19
Maroꞌa mani tauna to meahiahiꞌto tiꞌara tesalaꞌiá tueꞌna,
haneꞌi tauna to bebe to paka modongkoꞌ.
2 Peundeꞌána taunaa tiꞌara ina mobunduꞌ
ane tiꞌara moisá rárá molámbiꞌ tunggáiána,
hai tauna to humpeꞌ-humpeꞌ ina mouláꞌ rárá to salaꞌ.
3 Kabebena tauna mopamarugiꞌ wátána haduduána,
agáiáná PUEꞌ riꞌi to nasalaꞌi.
4 Tauna to pebuku, mantámbái oaꞌ rángána,
agáiáná tauna to meahiahiꞌ, rapálehi riꞌi rángána.
5 Sabiꞌ dongkoꞌ bateꞌna ina molámbiꞌ pehuku,
noꞌonoꞌ woꞌo tauna to naundeꞌ oaꞌ mohuwárá dongkoꞌ.
6 Handaꞌ tauna to moundeꞌ mopagóeꞌ laluna tauna to mapángkáꞌ lántiꞌna,
hai upu-upu tauna mau mamporángá to tiꞌara bohiꞌ.
7 Tauna to meahiahiꞌ tiꞌara raundeꞌ-undeꞌ upu-upu halalunaheꞌ,
apa mani rángána.
Kehapiꞌ mekióꞌ-kióꞌ, tiꞌara ara to motulungi.
8 Heáná to moundeꞌ molámbiꞌ kapánde,
mobiláꞌ wátána haduduána,
heáná to mampopolumao oaꞌ paturoꞌ to nalámbiꞌ,
ina morasiꞌ.
9 Sabiꞌ dongkoꞌ bateꞌna ina molámbiꞌ pehuku,
noꞌonoꞌ woꞌo tauna to naundeꞌ oaꞌ mohuwárá dongkoꞌ, ina rapatuna.
10 Kameawaꞌ tiꞌara hintotoꞌ i tauna to bebe,
tiꞌara woꞌo hintotoꞌ ane hawiꞌ mopárentá tadulako.
11 Tauna to bukeꞌ timbá, nabuku momeeꞌ kamabukoꞌna,
hai ia ratóiá láwiꞌ tiꞌara mopailalu salaꞌna hángká rángána.
12 Kamabukoꞌna datu melááꞌ-lááꞌi, nodo perenggena singá,
agáiáná kamaroꞌana laluna, nodo namu to moloeꞌi rumpuꞌ.
13 Ánángkóiꞌ to mengkuliꞌ, mopamasusa laluna umána,
towawine to mohioro oaꞌ hai toámána,
nodo udá to tudoꞌ oaꞌ hangko i atuꞌ to hoboꞌ.
14 Támbi hai párewá ia miꞌi sosora hangko i toioruntaꞌ,
agáiáná towawine to bukeꞌ pekiri ia miꞌi pewátiꞌ hangko i PUEꞌ i toámána.
15 Tauna to lohe moundeꞌ letaꞌ oaꞌ,
hai tauna to tiꞌara mau mobágóꞌ ina marimi.
16 Tauna to mampeuláꞌi párentá, mokámpái katueꞌna,
agáiáná tauna to tiꞌara mokámpái rárá katueꞌnab ina mate.
17 Heáná to motulungi tauna to i wóiꞌ tueꞌna, mampopoindá PUEꞌ.
PUEꞌ rái to ina moháwángi bábehiána to maroꞌa iti.
18 Nukámbáróá ánáꞌmu, láwiꞌ ara mani pehárungámu
ia ina mobáliki bábehiána to tiꞌara maroꞌa.
Ane tiꞌara nupaturoꞌ, hibali peá
hai nuꞌundeꞌ ina molámbiꞌ rugiꞌ.
19 Nipatodáhi peá tauna to kawiáꞌ gaga mabukoꞌ,
ia rái mohádiá wuaꞌna.
Ineeꞌ nubaiari dendána, láwiꞌ ane nutulungiꞌi,
ina nahuleꞌ-huleꞌ peá bábehiána.
20 Nupehádingi paturoꞌ hai nupeuláꞌi,
bona i alo to ina haweꞌ, mewaliꞌkoꞌ tauna to manótó lalumu.
21 Handaꞌ to raliwo tauna,
agáiáná PUEꞌ to mopakanótó apa to mewaliꞌ.
22 Poánti to rapengáihi ia miꞌi bona tauna tetidaꞌ.
Maroꞌa mani to meahiahiꞌ haneꞌi mewaliꞌ topodongkoꞌ.
23 Mengkoruꞌkoꞌ i PUEꞌ bona matinuwuꞌkoꞌ,
ina tinda lalumu hai karaoꞌkoꞌ hangko i rugiꞌ.
24 Ane tauna to lohe ina mandeꞌ,
mogalo riꞌi mopáhóꞌ pandeꞌna, nakatonggo.
25 Ane tauna to paka mopakóiꞌ hángká rángána rakatóángi,
tauna to tiꞌara mani hangka iumbá pekirina meguru hangko ionoꞌ.
Ane tauna to bukeꞌ pekiri rakámbáróá, mantámbái kamanótóna laluna.
26 Ánáꞌ to mampopeahiahiꞌ hai mowura tosaena,
mopakadake hangaꞌna hai mopakahiliá wátána haduduána.
27 Ánáꞌkuꞌ, ane tiꞌarapokoꞌ mau meguru,
ina nukáláliꞌá apa to nupegurui miꞌi.
28 Sabiꞌ dongkoꞌ mokada-kada pobutusi,
hai tauna to kadake moundeꞌ oaꞌ to kadake,
nodo to moundeꞌ peá pandeꞌ to matamaꞌ-tamaꞌ.
29 Timama miꞌi pehuku i tauna to paka mesasalaꞌi,
hai tauna to mengkuli, timama miꞌi pekándángina káduꞌna.