12
Heáná to naundeꞌ rapaturoꞌ, moundeꞌ woꞌo kapánde,agáiáná heáná to mokáhihiꞌ pekámbáróá, ia miꞌi tauna to bebe.
2 Tauna to maroꞌa napokagóeꞌ PUEꞌ,
agáiáná tauna to moliwo mobábehi to kadake ina molámbiꞌ pehuku.
3 Tauna to kadake bábehiána, tiꞌara monónó katueꞌna,
agáiáná tauna to manótó, maroꞌa katueꞌna,
nodo peángkáꞌna kau to maróhó kálándána.
4 Towawine to matáká, mopagóeꞌ laluna toámána,
agáiáná towawine to mepakahiliá, mopamahái laluna toámána.
5 Tauna to manótó, moliwo mobábehi to hintotoꞌ,
agáiáná tauna to kadake, moliwo peákálángi.
6 Laluitana tauna to kadake mopaꞌara kapate,
agáiáná polaluitana tauna to manoroꞌ mopatueꞌ tauna.
7 Tauna to kadake ina rapakanawoꞌ haneꞌi tunamoheꞌ,
agáiáná tauna to manótó ina monónó katueꞌna haweꞌ i pemuleꞌána.
8 Tauna to bukeꞌ timbá ratóiá,
agáiáná tauna to tiꞌara maroꞌa poántina rakáhihiꞌ.
9 Maroꞌa mani mewaliꞌ tauna biásá, agáiáná ara bágóꞌna,a
haneꞌi mampetuá, mole riꞌi makuraꞌ pandeꞌna.
10 Tauna to maroꞌa moisá mokádipurá binataꞌna,
agáiáná kamasodona tauna to kadake,
narekeꞌ miꞌi bábehiá iti maroꞌa.
11 Tauna to madota mampobágóꞌ tampoꞌna,
ina magáná oaꞌ pandeꞌna,
agáiáná tauna to moundeꞌ peá mobábehi to tiꞌara mobunduꞌ,
ia miꞌi tauna to tiꞌara ara pekirina.
12 Tauna to kadake mampoinao molámbiꞌ párewá
hangko i to raperampaꞌi hangka to kadakena,
agáiáná katueꞌna tauna to manótó
mowuaꞌ nodo kau to maróhó kálándána.
13 Tauna to kadake napakarugiꞌ kakadakena polaluitana haduduána,
agáiáná tauna to manótó molámbiꞌ rárá ntaniꞌ bona tiꞌara marugiꞌ.
14 Tauna to mohuwárá laluita to maroꞌa,
molámbiꞌ háwángina to mahile,
noꞌonoꞌ woꞌo tauna to mobábehi to maroꞌa.
15 Mouláꞌ tauna to bebe,
upu-upu to nabábehi maroꞌa,
agáiáná heáná to moundeꞌ mampehádingi paturoꞌ,
ia miꞌi tauna to bukeꞌ pekiri.
16 Ane tauna to bebe rapamahái laluna, kásáliu mabukoꞌ pemiꞌi,
agáiáná ane tauna to bukeꞌ pekiri rapakóiꞌ, napatodáhi peá.
17 Sabiꞌ to manoroꞌ, molaluita i katoꞌu-toꞌuána,
agáiáná sabiꞌ dongkoꞌ, mampolaluita to tiꞌara toꞌu.
18 Polaluita to hówóꞌ-hówóꞌ peisá mopamahái laluna tauna,
nodo petohuꞌna pihoꞌ,
agáiáná polaluitana tauna to bukeꞌ pekiri,
nodo pákupu to mepakauriꞌ.
19 Laluita to toꞌu, peisá rapoinálái haweꞌ i rue-ruena,
agáiáná laluita to tiꞌara toꞌu, poloꞌ raisá tauna,
haneꞌi tiꞌara piꞌi rapoinálái.
20 Tauna to moliwo mobábehi to kadake,
bukeꞌ pebagiuꞌ,
agáiáná heáná to mopaturoꞌ tauna bona mohintuwuꞌheꞌ,
ia ina góeꞌ.
21 Tauna to manótó tiꞌara molámbiꞌ kapári,
agáiáná tauna to kadake molámbiꞌ handaꞌ kapári.
22 PUEꞌ mokáhihiꞌ tauna to modongkoꞌ,
agáiáná tauna to peisá rapoinálái Napokagóeꞌ.
23 Tauna to bukeꞌ pekiri tiꞌara kawiáꞌ mohuwárá
upu-upu to naisá,
agáiáná tauna to bebe mohuwárá peá to i pekirina,
haneꞌi tongawaꞌ kabebena.
24 Tauna to madota ina mewaliꞌ tadulako,
agáiáná tauna to lohe ina mewaliꞌ peá hawiꞌ.
25 Kasusa lalu mopamatimi laluna tauna,
agáiáná laluita to maroꞌa mopalindó.
26 Tauna to manótó mewaliꞌ pándiriꞌ i hángká rángána,b
agáiáná tauna to kadake mehupeꞌ hangko i rárá to toꞌu
ánti kakadakena haduduána.
27 Tauna to lohe tiꞌara mampopobunduꞌ apa to naporasiꞌi,
agáiáná tauna to madota molámbiꞌ kapebuku to mobunduꞌ ntepuꞌu.
28 Tauna to mobábehi to maroꞌa, ina maroꞌa katueꞌna,
agáiáná tauna to mouláꞌ rárá to kadake, menóntó i kapate.