22
Maroꞌa mani rabiláꞌ tauna haneꞌi mewaliꞌ topebuku,maroꞌa mani raꞌádái haneꞌi molámbiꞌ handaꞌ buláwá hai peráꞌ.
2 Topebuku hai topeahiahiꞌ ara kahibaliáraꞌ:
to mampopewaliꞌheꞌ upu-upu ia miꞌi PUEꞌ.
3 Ane tauna to bukeꞌ pekiri moita ara to ina mepahurewuꞌ,
ia mebuni,
agáiáná tauna to tiꞌara hangka iumbá pekirina
molumao oaꞌ duuꞌna hurewuꞌ.
4 Tauna to mengkaiwóiꞌ hai mengkoruꞌ i PUEꞌ
ina morasiꞌ, matinuwuꞌ, hai rabiláꞌ tauna.
5 Katueꞌna tauna to motengkoꞌ laluna,
bukeꞌ kapári to mepakanawoꞌ,
Heáná to moundeꞌ mokámpái rárá katueꞌna
mokaraohi tauna to noꞌonoꞌ.
6 Nupaturoꞌ ánáꞌmu, bona naisá apa to hintotoꞌ nabábehi,
álána haweꞌ i kasaeána tiꞌara ina mokábáhá bábehiá iti.
7 Topeahiahiꞌ nakuasaꞌi topebuku,
topoindá napohawiꞌ to rapoindái.
8 Tauna to mohawuka dake ina molámbiꞌ huleáká,
álána tiꞌara piꞌi peisá mepopeahiahiꞌ.a
9 Tauna to maroꞌa laluna ina rawátiꞌ,
láwiꞌ apa to nalámbiꞌ nagáláꞌ-gáláꞌ i topeahiahiꞌ.
10 Ane nupopesuwuꞌ tauna to paka mesasalaꞌi,
pesasalaꞌina ina mengkaroo,
pombeheheꞌ hai petitibei tiꞌara piꞌi ina ara.
11 Tauna to mampoinao bona bulá laluna hai maꞌálusuꞌ poántina,
ina mewaliꞌ balena datu.
12 PUEꞌ mokámpái bona paturoꞌ to toꞌu rapailalu oaꞌ,
agáiáná Ia mopatuhu liworaꞌ tauna to mebagiuꞌ.
13 Nauliꞌ tolohe, “Ara singá i rawa!
Napapateaꞌ paꞌi i tangaꞌ rawa.”
14 Laluitana towawine to metitidiꞌi bábehiána nodo taroboꞌ to kaladu.
Tauna to nakabukoꞌi PUEꞌ ina manawoꞌ.
15 Tauna to maleheꞌ mani, bebe maniheꞌ,
agáiáná ane rakándángi,
peisáheꞌ meguru mokaraohi bábehiá to bebe iti.
16 Tauna to mampopeahiahiꞌ tauna to i wóiꞌ tueꞌraꞌ
bona molámbiꞌ rasiꞌ,
hai tauna to mampeweꞌi dóiꞌ sogoꞌ i topebuku,
mopakarugiꞌ peá wátána haduduána.
Tálu puloꞌna pákáꞌna paturoꞌ hangko i tauna to bukeꞌ pekiri
17 Nutáꞌá talingamu hai nupehádingi laluitaraꞌ tauna to bukeꞌ pekiri.
Nupailalu paturoꞌ to kupahaweꞌákoꞌ.
18 Ane nubuhinao oaꞌ paturoꞌ deꞌe,
hai nupahaweꞌ i tauna ntániꞌna, ina góeꞌ lalumu.
19 Kupahaweꞌákoꞌ paturoꞌ deꞌe-deꞌe
bona mepoináláikoꞌ oaꞌ i PUEꞌ.
20 Tiꞌara paꞌi kuꞌukiꞌákoꞌ tálu puloꞌna pákáꞌna paturoꞌ
bona mewaliꞌkoꞌ tauna to mapánde.
21 Paturoꞌ to kupahaweꞌákoꞌ paturoꞌ to toꞌu,
bona nubuku mopahaweꞌ apa to toꞌu i tauna to mohuoꞌkoꞌ.
--1--
22-23 Ineeꞌkoꞌ morámpáki tauna to i wóiꞌ tueꞌraꞌ ánti kameahiahiꞌraꞌ,
láwiꞌ PUEꞌ ina moala peinaoraꞌ tauna to morámpákiheꞌ.
Ineeꞌkoꞌ mopamapári tauna to rahoda-hoda kara-kararaꞌ i babaꞌá kótá,
láwiꞌ PUEꞌ ina mampeámpárái kara-kararaꞌ topeahiahiꞌ iti.
--2--
24 Ineeꞌkoꞌ morángá hai tauna to hengkeꞌ
hai kawiáꞌ mabukoꞌ,
25 bona tiꞌarakoꞌ woꞌo meuláꞌ i pambiárána iti
nodo binataꞌ to kana heáꞌ.
--3--
26 Ineeꞌkoꞌ modándi
ina mobaiari indána tauna ntániꞌna.
27 Ane tiꞌara nubuku mobaiari,
mogalo riꞌi paturuámu ina raꞌala.
--4--
28 Ineeꞌkoꞌ mogesuꞌ watu petándái parailiꞌ tampoꞌ
to rapakanótó miꞌi toiorumi.
--5--
29 Ane tauna mampopolumao mpakaroꞌa bágóꞌna,
ia tiꞌara ina mobágóꞌ i tauna biásá,
agáiáná mewaliꞌ riꞌi topobágóꞌna datu.