Kanótó lalu hai kabebe mokióꞌ tauna
9
Kanótó lalu rapándiriꞌ nodo towawineto moaró támbi to mahile.
Ia mampopeángkáꞌ áriꞌina, pitu káuna.a
2 Ia mosambale gapiꞌ, morampaꞌi anggoroꞌ,
haneꞌi mopatimama pandeꞌ i mejána.
3 Ia mohuoꞌheꞌ topedureina towawine
lao i kapángkáꞌána kótá.
Rauliꞌ, “Deꞌe miꞌi pekióꞌna kanótó lalu:
4 Heáná to tiꞌara hangka iumbá pekirina,
mehupeꞌkoꞌ mai i kódóꞌ.
Heáná to tiꞌara bukeꞌ timbá,
5 maikoꞌ, mandeꞌkeꞌ pandeꞌkuꞌ
hai mainukeꞌ anggoroꞌ to kugalo miꞌi.b
6 Nukábáhá kabebemu,
megurukoꞌ bona mewaliꞌkoꞌ tauna to mapánde,
álána ina matinuwuꞌkoꞌ hai maroꞌa katueꞌmu.”
7 Ane mopaturoꞌkoꞌ tauna to paka mesasalaꞌi,
ina nasalaꞌikoꞌ huleꞌ.
Ane mokámbáróákoꞌ tauna to kadake,
ina marugiꞌkoꞌ.
8 Ineeꞌkoꞌ mokámbáróá tauna to paka mesasalaꞌi,
bodamu nakáhihiꞌ.
Rángina miꞌi nukámbáróá tauna to bukeꞌ pekiri,
ia ina mobiláꞌkoꞌ.
9 Ane nupaturoꞌ tauna to bukeꞌ kanótó lalu,
ina mantámbái kamanótóna laluna.
Ane nupaguru tauna to manótó,
ina mantámbái kamapándena.
10 Ane nuꞌundeꞌ mewaliꞌ tauna to bukeꞌ kanótó lalu,
to hangaa-ngaa nupaioru ia miꞌi mengkoruꞌkoꞌ i PUEꞌ.
Ane moisákoꞌ Pueꞌ Ala to Magasaꞌ,
ina nubuku mampekiri to maroꞌa.
11 Ánti kanótó lalu, ina matinuwuꞌkoꞌ,
hai katueꞌmu ina tetámbái i pare-parena.
12 Ane bukeꞌkoꞌ kanótó lalu,
nuporasiꞌi haduduámu.
Agáiáná ane mosapuákakoꞌ kanótó lalu,
io haduduámu to ina mampohurunga.”
13 Kabebe rapándiriꞌ nodo towawine to bereseseꞌ,
tiꞌara hangka iumbá pekirina,
hai tiꞌara naisá mahili.
14 Ia mehoda i káderá i lindoꞌ támbina
to i kapángkáꞌá kótá.
15 Ia mekióꞌ-kióꞌ i tauna to melempó,
to ina liliu peheꞌ, nauliꞌ:
16 “Heáná to tiꞌara hangka iumbá pekirina,
mehupeꞌkoꞌ mai i kódóꞌ.”
Ia tauna to tiꞌara ara pekirina nauliꞌ:
17 “Uwai to rapanako matáni,
hai pandeꞌ to raꞌandeꞌ ngkábuni matamaꞌ ntepuꞌu.”c
18 Agáiáná tauna to meuláꞌ i hia,
tiꞌara raisá kaꞌina upuna peinaoraꞌ.
Aramoheꞌ i duniáꞌraꞌ tomate.