16
Tauna peisá mampekiri apa to ina nauliꞌ,agáiáná PUEꞌ riꞌi to mopakanótó pehániꞌna.
2 Upu-upu bábehiána tauna, maroꞌa mouláꞌ polámbiꞌna haduduána,
agáiáná PUEꞌ moisá tunggáiána laluna.
3 Nupaisarenga i PUEꞌ upu-upu to nubábehi,
bona to nuliwo iti mewaliꞌ aha.
4 Hinángkáꞌ to nabábehi PUEꞌ, ara tunggáiána,
hai Ia mopakanótó miꞌi, tauna to kadake hangaa-ngaa Nahuku.a
5 Upu-upu tauna to mampepemahile, nakáhihiꞌ PUEꞌ,
hai bateꞌna tiꞌaraheꞌ ina tekábáhá hangko i pehuku.
6 Tauna to tetidaꞌ hai bukeꞌ ahiꞌ, ina molámbiꞌ peámpungi,
tauna to mengkoruꞌ i PUEꞌ, mokaraohi bábehiá to kadake.
7 Ane rárá katueꞌmu napokagóeꞌ PUEꞌ,
mogalo riꞌi ewálimu, Napopodame hai io.
8 Maroꞌa mani hantóiꞌ to nulámbiꞌ moliu rárá to maroꞌa,
haneꞌi handaꞌ to nulámbiꞌ moliu rárá to tiꞌara hintotoꞌ.
9 Tauna peisá mopaꞌara poliwo,
agáiáná PUEꞌ riꞌi to mopakanótó apa to mewaliꞌ.
10 Ane datu molaluita, ia mopahaweꞌ to hangko i Pueꞌ Ala,
mewaliꞌ, pobutusina tiꞌara ara to masalaꞌ.b
11 PUEꞌ moundeꞌ tauna to manoroꞌ pobaluꞌ-baluꞌna,
to mopakeꞌ popehukáꞌ hai popetimbá to toꞌu.
12 Bábehiá to kadake nakáhihiꞌ datu,
láwiꞌ popárentána maróhó ane taunána tueꞌheꞌ i kamanótó.
13 Laluita to toꞌu napogóeꞌ datu.
Ia mampomahile tauna to molaluita i katoꞌu-toꞌuána.
14 Ane datu mabukoꞌ, peisá mampehuoꞌá tauna rahuku mate,
agáiáná tauna to bukeꞌ pekiri peisá mopamalulu kamabukoꞌna datu.
15 Kamaroꞌana laluna datu moánti katueꞌ to maroꞌa i taunánaheꞌ,
nodo gawu to moánti udá i tempó mantudaꞌ.
16 Maroꞌa mani molámbiꞌ kanótó lalu hai kapánde,
haneꞌi molámbiꞌ buláwá hai peráꞌ.
17 Tauna to manótó, mokaraohi bábehiá to kadake,
tauna to mokámpái rárá katueꞌna, mokámpái wátána haduduána.
18 Tauna to mampepemahile, ina rapakanawoꞌ,
tauna to maꞌángkáꞌ, ina molámbiꞌ huleáká.
19 Maroꞌa mani mengkaiwóiꞌ
hingkakani hai tauna to meahiahiꞌ,
haneꞌi meuláꞌ i tauna to mampepemahile
hai mampogóeꞌ párewá to raperampaꞌi.
20 Heáná to mopailalu paturoꞌ, ina maroꞌa katueꞌna,
hai morasiꞌ miꞌi tauna to mehárungá i PUEꞌ.
21 Tauna to manótó laluna rauliꞌ to bukeꞌ timbá,
hai polaluitana modiiꞌ laluraꞌ tauna, haneꞌi rapoinálái ntepuꞌu.
22 Kanótó lalu nodo uwai to tumbuꞌ to mopaꞌara katueꞌ
i tauna to manótó laluna,
agáiáná tauna to bebe molámbiꞌ kapári
ánti kabebena haduduána.
23 Laluita to bukeꞌ timbá
mentóáꞌ hangko i pekiri tauna to bukeꞌ kanótó lalu,
hai apa to napolaluita
modiiꞌ laluraꞌ tauna haneꞌi rapoinálái ntepuꞌu.
24 Laluita to mepagóeꞌ, matáni nodo tináháꞌ
to mopakaróhó wátá tauna.
25 Ara rárá to rarekeꞌ tauna manoroꞌ,
mole menóntó riꞌi i kapate.c
26 Tauna to marimi mobágóꞌ matimi,
bona ara to peisá naꞌandeꞌ.
27 Tauna to kadake mampeliꞌ rárá bona mopakanawoꞌ hángká rángána.
Polaluitana mopakadake tauna nodo api to meráruꞌi.d
28 Tauna to mebagiuꞌ mopaꞌara posisalaꞌ.
Tauna to mopakadake hángká rángána, mopaꞌara woꞌo posisalaꞌ,
álána tiꞌara piꞌi maróhó pobaleraꞌ ba poádáꞌraꞌ.
29 Tauna to maseke mokeloꞌ hángká rángána,
bona mobábehiheꞌ to tiꞌara maroꞌa.
30 Maingáꞌ-ingáꞌkoꞌ i tauna to kamongimongiꞌ hai mekapidi,
láwiꞌ ia moliwo mobábehi to kadake.
31 Tauna to manótó rárá katueꞌna ina matinuwuꞌ,
ubána nodo tatali datu, tandaꞌ karabiláꞌna.
32 Maroꞌa mani tauna to sabaraꞌ hai mokuasaꞌi wátána haduduána,
haneꞌi surudadoꞌ to mokuasaꞌi hambuaꞌ kótá.
33 Tauna mobolobiaꞌ bona raisá apa to hangaa-ngaa rabábehi,
agáiáná PUEꞌ riꞌi to mopakanótó apa to mewaliꞌ.