14
Towawine to bukeꞌ timbá, moisá mokádipurá tinána,agáiáná towawine to bebe, mogero potina.
2 Tauna to mobábehi oaꞌ to manoroꞌ,
mengkoruꞌ i PUEꞌ,
agáiáná tauna to tiꞌara manoroꞌ bábehiána,
mopakadake hangaꞌna PUEꞌ.
3 Tauna to bebe molámbiꞌ pehuku
ánti polaluitana to mampepemahile,
agáiáná polaluitana tauna to bukeꞌ pekiri
mokámpái wátána haduduána.
4 Ane tiꞌara ara gapiꞌ, tiꞌara ara pare,
agáiáná ánti kamaróhóna gapiꞌ, handaꞌ wuaꞌna powiáꞌtaꞌ.
5 Sabiꞌ to peisá rapoinálái, tiꞌara mopahaweꞌ dongkoꞌ,
agáiáná sabiꞌ dongkoꞌ, mopahaweꞌ peá oaꞌ to tiꞌara toꞌu.
6 Tauna to handaꞌ pesasalaꞌina, mampeliꞌ kapánde,
agáiáná tiꞌara nalámbiꞌ.
Tauna to mataru pekirina,
saru-saru mantámbái kamapándena.
7 Nukaraohi tauna to lohe mampekiri,
láwiꞌ tiꞌara ara to ina napaturoꞌákoꞌ.
8 Tauna to bukeꞌ timbá, moisá apa to ina nabábehi,
agáiáná tauna to bebe, napakanawoꞌ kabebena.
9 Tauna to bebe, motitibei popenómbá pohómpóki salaꞌ,a
agáiáná tauna to bulá laluraꞌ, mopatongawaꞌ kamaroꞌaraꞌ hadua hai hadua.b
10 Kagóeꞌ hai kasusa lalu tahádiá haduduántaꞌ,
tiꞌara nahádiá tauna ntaniꞌ.
11 Bambaruꞌna tauna to bulá laluna ina maróhó oaꞌ,
agáiáná támbina tauna to kadake ina magero
hingkakani hai tauna to toroꞌ ionoꞌ.
12 Ara rárá to rarekeꞌ tauna manoroꞌ,
mole menóntó riꞌi i kapate.c
13 Kehapiꞌkeꞌ matawa, laluntaꞌ peisá wiora,
hai kagóeꞌ-góeꞌ peisá mewaliꞌ kasusa lalu.
14 Tauna to mosapuáka Pueꞌ, ina molámbiꞌ wuaꞌna kakadakena,
agáiáná tauna to maroꞌa oaꞌ, ina molámbiꞌ wuaꞌna kamaroꞌana.
15 Tauna to tiꞌara mani hangka iumbá pekirina,
mampoinálái hinángkáꞌ laluita,
agáiáná tauna to bukeꞌ timbá,
mampekiri maroꞌa hangko ara to nabábehi.
16 Tauna to bukeꞌ timbá maingáꞌ-ingáꞌ
hai mokaraohi to kadake,
agáiáná tauna to bebe kásáliu mobábehi
apa to ara i pekirina,
láwiꞌ mamporóhó wátána haduduána.
17 Heáná to kawiáꞌ mabukoꞌ, tepasuaꞌ tauna to bebe,
hai heáná to moliwo to kadake, rakáhihiꞌ tauna.d
18 Tauna to tiꞌara hangka iumbá pekirina, tetámbái kabebena,
agáiáná tauna to bukeꞌ pekiri, mantámbái kamapándena.
19 Tauna to kadake ina motóngkóꞌ i lindoꞌna tauna to maroꞌa,
membiáꞌ bona rapokaꞌahiꞌ.
20 Tauna to meahiahiꞌ, tiꞌara raundeꞌ raporángá,
agáiáná tauna to pebuku, handaꞌ to moundeꞌ mamporángá.
21 Heáná to mopakóiꞌ hángká rángána mobábehi dósá,
agáiáná morasiꞌ miꞌi tauna to maꞌahiꞌ i tauna to mapári tueꞌna.
22 Heáná to madota mobábehi to maroꞌa,
rapokaꞌahiꞌ hai rapoinálái,
agáiáná heáná to moliwo mobábehi to kadake,
tiꞌara piꞌi mouláꞌ rárá to toꞌu.
23 Tauna to mobágóꞌ matimi, ina morasiꞌ,
agáiáná tauna to molaluita ntooꞌ, ina meahiahiꞌ oaꞌ tueꞌna.
24 Tauna to bukeꞌ pekiri rabiláꞌ tauna ánti kamanótóna laluna,
agáiáná tauna to bebe, motámbái peá kabebena.
25 Sabiꞌ to mampolaluita to toꞌu, mopatueꞌ tauna,
agáiáná sabiꞌ to mampolaluita to tiꞌara toꞌu, mopakarugiꞌ tauna.
26 Tauna to mengkoruꞌ i PUEꞌ, tinda laluna,
láwiꞌ naisá ia hai tinána nakámpái oaꞌ PUEꞌ.
27 Pengkoruꞌtaꞌ i PUEꞌ nodo uwai to tumbuꞌ to mopaꞌara katueꞌ,
álána tauna tekábáhá hangko i kapate.
28 Kamaróhóna datu mentóáꞌ i kahandaꞌna taunána,
agáiáná ane tiꞌara ara taunána, tiꞌara woꞌo ara kuasaꞌna.
29 Tauna to sabaraꞌ, ia miꞌi tauna to bukeꞌ pekiri,
agáiáná tauna to hengkeꞌ, mampopempuai peá kabebena.
30 Katinda lalu mopakaróhó wátá,
agáiáná kamahiniꞌ mopakaledeꞌ buꞌu.
31 Heáná to mampopeahiahiꞌ tauna to i wóiꞌ tueꞌraꞌ,
mopakóiꞌ Pueꞌ Ala to mampopewaliꞌheꞌ,
agáiáná heáná to mampokaꞌahiꞌ tauna to meahiahiꞌ,
mampomahile Pueꞌ.
32 Tauna to kadake, rapakanawoꞌ ánti kakadakena,
agáiáná tauna to manótó, rakámpái ánti kabulána laluna.
33 Kanótó lalu ara i tauna to bukeꞌ pekiri,
agáiáná tiꞌara ara i tauna to bebe.
34 Ane tauna i kadatuá tueꞌ i kamanótó,
kadatuá iti ina rapomahile,
agáiáná ane tauna tueꞌ i kamadósá,
kadatuá iti ina rapakahiliá.
35 Topobágóꞌ to matáká mopagóeꞌ laluna datu,
agáiáná datu mabukoꞌ i topobágóꞌ to mepakahiliá.