21
Pekirina datu nakuasaꞌi PUEꞌbona datu mampeuláꞌi peundeꞌáNa,
nodo uwai to moili mouláꞌ poráráꞌána.
2 Upu-upu to rabábehi tauna, maroꞌa mouláꞌ pekiriraꞌ haduduáraꞌ,
agáiáná PUEꞌ to mopáresáꞌ tunggáiána laluraꞌ.
3 Naundeꞌ mani PUEꞌ bona tauna mobábehi to manótó hai hintotoꞌ,
haneꞌi mohuhuꞌ popenómbá.
4 Tauna to kadake madósá
láwiꞌ maꞌángkáꞌ hai mampepemahile.
5 Tauna to madota hai maroꞌa poliwona,
ina maroꞌa katueꞌna,
agáiáná tauna to humpeꞌ
ina molámbiꞌ peá kamakuraꞌ.
6 Ane tauna mewaliꞌ pebuku ánti pebagiuꞌ,
kapebukuna iti ina hawiáꞌ upu hai mopaꞌara kapate.a
7 Tauna to kadake, tiꞌaraheꞌ mau mobábehi to hintotoꞌ,
onoꞌ miꞌi rapopeahiahiꞌ ánti kamasekeraꞌ.
8 Tauna to paka mebagiuꞌ, motengkoꞌ rárána,
agáiáná tauna to manoroꞌ laluna, manótó woꞌo bábehiána.
9 Maroꞌa mani lao mopataniꞌ i halopio támbi
haneꞌi toroꞌ hingkakani hai towawine to paka mohume-hume.
10 Tauna to kadake moundeꞌ oaꞌ mobábehi to kadake,
tiꞌara mpuꞌu ara ahiꞌna i hángká rángána.
11 Ane tauna to paka mesasalaꞌi rahuku,
tauna to tiꞌara hangka iumbá pekirina meguru hangko ionoꞌ,
hai ane tauna to manótó laluna rapaturoꞌ
ia mantámbái kamapándena.
12 Pueꞌ Ala To Bukeꞌ Timbá moisá apa to mewaliꞌ
i lalu támbiraꞌ to kadake.
Ia to mopakanawoꞌheꞌ
álána molámbiꞌheꞌ huleáká.
13 Heáná to mentibongoꞌ mampehádingi
peraruaꞌraꞌ tauna to i wóiꞌ tueꞌraꞌ,
tiꞌara woꞌo ina ratulungi ane ia meraruaꞌ.
14 Kehapiꞌ rumihi bukoꞌna, ane ara to raweꞌi ngkábuni,
kamabukoꞌna iti ina mauraꞌ.
15 Ane kahintimbá rapopolumao,
tauna to manótó góeꞌheꞌ,
agáiáná tauna to mobábehi to kadake, malááꞌheꞌ.
16 Tauna to tiꞌara piꞌi mouláꞌ rárá to manótó
ina teduuꞌ i duniáꞌraꞌ tomate.
17 Tauna to moundeꞌ peá góeꞌ-goeꞌ
ina handaꞌ kamakuraꞌna,
tauna to moundeꞌ peá mosusa hai malangu,
tiꞌara ina mewaliꞌ topebuku.
18 Tauna to kadake hai tiꞌara mobukeki dándiraꞌ,
ina molámbiꞌ pehuku to ratunggái i tauna to manótó.
19 Maroꞌa mani toroꞌ i pádá,
haneꞌi toroꞌ hantámbi hai towawine
to paka mohume-hume hai mabukoꞌ.
20 Lana hai párewá to masuliꞌ hólóna
ara oaꞌ i támbina tauna to bukeꞌ pekiri,
agáiáná tauna to bebe mepoupu peá.
21 Heáná to moundeꞌ oaꞌ mobábehi
to manótó hai bukeꞌ ahiꞌ, ina matinuwuꞌ,
ina molámbiꞌ katueꞌ to maroꞌa, hai ina rabiláꞌ tauna.
22 Tauna to bukeꞌ akala, nabuku mosuaki kótá
to rakámpái surudadoꞌ to keate.
Ia peisá mogero bente kótá iti to rahárungá.
23 Heáná to mokámpái humena
tiꞌara ina molámbiꞌ kapári.
24 Tauna to paka mesasalaꞌi to tiꞌara moisá ádá hai maꞌángkáꞌ,
rumihi ntepuꞌu kamampepemahilena.
25 Tauna to lohe ina mate holo
láwiꞌ tiꞌara mau mobágóꞌ.
26 Hangaloá-loá mampekiri peá apa to napoinao,
agáiáná tauna to manótó mampeweꞌi oaꞌ.
27 PUEꞌ mokáhihiꞌ popenómbána tauna to kadake,
pelumbuꞌna miꞌi ane rapopenómbá hai tunggáiá to tiꞌara maroꞌa.
28 Sabiꞌ dongkoꞌ ina mate,
agáiáná laluitana tauna to peisá rapoinálái ina ratarima.
29 Tauna to kadake mampe to maroꞌa,
agáiáná tauna to manótó,
mampekiri sieruꞌ apa to hangaa-ngaa nabábehi.
30 Tiꞌara ara kanótó lalu ba kapánde
ba potimbá to peisá mewaliꞌ,
ane tiꞌara hiolaꞌ hai peundeꞌána PUEꞌ.
31 Kehapiꞌ dárá rapatimama miꞌi mombeala,
agáiáná to mopakanótó penangi ia miꞌi PUEꞌ.