--6--
23
Ane tauna to mapángkáꞌ lántiꞌna mokióꞌkoꞌ mandeꞌ hingkakani,nupekiri maroꞌa apa to hintotoꞌ nubábehi.
2 Ane biásána handaꞌ pandeꞌmu,
nutaha peá peundeꞌámu iti.
3 Ineeꞌ nupokaelu pandeꞌ to matamaꞌ to napatimamaꞌákoꞌ,
babilaꞌ rárána peá bona naisá noumbá poántimu.
--7--
4 Ineeꞌkoꞌ mopári-pári mewaliꞌ topebuku,
nukábáhá peundeꞌámu iti,
5 láwiꞌ kapebuku iti hampaiꞌ peá nodo tádáhi to hangkaꞌ-hangkaꞌ membara,
ina membara nodo pembarana hambaꞌa tádáhi koꞌaaꞌ.
--8--
6 Ineeꞌkoꞌ mandeꞌ i támbina tauna to bohiꞌ,
ineeꞌkoꞌ woꞌo mampokaelu pandeꞌna to matamaꞌ.
7 Kehapiꞌ nauliꞌ miꞌi, “Pandeꞌ! Painu!”
mole riꞌi i laluna tiꞌara naundeꞌ ane mandeꞌkoꞌ handaꞌ
láwiꞌ mampekiri peá kamasuliꞌna pandeꞌ iti.
8 Pandeꞌ to nuandeꞌ miꞌi, ina nubólá peá,
hai polaluitamu to maꞌálusuꞌ, tiꞌara mobunduꞌ.
--9--
9 Ineeꞌkoꞌ mopaturoꞌ tauna to mentibongoꞌ,
láwiꞌ paturoꞌmu iti tiꞌara ina natarima.
--10--
10 Ineeꞌkoꞌ mogesuꞌ watu petándái parailiꞌ tampoꞌ to rungu-runguna,
haneꞌi morusuꞌkoꞌ tampoꞌraꞌ ánángkóiꞌ to ilu,
11 láwiꞌ Pueꞌ to maróhó mohómpókiheꞌ.
Ia miꞌi to mampeámpárái kara-kararaꞌ moewaꞌkoꞌ.
--11--
12 Nupailalu paturoꞌ,
hai nupehádingi laluita to bukeꞌ kapánde.
--12--
13-14 Ineeꞌkoꞌ luleꞌ mopaturoꞌ ánáꞌmu.
Kehapiꞌ nukándángi, tiꞌara ina mate,
ngkáliꞌna riꞌi ina nupelae
hangko i duniáꞌraꞌ tomate.
--13--
15 Ee ánáꞌkuꞌ, ane manótó lalumu,
góeꞌ lalungkuꞌ.
16 Góeꞌaꞌ woꞌo
ane mampolaluitakoꞌ to toꞌu.
--14--
17 Ineeꞌkoꞌ mahiniꞌ i tauna to madósá,
agáiáná mengkoruꞌkoꞌ oaꞌ i PUEꞌ,
18 láwiꞌ katueꞌmu i alo to ina haweꞌ ina maroꞌa,
hai pehárungámu ina ara oaꞌ.
--15--
19 Ee ánáꞌkuꞌ, nupehádingiaꞌ
bona mewaliꞌkoꞌ tauna to bukeꞌ pekiri,
hai mouláꞌkoꞌ oaꞌ rárá katueꞌ to manótó.
20 Ineeꞌkoꞌ morángá hai tauna to paka malangu
hai mehioroꞌ,
21 láwiꞌ tauna to noꞌonoꞌ ina mewaliꞌ meahiahiꞌ,
hai ane maturu-turu pekoꞌ oaꞌ,
tiꞌara marue waruꞌmu ina mahepaꞌ-hepaꞌ.
--16--
22 Nupehádingi umámu to mopaꞌarakoꞌ,
hai ineeꞌkoꞌ motitibei inámu ane sae miꞌi.
23 Nupári-pári mampegurui paturoꞌ to toꞌu
to moánti kanótó lalu.
Nupári-pári bona mewaliꞌkoꞌ to mapánde.
Iti to hangaa-ngaa nubiláꞌ, ineeꞌ nukáláliꞌá.
24 Hadua umaꞌ ina góeꞌ laluna
ane ánáꞌna manótó hai bukeꞌ pekiri.
25 Hampóáꞌworia tosaemu góeꞌheꞌ,
hampóáꞌworia towawine to moánákakoꞌ góeꞌ laluna.
--17--
26 Ee ánáꞌkuꞌ, nupailalu mpakaroꞌa polaluitangkuꞌ,
hai nupeuláꞌi rárá katueꞌkuꞌ to mewaliꞌ pándiriꞌ i hio.a
27 Láwiꞌ towawine to metitidiꞌi bábehiána
hai towawine to mebuálósi, mepahurewuꞌheꞌ
nodo taroboꞌ to kaladu ba tibubuꞌ to mahingkiꞌ.
28 Melawaꞌheꞌ nodo tauna to merámpáki,
hai handaꞌ tobaleilo raꞌánti álána mebuálósiheꞌ.
--18--
29 Heáná to molámbiꞌ kapári?
Heáná to meraruaꞌ?
Heáná to mohioro?
Heáná to meinao buhoꞌ?
Heáná to bela, tiꞌara naisá ntóáꞌna?
Heáná to malei mátána?
30 Ia miꞌi tauna to mehodaheꞌ mainu baru haweꞌ marue wengi,
to moromu-romuheꞌ mainu anggoroꞌ to ragalo-galo.
31 Ineeꞌ tediiꞌ lalumu i anggoroꞌ,
kehapiꞌ malei ntepuꞌu hai mengkilaꞌ i lalu galasi,
ba matamaꞌ ntepuꞌu minána.
32 Agáiáná kahalona nuhádiá
nodokoꞌ to natilóꞌ lelótó to pobisa.
33 Petótóimu ina mobantakiaꞌ miꞌi,
pekirimu tiꞌara ina manótó,
hai polaluitamu tiꞌara piꞌi modalaꞌ.
34 Ina mantambalióngákoꞌ,
nodokoꞌ to narumpa bálumbá i tahiꞌ,
ba nodokoꞌ to nawui wui i doengkau.
35 Ina nuꞌuliꞌ, “Rapaháiꞌaꞌ tauna,
agáiáná tiꞌaranto kuhádiá mahái.
Rabóbáꞌaꞌ, agáiáná tiꞌara kubuhinao.
Impiráraꞌaꞌ pempaa?
Paraluu wopaꞌaꞌ mainu.”