20
Tauna to mainu anggoroꞌ ba baru to handaꞌ,paka mesasalaꞌi hai mohiho.
Bebe ntepuꞌu tauna to mainu haweꞌ malangu.
2 Kamabukoꞌna datu
nodo perenggena singá.
Tauna to mopaꞌara kamabukoꞌna datu,
mopahurewuꞌ wátána haduduána.
3 Tauna to mokaraohi posisalaꞌ ina rabiláꞌ,
agáiáná tauna to bebe paka mombeheheꞌ.
4 Tauna to lohe tiꞌara mampobágóꞌ hinoena i tempó mowiáꞌ,
onoꞌ miꞌi i tempó pepare, tiꞌara molámbiꞌ apa-apa.
5 Pekirina tauna nodo tibubuꞌ to kaladu ntepuꞌu,
agáiáná tauna to mapánde moisá mokae laluna tauna.
6 Handaꞌ tauna to manguliꞌ, “Kódóꞌ tauna to maroꞌa,”
agáiáná maꞌángkárá molámbiꞌ tauna peisá rapoinálái.
7 Tauna to manótó hai manoroꞌ laluna,
morasiꞌ pemuleꞌána.
8 Ane datu mohoda-hoda kara-kara tauna,
napáresáꞌ mpakaroꞌa bona naisá umbána to pekana
hai umbána to masalaꞌ.
9 Heáná paꞌi to peisá manguliꞌ, “Bulá lalungkuꞌ,
tiꞌara piꞌi ara dósángkuꞌ.”
10 Pueꞌ mokáhihiꞌ popetimbá to tiꞌara kana
noꞌonoꞌ woꞌo popehukáꞌ to mebagiuꞌ.a
11 Pambiárána tauna raisá miꞌi
hangko i kaꞌánángkóiꞌna mani,
tongawaꞌ hangko i bábehiána,
ba maroꞌa hai manótó.
12 Talinga to mampehádingi hai mata to mampeita,
rompákáꞌ iti napopewaliꞌ PUEꞌ.
13 Ineeꞌkoꞌ lue letaꞌ, bodamu meahiahiꞌ.
Nubákáꞌ miꞌi mátámu hai mobágóꞌmokoꞌ,
bona molámbiꞌkoꞌ pandeꞌ to handaꞌ.
14 Nauliꞌ topehóló i topobaluꞌ-baluꞌ,
“Tiꞌara maroꞌa! Masuliꞌ gaga.”
Agáiáná i kapohuꞌna peá, góeꞌ miꞌi,
nauliꞌ, “Mamuraꞌ ntepuꞌu hólóna. Kuisá motáwári.”
15 Buláwá hai watu akeꞌ masuliꞌ hólóna,
agáiáná maroꞌa mani tauna to naisá mepaturoꞌ i kanótó lalu.
16 Heáná to modándi ina mohómpóki indána tauna to tiꞌara naisá,
hangaa-ngaa raꞌala sieruꞌ kumbána popakaróhó dándina.
17 Pandeꞌ to rapanako, rungu-runguna matamaꞌ,
agáiáná marue-rue nodo wungi i lalu nganga.
18 Apa to raliwo peisá mewaliꞌ,
ane arai to moweꞌi paturoꞌ.
Mewaliꞌ ineeꞌkoꞌ lao mombeala
ane tiꞌara mani leháꞌ-leháꞌ poliwomu.
19 Tauna to moánti-ánti laluita
mowungkeꞌ laluita to tewuniángi,
onoꞌ haneꞌi ineeꞌkoꞌ mamporángá tauna to noꞌonoꞌ.
20 Tauna to motundaꞌ tosaena, tiꞌara ina matinuwuꞌ,
nodo huluꞌ to mate tangaꞌ káindi.
21 Sosora to ralámbiꞌ tiꞌara mani tempóna raweꞌi,
tiꞌara ina mewaliꞌ pewátiꞌ.b
22 Ineeꞌ nuꞌuliꞌ, “Ina kuháwángi kakadakena tauna iti!”
Mehárungákoꞌ i PUEꞌ. Ia to ina motulungikoꞌ.
23 Popehukáꞌ hai popetimbá to tiꞌara toꞌu
nakáhihiꞌ PUEꞌ.
24 Rárá katueꞌna tauna napakanótó miꞌi ami PUEꞌ,
mewaliꞌ noumbá kapeisána tauna moisá rárá katueꞌna haduduána?
25 Nupekiri maroꞌa hangko tiꞌara manikoꞌ modándi
apa to ina nupopenómbá i PUEꞌ,
bona tiꞌarakoꞌ menosoꞌ i alo bókóꞌna.c
26 Datu to bukeꞌ timbá mampopontaniꞌ tauna to kadake,
nahukuheꞌ nodo tauna to moiheꞌ pare.
27 Laluntaꞌ nodo huluꞌ to napakeꞌ PUEꞌ,
bona peisákeꞌ mopáresáꞌ tunggáiána laluntaꞌ.d
28 Ane datu mepárentá i kamaꞌahiꞌ hai katetidaꞌ,
ia ina mepárentá oaꞌ.
29 Tauna to maleheꞌ mani ratóiá ánti kamaroꞌana,
hai tauna to sae miꞌi rabiláꞌ ánti kakeubána.
30 Ane tauna rapahái, ia ina mobáliki bábehiána to kadake.
Pehuku to rumihi iti mopaꞌara lalu to maroꞌa.