13
Ánáꞌ to bukeꞌ pekiri, mampehádingi paturoꞌna tosaena,agáiáná tauna to moundeꞌ peá mepakóiꞌ,
tiꞌara mampehádingi pekámbáróá.
2 Tauna to maroꞌa polaluitana ina molámbiꞌ rasiꞌ,
agáiáná tauna to tiꞌara tetidaꞌ, naundeꞌ peá oaꞌ maseke.
3 Tauna to mokámpái polaluitana,
ina mokámpái woꞌo katueꞌna,
agáiáná tauna to molaluita kaꞌapa-apaꞌána,
ina molámbiꞌ kapári.
4 Handaꞌ to napoinao tolohe, agáiáná mbero-mbero peá,
ngkáliꞌna riꞌi tauna to madota ina molámbiꞌ upu-upu to napoinao.
5 Tauna to manótó mokáhihiꞌ dongkoꞌ,
agáiáná bábehiá tauna to kadake mepakahiliá
hai mopamarugiꞌ wátána haduduána.
6 Tauna to manótó rárá katueꞌna, nakámpái kamanótóna haduduána,
agáiáná tauna to madósá, napakarugiꞌ kakadakena haduduána.
7 Ara tauna to meahiahiꞌ, agáiáná mampe to pebuku,
ara woꞌo topebuku, agáiáná mampe to meahiahiꞌ.
8 Topebuku peisá mopakeꞌ kapebukuna bona mohómpóki tueꞌna,
agáiáná topeahiahiꞌ tiꞌara ina rapahurewuꞌ tauna.
9 Tauna to manótó nodo huluꞌ to mewangkaꞌ ntepuꞌu,
agáiáná tauna to kadake nodo palita to ina mate.
10 Tauna to mampepemahile, mopaꞌara peá posisalaꞌ,
agáiáná tauna to bukeꞌ pekiri, mampehádingi paturoꞌ.
11 Párewá to madoli ralámbiꞌ, ina poloꞌ upu,
agáiáná párewá to rarámpu hantódiꞌ-hantódiꞌ, ina mantámbái.
12 Ane to tahárungá tiꞌara tepabukeꞌi, masusa laluntaꞌ,
agáiáná ane peundeꞌántaꞌ tepabukeꞌi, góeꞌ laluntaꞌ.
13 Heáná to tiꞌara mampehádingi paturoꞌ,
ina mopamarugiꞌ wátána haduduána,
agáiáná heáná to mampeuláꞌi párentá,
ina molámbiꞌ háwángina to maroꞌa.
14 Paturoꞌna tauna to manótó laluna
nodo uwai to tumbuꞌ to mopaꞌara katueꞌ,
álána tauna {to mampeuláꞌi paturoꞌ iti} tekábáhá hangko i kapate.
15 Tauna to bukeꞌ timbá rabiláꞌ,
agáiáná tauna to tiꞌara peisá rapoinálái,
mopamarugiꞌ wátána haduduána.
16 Tauna to bukeꞌ timbá mampekiri sieruꞌ
hangko mobábehi apa to naliwo,
agáiáná tauna to bebe mampopempuai kabebena.
17 Huoꞌá to tiꞌara peisá rapoinálái
mopakanawoꞌ wátána haduduána,
agáiáná huoꞌá to peisá rapoinálái
mopaꞌara pohintuwuꞌ.
18 Tauna to tiꞌara mau mampehádingi paturoꞌ,
ina meahiahiꞌ hai rapakahiliá,
agáiáná tauna to mopailalu pekámbáróá
ina rabiláꞌ.
19 Tauna góeꞌ ane molámbiꞌ apa to napoinao,
agáiáná tobebe tiꞌara moundeꞌ mokábáhá kakadakena.
20 Tauna to mamporángá to bukeꞌ pekiri,
ina mantámbái kamataruna pekirina,
agáiáná tauna to mamporángá tobebe,
ina molámbiꞌ rugiꞌ.
21 Tauna to madósá, paka molámbiꞌ kapári,
agáiáná tauna to manótó, paka molámbiꞌ kagóeꞌ-góeꞌ.
22 Tauna to maroꞌa mowoli sosorana i pemuleꞌánaheꞌ,
agáiáná kapebukuna tauna to madósá
kahópóꞌána ina raweꞌi tauna to manótó.
23 Tampoꞌraꞌ tauna to meahiahiꞌ peisá handaꞌ wuaꞌna,
agáiáná wuaꞌna paka raperampaꞌi tauna to tiꞌara manoroꞌ.
24 Heáná to tiꞌara mau mohepe ánáꞌna,
tiꞌara mampokaꞌahiꞌ ánáꞌna,
agáiáná heáná to mampokaꞌahiꞌ ánáꞌna,
nakámbáróá ane masalaꞌ.
25 Tauna to manótó, magáná oaꞌ pandeꞌna,
agáiáná tauna to kadake, marimi oaꞌ.