7
Ee ánáꞌkuꞌ, nupeuláꞌi apa to kuꞌuliꞌ,hai nupailalu apa to kupárentáiákoꞌ.
2 Nupeuláꞌi párentángkuꞌ bona maroꞌa katueꞌmu,
nupailalu paturoꞌkuꞌ nodokoꞌ mokámpái mátámu.
3 Nubuhinao oaꞌ upu-upu paturoꞌkuꞌ iti
nodo hingkoliꞌ to mentakaꞌ i karaweꞌmu,
hai nupailalu mpiiꞌ, nodoꞌ ukiꞌ i watu poukiꞌá.
4 Nupahaweꞌ i kanótó lalu, kaꞌiana miꞌi halalumu,
hai nurekeꞌ miꞌi kapánde iti balemu ntepuꞌu,
5 bona tekámpáikoꞌ hangko i towawine to tiꞌara maroꞌa bábehiána
hai towawine to tiꞌara tetidaꞌ i toámána,
to menáráhi hai laluita to matáni.
6 Hangkani tempó kupetiro hangko i kalolu sungkekeꞌ támbingkuꞌ.
7 Kuita bahangapa ánáꞌntomoane to tiꞌara hangka iumbá pekiriraꞌ,
hadua i oloꞌraꞌ to tiꞌara mpuꞌu ara ákálána.
8-9 Kalumbaꞌ makáriꞌámuꞌ miꞌi,
kuita ánáꞌntomoane iti mengkalimba hungkuꞌ i polengkoꞌána rárá,
molumao lao i támbina hadua towawine.
10 Roo onoꞌ, kuita towawine iti membolo mai
lao modupaꞌ ánáꞌntomoane iti.
Ia mopakeꞌ badu to modiiꞌ laluna tobaleilo,
hai tunggáiána menáráhi.
11 Towawine iti bereseseꞌ, tiꞌara naisá mahili,
hai tiꞌara woꞌo tinda i támbina.
12 Ia paka lao i rárá hai i kahirámpuá tauna,
ba meángkáꞌ i porompengaꞌá rárá,
mopegiá tobaleilo to ina nakeloꞌ.
13 Towawine iti mokápui hai moángki ánáꞌntomoane iti,
tiꞌara mahili molaluita, nauliꞌ:
14 “Alo deꞌe handaꞌ bauꞌ i támbingkuꞌ
láwiꞌ mobukekimoꞌ dándingkuꞌ i Pueꞌ,
hai mohuhuꞌmoꞌ popenómbá pohintuwuꞌ.a
15 Onoꞌ miꞌi haneꞌi mesuwuꞌaꞌ mampeliꞌkoꞌ,
hai deꞌe-deꞌe kulámbiꞌmokoꞌ.
16 Kukádipurá miꞌi paturuángkuꞌ,
kupowálái báná to mababe to hangko i tampoꞌ Másiriꞌ,
17 hai kupokámburái to mawongi
to hangko i mire, gaharu hai kaninoꞌ.
18 Maikeꞌ moiluhi,
mopakaohakeꞌ peundeꞌána laluntaꞌ haweꞌ mepulo,
19 láwiꞌ toámángkuꞌ tiꞌara ara i támbi,
ia pohuꞌ karaoꞌ.
20 Handaꞌ dóiꞌ naꞌánti,
metinámbu rái hangko mesuleꞌ riꞌi.”
21 Noꞌonoꞌ penáráhina towawine to mokeloꞌ ánáꞌntomoane iti
hai laluita to maꞌálusuꞌ, álána tediiꞌ laluna.
22 Tiꞌara piꞌi mampekiri tobaleilo iti,
meuláꞌ perái i towawine iti
nodo gapiꞌ to raꞌánti lao i posambaleá,
hai nodo lagiwa to kana parohoꞌ,
23 álána ara to motohuꞌ hulena,
hai nodo woꞌo tádáhi to kana heáꞌ,
tiꞌara naisá kaꞌina matena.
24 Onoꞌ miꞌi haneꞌi ánáꞌkuꞌ, nupehádingiaꞌ,
hai nupailalu apa to kuhángáꞌámokoꞌ.
25 Ineeꞌmokoꞌ mampeuláꞌi peundeꞌána towawine iti,
hai ineeꞌkoꞌ napakanawoꞌ.
26 Láwiꞌ handaꞌ miꞌi tobaleilo to napakanawoꞌ towawine iti,
hai handaꞌ ntepuꞌu to mate ánti bábehiána.
27 Ane laokoꞌ i támbina, lempóna mouláꞌkoꞌ rárá
to menóntó i duniáꞌraꞌ tomate.