nabábehi i kódóꞌ,
noꞌonoꞌ woꞌo to ina kubábehi i hia.
Ina kuháwángi hintotoꞌ hai bábehiána.”
30 Hangkani tempó, melempóaꞌ i hinoena
hadua tauna to lohe.
Ara woꞌo anggoroꞌ to natudaꞌ,
hai tongawaꞌ ia tauna to tiꞌara ara pekirina.
31 Kuita hinoena kerumpuꞌ hai napótóꞌ dui,
bosoꞌna woꞌo maꞌambaꞌ miꞌi.
32 I kakuitána hinoe iti, kupepekiri.
Kupeita maroꞌa, hai meguruaꞌ hangko i apa to kuita iti.
33 Ane mehoda-hoda pekeꞌ hai melingkápuꞌ,
hai ane maturu-turu pekeꞌ oaꞌ,
34 hangkaꞌ-hangkaꞌ ina narampekeꞌ kapári
nodo kahaweꞌraꞌ toperampaꞌ,
hai ina narampekeꞌ kamakuraꞌ
nodo kahaweꞌraꞌ to ina mombeala.