11
PUEꞌ mokáhihiꞌ tauna to mopakeꞌ popehukáꞌ to mebagiuꞌ,agáiáná Ia góeꞌ i tauna to mopakeꞌ popetimbá to toꞌu.
2 Tauna to mampepemahile ina rapakahiliá,
agáiáná tauna to mengkaiwóiꞌ, ia to bukeꞌ kanótó lalu.
3 Tauna to manótó moisá mobábehi to manoroꞌ
hangko i kabulána laluna,
agáiáná tauna to moliungi dándina
ina napakanawoꞌ peákálángina haduduána.
4 Kapebuku tiꞌara mobunduꞌ ane haweꞌ miꞌi alona
Pueꞌ mopatongawaꞌ kamabukoꞌNa i tauna to kadake bábehiána,
agáiáná tauna to manótó rárá katueꞌraꞌ
ina tekábáhá hangko i kapate.
5 Tauna to manótó, maroꞌa rárá katueꞌna ánti kamanótóna,
agáiáná tauna to kadake manawoꞌ ánti kakadakena.
6 Tauna to manoroꞌ laluna ina tekábáhá hangko i kapate
láwiꞌ manótó bábehiána,
agáiáná tauna to moliungi dándina ina manawoꞌ
ánti peundeꞌána laluna to kadake.
7 Ane tauna to kadake mate, mate woꞌo pehárungána,
upu-upu to nahárungá i kamaróhóna haduduánaa tiꞌara mobunduꞌ.
8 Tauna to manótó tekábáhá hangko i kapári,
agáiáná tauna to kadake tiꞌara tetulungi.
9 Polaluitana tauna to tiꞌara mengkoruꞌ i Pueꞌ,
mopakarugiꞌ hángká rángána,
agáiáná tauna to manótó,
tepelae ánti pekirina to maroꞌa.
10 Ane tauna to manótó molámbiꞌ rasiꞌ,
tauna i lalu kótá góeꞌheꞌ,
hai mohoraꞌ-horaꞌheꞌ i kamatena tauna to kadake.
11 Katueꞌraꞌ tauna i kótá tetámbái kamaroꞌana,
ánti bábehiána hai polaluitana tauna to manoroꞌ,
agáiáná polaluitana tauna to kadake,
mopamarugiꞌ katueꞌraꞌ tauna i kótá.
12 Tauna to tiꞌara ara pekirina, motitibei hángká rángána,
agáiáná tauna to moisá apa to maroꞌa, maniiꞌ-niiꞌ peá.
13 Tauna to moánti-ánti laluita,
mowungkeꞌ to rawuniángi,
agáiáná tauna to peisá rapoinálái,
mowuniángi apa to tiꞌara paraluu raisá tauna.
14 Ane tiꞌara ara to motadulakoi,
kadatuá ina manawoꞌ,
agáiáná ane handaꞌ to mepatente,
kadatuá iti ina ara oaꞌ i kamaroꞌa-roꞌa.
15 Tauna to modándi ina mohómpóki indána to haduána,
ina molámbiꞌ kapári.
Rángina miꞌi ineeꞌ modándi noꞌonoꞌ
bona maroꞌa katueꞌna.
16 Towawine to maroꞌa poinaona, molámbiꞌ pebiláꞌ,
agáiáná tobaleilo to maseke, molámbiꞌ peá kapebuku.
17 Tauna to bukeꞌ ahiꞌ mampoporasiꞌ wátána haduduána,
agáiáná tauna to tiꞌara naisá maꞌahiꞌ mopamarugiꞌ wátána haduduána.
18 Rasiꞌna tauna to kadake, mbero-mbero i hia,
agáiáná rasiꞌna tauna to maroꞌa, tiꞌara ina upu.
19 Heáná to mobábehi oaꞌ to bábehiá to manótó, ina maroꞌa katueꞌna,
agáiáná heáná to mobábehi oaꞌ to kadake, molámbiꞌ kapate.
20 Tauna to tiꞌara manoroꞌ laluna, nakáhihiꞌ PUEꞌ,
agáiáná tauna to tiꞌara ara salaꞌiána, Napogóeꞌ.
21 Tauna to kadake bateꞌna ina molámbiꞌ pehuku,
agáiáná tauna to manótó haweꞌ-haweꞌ i pemuleꞌánaheꞌ,
ina tekábáháheꞌ hangko i pehuku.
22 Kamalásáꞌna towawine to tiꞌara moisá ádá,
hibali hai kálekeꞌ buláwá i hiló boeꞌ.
23 Peundeꞌána tauna to maroꞌa,
mopaꞌara to maroꞌa,
agáiáná peundeꞌána tauna to kadake,
mopaꞌara peá kamabukoꞌ.
24 Ara tauna to tiꞌara bohiꞌ, tetámbái riꞌi kapebukuna,
ara to maikiꞌ, agáiáná tetámbái riꞌi kamakuraꞌna.
25 Tauna to handaꞌ pampeweꞌina, ina molámbiꞌ handaꞌ pewátiꞌ,
tauna to moundeꞌ metulungi, ina molámbiꞌ woꞌo petulungi.
26 Heáná to motaha bahiꞌ bona peisá napobaluꞌ masuliꞌ,
rakáhihiꞌ tauna,
agáiáná heáná to mampobaluꞌ i tempóna raparaluu,
ratóiá tauna.
27 Heáná to madota mobábehi to maroꞌa,
ina rapokagóeꞌ tauna,
agáiáná heáná to mobábehi oaꞌ bábehiá to kadake,
ina molámbiꞌ rugiꞌ.
28 Heáná to mohárungá kapebukuna, ina manawoꞌ
nodo kamaránáꞌna taweꞌ to bangi,
agáiáná tauna to manótó, katueꞌna ina maroꞌa
nodo taweꞌ to maruduꞌ.
29 Tauna to mopaꞌara posisalaꞌ i lalu támbina,
tiꞌara ina molámbiꞌ apa-apa,
kahópóꞌána tauna to bebe iti
ina napohawiꞌ tauna to bukeꞌ pekiri.
30 Tauna to manótó nodo kau to moánti katueꞌ i tauna,
hai tauna to bukeꞌ pekiri ina moala laluraꞌ tauna.b
31 Ane tauna to manótó molámbiꞌ pehuku i duniáꞌ {ánti dósáraꞌ},c
pelumbuꞌna mani tauna to madósá to tiꞌara mengkoruꞌ i Pueꞌ Ala.