17
Maroꞌa mani mandeꞌ hampáhóꞌ andeꞌá i lalu pohintuwuꞌ,haneꞌi mandeꞌ pandeꞌ posusaa i lalu posisalaꞌ.
2 Hawiꞌ to matáká ina melumbuꞌ kuasaꞌna hangko i ánáꞌ to mepakahiliá,
hai hawiꞌ iti ina molámbiꞌ woꞌo sosora hingkakani hai halaluna ánáꞌ iti.
3 Nodo buláwá hai peráꞌ rapáresáꞌ i api
bona rapamagasaꞌ,
noꞌonoꞌ woꞌo PUEꞌ mopáresáꞌ laluna tauna
bona mewaliꞌheꞌ woꞌo magasaꞌ.b
4 Tauna to kadake mampeuláꞌi paturoꞌ to kadake,
topodongkoꞌ moundeꞌ mampehádingi laluita to mepakanawoꞌ.
5 Heáná to mopakóiꞌ tauna to meahiahiꞌ tueꞌraꞌ,
hibali hai mopakóiꞌ Pueꞌ Ala to mampopewaliꞌheꞌ,
hai heáná to góeꞌ moita tauna molámbiꞌ kapári,
bateꞌna ina rahuku.
6 To rapogóeꞌ tosae iamoheꞌ ánáꞌraꞌ hai ueꞌraꞌ,
to napogóeꞌ ánáꞌ iamoheꞌ tosaena.
7 Tiꞌara hintotoꞌ laluita to mobunduꞌ nahuwárá tauna to bebe,
pelumbuꞌna mani, tiꞌara hintotoꞌ ane tadulako mohuwárá laluita dongkoꞌ.
8 Ara to mampekiri dóiꞌ sogoꞌ nodo mutiá to moánti rasiꞌ,
láwiꞌ narekeꞌ ina naporasiꞌi ane mampeweꞌi dóiꞌ sogoꞌ.
9 Ane nuámpungi to masalaꞌ i hio,
mopakaróhókoꞌ pohintuwuꞌ,
agáiáná ane nupodarita riꞌi kamasalaꞌna iti,
modepuꞌkoꞌ pobale hai poádáꞌ.
10 Ane tauna to bukeꞌ pekiri rakámbáróá,
hangkani peá gáná miꞌi,
agáiáná tauna to mengkuli, kehapiꞌ rahepe hangatu kánina,
tiꞌara mobunduꞌ i hia.
11 Tauna to kadake moundeꞌ peá meꞌewaꞌ,
agáiáná kahópóꞌána ara tauna to ina rahuoꞌ
lao mohuku hai pehuku to matimi.
12 Maroꞌa mani mampohidupaꞌá beruá
to mabukoꞌ láwiꞌ matántá ánáꞌna,
haneꞌi tauna to bebe to mampotudali kabebena.
13 Heáná to moháwángi bábehiá to maroꞌa
hai bábehiá to kadake,
ina molámbiꞌ oaꞌ kapári i támbina.
14 Pantepuꞌuána posisalaꞌ nodo wuhuꞌ to hoboꞌ,
mewaliꞌ mengkarookou mosisalaꞌ hangko tiꞌara manikou hurewuꞌ.
15 Rompákáꞌ to nakáhihiꞌ PUEꞌ:
mampokana tauna to salaꞌ,
hai mosalaꞌi tauna to tiꞌara masalaꞌ.
16 Apa bunduꞌna tauna to matuꞌa laluna mobaiari
bona molámbiꞌ kanótó lalu,
ane tiꞌara mau mewaliꞌ tauna to bukeꞌ pekiri.
17 Balentaꞌ ba ádáꞌtaꞌ mopatongawaꞌ oaꞌ kamaꞌahiꞌna,
hai halaluntaꞌ motulungikeꞌ i tempóntaꞌ mapári.
18 Tauna to tiꞌara bukeꞌ timbá
modándi ina mohómpóki indána hángká rángána.
19 Tauna to moundeꞌ mosisalaꞌ, moundeꞌ madósá,
tauna to mampepemahile, mampeliꞌ peá kahurewuꞌána.
20 Tauna to tiꞌara manoroꞌ laluna, tiꞌara ina maroꞌa katueꞌna,
tauna to mogoli-goli laluita, ina molámbiꞌ huleáká.
21 Tauna to mampoánáꞌ ánángkóiꞌ to tiꞌara mepehádingi
ina wiora hai tiꞌara góeꞌ laluna.
22 Kagóeꞌ-góeꞌ nodo pákupu to pemoso,
agáiáná kasusa lalu mepamaledeꞌ.
23 Topobutusi to tiꞌara manoroꞌ motarima ngkábuni dóiꞌ sogoꞌ,
bona pobutusina tiꞌara hintimbá.
24 Tunggáiána tauna to bukeꞌ pekiri, bona molámbiꞌ kanótó lalu,
agáiáná pampekirina tauna to bebe tiꞌara mokanótóá.
25 Ánáꞌ to bebe mopamasusa laluna umána,
hai mopawiora laluna inána.
26 Tauna to tiꞌara masalaꞌ, tiꞌara hintotoꞌ radenda,
noꞌonoꞌ woꞌo, tauna to maroꞌa, tiꞌara hintotoꞌ rapahái.
27 Tauna to bukeꞌ pekiri, mokámpái polaluitana,
tauna to bukeꞌ timbá, tinda oaꞌ laluna.
28 Mogalo riꞌi tauna to bebe ina rarekeꞌ to mapánde hai bukeꞌ pekiri,
ane maniiꞌ-niiꞌ peá hai tiꞌara mobungkáhi humena.