18
Tauna to moundeꞌ peá mopapatani,mampekiri peá wátána haduduána.
Ia moewaꞌ upu-upu paturoꞌ to maroꞌa.
2 Tauna to bebe tiꞌara mau raweꞌi paturoꞌ,
naundeꞌ peá mampopolumao pekirina haduduána.
3 Ane tauna mobábehi to kadake, ia ina rasalaꞌi,
ane mobábehi to mepakahiliá, hangaꞌna kedái.
4 Polaluitana tauna to bukeꞌ timbá kaladu,
hai mepatueꞌ nodo uwai to moili.
5 Tiꞌara maroꞌa mamperuruꞌi tauna to kadake,
tiꞌara woꞌo maroꞌa mohuku tauna to tiꞌara ara salaꞌna.
6 Polaluitana tauna to bebe mopaꞌara pombeheheꞌ,
hai tauna to mohádi moundeꞌ mopahái to bebe iti.
7 Tauna to bebe manawoꞌ ánti polaluitana,
nodo to kana heáꞌna haduduána.
8 Ara tauna to moundeꞌ mohádi laluita to mepakadake,
láwiꞌ mesuaꞌ i laluraꞌ.
9 Tauna to tiꞌara mohaileꞌ bágóꞌna,
hibali hai tauna to mepakarugiꞌ.
10 Hangaꞌna PUEꞌ nodo támbi peantoꞌá to maróhó.
Tauna to manótó manggagu lao mengkatueꞌ i Hia.
11 Agáiáná topebuku mohárungá kapebukuna,
láwiꞌ napekiri nodo bente to mapángkáꞌ.
12 Tauna to mampepemahile ina rapakanawoꞌ,
agáiáná tauna to mengkaiwóiꞌ ina rabiláꞌ.
13 Tauna to mohániki pekuneꞌ hangko tiꞌara mani nahádi mpakaroꞌa,
mopaꞌara peá kamahilina hai mopatongawaꞌ kabebena.
14 Tauna to moundeꞌ mani tueꞌ,
nabuku mantódihá kapári,
agáiáná ane tiꞌara piꞌi ara pehárungána,
heáná paꞌi to nabuku mantódihá?
15 Tauna to mapánde, moundeꞌ mantámbái kamapándena,
tauna to bukeꞌ pekiri, moundeꞌ oaꞌ mampehádingi paturoꞌ.
16 Ane ara to nuweꞌi tauna to mapángkáꞌ lántiꞌna,
ia ina góeꞌ mampohidupaꞌákoꞌ.
17 Tauna to rungu-runguna molaluita i pohodaꞌ-hodaꞌá kara-kara,
rarekeꞌ pekana.
Agáiáná i tempóna timbálina molaluita,
hangko manótó riꞌi heáná mpuꞌu to pekana.
18 Ane tauna mosisalaꞌ, rabolobiaꞌ bona mengkarooheꞌ.
Mogalo riꞌi posisalaꞌraꞌ tauna to makuasaꞌ,
ane rabolobiaꞌ, manótó karabutusina.
19 Magampaꞌ mani mesuaꞌ i kótá to maróhó bentena,
haneꞌi mohungkuki halalu to rapamahái laluna.
Posisalaꞌ peisá mewaliꞌ parailiꞌ,
nodo babaꞌ to rahola rapakaróhó.
20 Ane laluita to rahuwárá mobunduꞌ,
maroꞌa woꞌo wuaꞌna,
nodo pandeꞌ to matamaꞌ hai mepamabuhu.
21 Laluita peisá mepatueꞌ ba mepakarugiꞌ.
Tauna to paka molalaluita ina mampohurunga
wuaꞌna laluita to nahuwárá.
22 Morasiꞌ ntepuꞌu tobaleilo to mampohambokoá towawine to maroꞌa,
láwiꞌ iti miꞌi pewátiꞌ hangko i PUEꞌ.
23 Tauna to meahiahiꞌ, membiáꞌ hangko i pengkaiwóiꞌ lalu,
agáiáná tauna to pebuku, mehániki hai laluita to makasaraꞌ.
24 Ara rángántaꞌ to mepakarugiꞌ,
agáiáná ara woꞌo rángántaꞌ to hungkuꞌ ntepuꞌu
hangko i halalu hampembolo-mbolontaꞌ.