Pekióꞌna kanótó lalu
8
Kanótó lalu rapándiriꞌ nodo towawine to mekióꞌ-kióꞌ,hai kapánde nodo towawine to molaluita napasimbuku.
2 Ia meángkáꞌ i wiwi rárá kamapángkáꞌána,
hai i porompengaꞌá rárá.
3 Ia meángkáꞌ woꞌo i babaꞌá pesuaꞌá i kótá,
molaluita napasimbuku, nauliꞌ:
4 “Ee upu-upu tauna, molaluitaꞌaꞌ i kómu,
nipehádingi paturoꞌkuꞌ upu-upu tauna i duniáꞌ.
5 Kómu to tiꞌara manikou hangka iumbá pekirimi,
megurukou bomi mapánde.
Kómu to bebe, megurukou rárá mampekiri.
6 Nipehádingiaꞌ, láwiꞌ ina mopahaweꞌaꞌ laluita to kaladu lempóna,
ina mohuwáráꞌaꞌ laluita to hintotoꞌ.
7 Polaluitangkuꞌ peisá rapoinálái,
hai mokáhihiꞌaꞌ dongkoꞌ.
8 Upu-upu laluitangkuꞌ bukeꞌ timbá,
tiꞌara haweꞌ hangkotuꞌ laluita to salaꞌ ba to mepakanawoꞌ.
9 Upu-upu laluitangkuꞌ tongawaꞌ i tauna to mataru pekirina,
i tauna to mapánde, laluitangkuꞌ hintotoꞌ.
10 Nutarima paturoꞌkuꞌ láwiꞌ mobunduꞌ ntepuꞌu hangko i peráꞌ,
hai kapánde melumbuꞌ hangko i buláwá to maroꞌa ntepuꞌu.
11 Kanótó lalu mobunduꞌ mani hangko i paramata,
tiꞌara ara kahibaliána, kehapiꞌ apa miꞌi to taundeꞌ.
12 Kódóꞌ kanótó lalu, araꞌaꞌ hingkakani hai kamatáká,
molámbiꞌaꞌ kapánde hai pekiri to maroꞌa.
13 Tauna to mengkoruꞌ i PUEꞌ, mokáhihiꞌ bábehiá to kadake.
Kódóꞌ mokáhihiꞌaꞌ kamaꞌángkáꞌ, to mampepemahile,
hai polaluita to meákálángi.
14 Kódóꞌ miꞌi to mampoweꞌi paturoꞌ hai kapánde,
pekiri to mataru hai kuasaꞌ.
15 Ánti kakódóꞌna, datu-datu peisáheꞌ mepárentá,
hai tadulako rabuku mopakanótó pehuku to hintotoꞌ.
16 Ánti kakódóꞌna, tadulako makuasaꞌ mepárentá,
noꞌonoꞌ woꞌo tuꞌáná-tuꞌáná,
hai upu-upu tauna to mepárentá i kanótó-nótóána.
17 Kódóꞌ maꞌahiꞌaꞌ i tauna to mampokaꞌahiꞌaꞌ,
hai tauna to tetidaꞌ mampeliꞌaꞌ, ina nalámbiꞌaꞌ.
18 Kupoweꞌi pebiláꞌ hai kapebuku to ina ara oaꞌ,
kupoweꞌi woꞌo kahintimbá.
19 To nilámbiꞌ hangko i kódóꞌ melumbuꞌ mani kamobunduꞌna
hangko i buláwá hai peráꞌ to maroꞌa ntepuꞌu.
20 Kubábehi oaꞌ apa to manótó hai hintotoꞌ
21 bona tauna to mampokaꞌahiꞌaꞌ kupopewaliꞌ pebuku,
hai támbina kupabukeꞌ hai párewá.
22 PUEꞌ mopaꞌaramoꞌ hangko tiꞌara mani ara to Napopewaliꞌ,
kódóꞌ to mewaliꞌ pantepuꞌuána pobágóꞌNa.
23 Kódóꞌ to Napopewaliꞌ rungu-runguna,
hangko tiꞌara mani ara duniáꞌ.
24 Hangko tiꞌara mani ara tahiꞌ,
hai katumbuꞌá uwai, kódóꞌ aramoꞌ.
25 Hangko tiꞌara mani ara buluꞌ-buluꞌna,
kódóꞌ aramoꞌ.
26 Hangko tiꞌara mani Pueꞌ mampopewaliꞌ tampoꞌ,
pádá, ba awu tampoꞌ, kódóꞌ aramoꞌ.
27 Tempóna Pueꞌ mampopewaliꞌ langiꞌ
i tempóNa moparailiki tahiꞌ hai langiꞌ, kódóꞌ aramoꞌ ionoꞌ.
28 Tempóna Pueꞌ mopaꞌara gawu i laerawa
hai mobungkáhi katumbuꞌá uwai
to moꞌóntóki tahiꞌ, kódóꞌ aramoꞌ ionoꞌ.
29 Tempóna Pueꞌ mopakanótó katoroꞌána tahiꞌ
bona tiꞌara moliungi páráiliꞌna,
hai i tempóNa mopakanótó peángkáꞌána duniáꞌ,
kódóꞌ aramoꞌ ionoꞌ.
30 Kódóꞌ to mamporángá Pueꞌ nodo ánáꞌNa to Napomahile,
alo-alona Napokagóeꞌaꞌ,
hai kódóꞌ woꞌo góeꞌaꞌ oaꞌ i lindoꞌNa.
31 Kódóꞌ góeꞌaꞌ i humalele duniáꞌ to Napaꞌara,
hai góeꞌaꞌ woꞌo moita tauna to Napopewaliꞌ.
32 Onoꞌ miꞌi haneꞌi ánáꞌkuꞌ, nipehádingiaꞌ,
láwiꞌ morasiꞌ tauna to mampeuláꞌi rárá katueꞌkuꞌ.
33 Nipehádingi paturoꞌkuꞌ bona mewaliꞌkou mapánde,
ineeꞌ nikálámbáhi.
34 Morasiꞌ tauna to mampehádingiaꞌ,
to i alo-alona mehoda mepegiá i babaꞌkuꞌ
mokámpái áriꞌi babaꞌángkuꞌ.
35 Láwiꞌ heáná to molámbiꞌaꞌ ina molámbiꞌ katueꞌ,
hai PUEꞌ mampokana.
36 Agáiáná heáná to tiꞌaraꞌaꞌ molámbiꞌ,
mopakarugiꞌ wátána haduduána,
hai tauna to mokáhihiꞌaꞌ, mokabiláꞌi kapate.”