Paturoꞌ ntániꞌna hangko i Salomo (10:1–22:16)
10
Deꞌe miꞌi bahangapa mani paturoꞌna Salomo.Ánáꞌ to bukeꞌ pekiri mopagóeꞌ umána,
agáiáná ánáꞌ to mengkuli mopawiora laluna inána.
2 Párewá to ralámbiꞌ tauna moliu pebagiuꞌ
tiꞌara mobunduꞌ i hia,
agáiáná tauna to manótó rárá katueꞌraꞌ
ina tekábáhá hangko i kapate.
3 Tauna to manótó tiꞌara napatodáhi PUEꞌ ina marimi,
agáiáná Ia moewaꞌ peundeꞌána tauna to kadake.
4 Tauna to lohe ina meahiahiꞌ,
agáiáná tauna to madota ina mewaliꞌ pebuku.
5 Heáná to kararu pekirina,
ia morámpu pare i tempó mepare,
agáiáná tauna to maturu peá i tempó mepare,
mepakahiliá peá bábehiána.
6 Tauna to manótó molámbiꞌ pewátiꞌ,
agáiáná tauna to kadake polaluitana
mowuniángi kakadakena.
7 Heáná to mambuhinao tauna to manótó, molámbiꞌ pewátiꞌ,
agáiáná tauna to kadake, takáláliꞌá hangaꞌna.
8 Tauna to manótó laluna moundeꞌ mampehádingi paturoꞌ,
agáiáná tauna to hówóꞌ-hówóꞌ polaluitana ina manawoꞌ.
9 Tauna to manoroꞌ laluna, tueꞌ i kamaroꞌa-roꞌa,
agáiáná tauna to motengkoꞌ laluna, ina raisá tauna.
10 Heáná to mekapidi i tauna ntaniꞌ ina mopamapári tauna,
hai tauna to hówóꞌ-hówóꞌ polaluitana ina rapakanawoꞌ.
11 Polaluitana tauna to manótó
nodo uwai to tumbuꞌ to mopaꞌara katueꞌ,
agáiáná polaluitana tauna to kadake
mowuniángi tunggáiána to kadake.
12 Tauna to mekáhihiꞌ mopaꞌara posisalaꞌ,
agáiáná tauna to bukeꞌ ahiꞌ moámpungi tauna to masalaꞌ i hia.
13 Tauna to mataru pekirina mohuwárá laluita to bukeꞌ timbá,
agáiáná tauna to makuraꞌ pekirina paraluu rakándángi.
14 Tauna to kaladu pekirina meguru oaꞌ,
agáiáná tauna to bebe mohuwárá laluita
to mopakanawoꞌ wátána haduduána.
15 Kapebukuraꞌ nodo bente to mokámpái topebuku,
agáiáná topeahiahiꞌ maꞌángkárá katueꞌna
ánti kameahiahiꞌna.
16 Háwángina tauna to manótó mopaꞌara katueꞌ,
agáiáná polámbiꞌáraꞌ tauna to kadake mopaꞌara dósá.
17 Heáná to mopailalu paturoꞌ
mampetudeꞌá rárá katueꞌ to maroꞌa,
agáiáná heáná to tiꞌara motarima pekámbáróá
ina manawoꞌ.
18 Heáná to mowuniángi kamekáhihiꞌna,
ia miꞌi topodongkoꞌ,
hai tauna to mohuwárá laluita to mepakadake,
ia miꞌi tauna to bebe.
19 Tauna to handaꞌ polaluitana
bateꞌna mohuwárá laluita to salaꞌ,
agáiáná heáná to motimbá laluita to ina nahuwárá
ia miꞌi tauna to bukeꞌ pekiri.
20 Polaluitana tauna to manótó nodo peráꞌ to maroꞌa ntepuꞌu,
agáiáná pekirina tauna to kadake tiꞌara ara bunduꞌna.
21 Laluita to mesuwuꞌ hangko i humena tauna to manótó
mewaliꞌ pepaturoꞌ i handaꞌ tauna,
agáiáná tauna to bebe mate láwiꞌ makuraꞌ pampekirina.
22 Tauna mewaliꞌ pebuku ánti pewátiꞌna PUEꞌ,
agáiáná kehapiꞌ mobágóꞌ matimi,
tiꞌara ina motámbái kapebukuna.
23 Tauna to bebe moundeꞌ mobábehi to salaꞌ,
agáiáná tauna to bukeꞌ pekiri moundeꞌ mampopolumao bábehiá
to mentóáꞌ hangko i kanótó lalu.
24 Apa to napokalááꞌ tauna to kadake,
iti riꞌi to ina mewaliꞌ,
agáiáná apa to napoinao tauna to manótó,
bateꞌna ina nalámbiꞌ.
25 Ane narumpaheꞌ peangi,
tauna to kadake tiꞌarapoheꞌ ara,
agáiáná tauna to manótó,
maróhóheꞌ oaꞌ nodo kamaróhóna pehodaꞌá támbi.
26 Nodo kamaisuna cuka i ngihi,
hai kamalalana rámbu i mata,
noꞌonoꞌ miꞌi to lohe i tauna to mehuoꞌ.
27 Tauna to mengkoruꞌ i PUEꞌ ina matinuwuꞌ,
agáiáná katueꞌna tauna to kadake ina raparembe.
28 Tauna to manótó ina góeꞌ láwiꞌ ina molámbiꞌ to rahárungá,
agáiáná pehárungána tauna to kadake tiꞌara ina mewaliꞌ.
29 PUEꞌ mokámpái katueꞌna tauna to bulá laluna,
agáiáná mopakarugiꞌ tauna to mobábehi to kadake.
30 Tauna to manótó, ina tueꞌheꞌ i tampoꞌraꞌ haweꞌ i rue-ruena,
agáiáná tauna to kadake, tiꞌaraheꞌ ina tueꞌ oaꞌ i tampoꞌ iti.
31 Tauna to manótó mohuwárá laluita to bukeꞌ timbá,
agáiáná polaluitaraꞌ topodongkoꞌ ina rapengkaniika.
32 Tauna to manótó mohuwárá laluita to maroꞌa i pehádiraꞌ tauna,
agáiáná tauna to kadake moisá peá mebagiuꞌ.