15
Kamabukoꞌ mauraꞌ ane rahániki hai laluita to maꞌálusuꞌ,agáiáná mantámbái ane rahániki hai laluita to makasaraꞌ.
2 Polaluitana tauna to manótó laluna, modiiꞌ laluraꞌ tauna,a
agáiáná tobebe mampopempuai peá kabebena.
3 PUEꞌ moita upu-upu to mewaliꞌ iumbá-umbá peá,
Ia mokamata upu-upu tauna, to maroꞌa hai to kadake.
4 Laluita to maꞌálusuꞌ mopakaróhó laluna tauna,
nodo kau to moánti katueꞌ,
agáiáná laluita to meákálángi,
mopamahái laluna tauna.
5 Tauna to bebe, tiꞌara mampeuláꞌi paturoꞌna tosaena,
agáiáná tauna to bukeꞌ pekiri, mampehádingi pekámbáróá.
6 I támbina tauna to manótó, handaꞌ ntepuꞌu párewá,
agáiáná polámbiꞌna tauna to kadake mopaꞌara handaꞌ kapári.
7 Tauna to bukeꞌ pekiri, mopahaweꞌ apa to naisá,
agáiáná pekirina tauna to bebe, tiꞌara mobunduꞌ.
8 PUEꞌ mokáhihiꞌ popenómbána tauna to kadake,
agáiáná góeꞌ mohádi pekakaena tauna to bulá laluna.
9 PUEꞌ mokáhihiꞌ rárá katueꞌna tauna to kadake,
agáiáná mampokaꞌahiꞌ tauna to madota mobábehi oaꞌ to maroꞌa.
10 Tauna to tiꞌara piꞌi mouláꞌ rárá to toꞌu,
ina molámbiꞌ pehuku to matimi.
Tauna to tiꞌara mau rakámbáróá, ina mate.
11 PUEꞌ moisá upu-upu to mewaliꞌ i duniáꞌraꞌ tomate,
mewaliꞌ pelumbuꞌna mani Ia moisá
apa to i pekirina tauna to tueꞌ mani.
12 Tauna to paka mesasalaꞌi, tiꞌara motarima pekámbáróá,
hai tiꞌara woꞌo mau membiáꞌ paturoꞌ i tauna to bukeꞌ timbá.
13 Ane góeꞌ laluntaꞌ, tongawaꞌ i lindoꞌtaꞌ,
agáiáná ane mapári katueꞌtaꞌ, masusa laluntaꞌ.
14 Tauna to bukeꞌ pekiri, moundeꞌ motámbái kamapándena,
agáiáná tauna to bebe, moundeꞌ peá mantámbái kabebena.
15 Tauna to meahiahiꞌ, masusa oaꞌ katueꞌna,
agáiáná tauna to góeꞌ, nodo to mosusa oaꞌ.
16 Maroꞌa mani mengkoruꞌ i PUEꞌ, kehapiꞌ tiꞌara handaꞌ párewá,
haneꞌi handaꞌ párewá, agáiáná tiꞌara ara katinda lalu.
17 Maroꞌa mani mandeꞌ haloꞌ to hantódiꞌ i lalu pombepokaꞌahiꞌ,
haneꞌi mandeꞌ handaꞌ bauꞌ gapiꞌ i lalu pombekáhihiꞌ.
18 Tauna to kawiáꞌ mabukoꞌ mopaꞌara posisalaꞌ,
agáiáná tauna to sabaraꞌ mopaꞌara podame.
19 Katueꞌna tauna to lohe, bukeꞌ kapári,
agáiáná katueꞌna tauna to maroꞌa, tiꞌara ara to mosalempori.
20 Ánáꞌ to bukeꞌ pekiri, mopagóeꞌ umána,
agáiáná ánáꞌ to mengkuli, tiꞌara mobiláꞌ inána.
21 Tauna to bebe, góeꞌ oaꞌ hai kabebena,
agáiáná tauna to mapánde, mobábehi oaꞌ apa to maroꞌa.
22 Poliwo tiꞌara ina mewaliꞌ ane tiꞌara rapekiri mpakaroꞌa,
agáiáná ane handaꞌ to mepatente, to raliwo ina mewaliꞌ.
23 Góeꞌ laluna tauna ane pehániꞌna kánáhilá,
noꞌonoꞌ woꞌo, maroꞌa ntepuꞌu laluita to rahuwárá i tempóna raparaluu.
24 Katueꞌna tauna to manótó laluna, monóntóhi katueꞌ to maroꞌa,
bona tiꞌara lao i duniáꞌraꞌ tomate.
25 Támbina tauna to mampepemahile nagero PUEꞌ,
agáiáná Ia mampeámpárái watu
petándái páráiliꞌna tampoꞌna tobembaꞌ.b
26 PUEꞌ mokáhihiꞌ liwo to kadake,
agáiáná laluita to maroꞌa mopagóeꞌ laluNa.
27 Heáná to tiꞌara mau motarima dóiꞌ sogoꞌ,
maroꞌa katueꞌna,
agáiáná heáná to mampeliꞌ rasiꞌ moliu rárá to tiꞌara hintotoꞌ,
mopakarugiꞌ tinána haduduána.
28 Tauna to manótó, mampekiri sieruꞌ,
hangko tiꞌara mani mehániꞌ,
agáiáná tauna to kadake,
kásáliu mohuwárá laluita to kadake.
29 PUEꞌ mampehádingi pekakaena tauna to manótó,
agáiáná mokaraohi i tauna to kadake.
30 Tauna to kamongimongiꞌ, mopagóeꞌ hángká rángána,
noꞌonoꞌ woꞌo, bámbári to maroꞌa mopakaróhó buꞌu.
31 Tauna to mopailalu pekámbáróá to moánti katueꞌ,
ia tepasuaꞌ tauna to bukeꞌ pekiri.
32 Tauna to tiꞌara mau rapaturoꞌ
tiꞌara mobiláꞌ wátána haduduána,
agáiáná tauna to motarima pekámbáróá
mantámbái kamanótóna laluna.
33 Mengkoruꞌ i PUEꞌ ia miꞌi rárá
bona molámbiꞌ kanótó lalu,
hai tauna to mengkaiwóiꞌ ina rabiláꞌ.