Mampopengaa paturoꞌ
6
Ee ánáꞌkuꞌ, ane modándimokoꞌi hadua tauna ina nubaiari indána,
2 tetakaꞌmokoꞌ i polaluitamu iti,
ia miꞌi dándimu haduduámu.
3 Ane noꞌonoꞌi, aramokoꞌ i kuasaꞌna tauna iti.
Bona tekábáhákoꞌ hangko i dándimu iti,
laokoꞌ i hia molingkudu nupembiáꞌ bona peisákoꞌ nakábáhá.
4 Ineeꞌkoꞌ mengkaroo hampaiꞌ ba letaꞌ mposoꞌ.
5 Mengkábáhákoꞌ hangko i dándimu iti,
nodo lagiwa ba tádáhi to tekábáhá hangko i karapakaꞌána.
6 Ee to lohe, laokoꞌ mampeita lántiꞌ
hai nupeuláꞌi rárá katueꞌraꞌ bona mapándekoꞌ.
7 Lántiꞌ tiꞌara ara to mampoioruáheꞌ,
tiꞌara ara to mokádipurá ba to mokuasaꞌiheꞌ.
8 Agáiáná kehapiꞌ noꞌonoꞌ, raisá morámpu pandeꞌraꞌ rawoli,
bona ara to raꞌandeꞌ i tempó rimi.
9 Ee tolohe, hangapa mani kamaruemu ina maturu-turu?
Impirákoꞌ ina mearó hangko i paturuámu?
10 Mehoda-hoda pekoꞌ hai melingkápuꞌ, nuꞌuliꞌ,
“Aa malelue maniaꞌ, ina maturuaꞌ hampaiꞌ.”
11 Onoꞌ haneꞌi hangkaꞌ-hangkaꞌkoꞌ meahiahiꞌ
nodo kahaweꞌraꞌ tauna toperampaꞌ,
hai narumpakoꞌ kamakuraꞌ
nodo kahaweꞌraꞌ to mombeala.
12 Tauna to kadake tiꞌara mobunduꞌ.
Ia paka modongkoꞌ.
13 Ia mekapidi hai mampopokale-kale bitina,
morao-rao bona mebagiuꞌ.
14 I laluna ia meákálángi oaꞌ,
pekirina bukeꞌ hai liwo to kadake,
hai ia mopaꞌara oaꞌ posisalaꞌ.
15 Onoꞌ miꞌi haneꞌi hangkaꞌ-hangkaꞌ perái ia ina molámbiꞌ huleáká,
ia ina nahuku Pueꞌ hai katueꞌna tiꞌara piꞌi ina maroꞌa huleꞌ.
16 Ara pitu pákáꞌna pambiárá tauna to nakáhihiꞌ PUEꞌ,
to tiꞌara mpuꞌu Naundeꞌ:
17 petótói to maꞌángkáꞌ,
hume to mohuwárá dongkoꞌ,
tae to mopapate tauna to tiꞌara masalaꞌ,
18 pekiri to moliwo oaꞌ to kadake
biti to manggagu mobábehi to kadake,
19 sabiꞌ dongkoꞌ to mopahaweꞌ oaꞌ to tiꞌara toꞌu,
hai tauna to mopaꞌara posisalaꞌ i oloꞌraꞌ to hampohalaluá.
Nukaraohi pebuálósi
20 Ee ánáꞌkuꞌ, nupeuláꞌi párentána umámu,
hai ineeꞌ nukákáhákei paturoꞌna inámu.
21 Nupailalu oaꞌ laluitaraꞌ,
nodo áwóló to mentakaꞌ i támbólómu.
22 Paturoꞌraꞌ iti ina moteteꞌkoꞌ iumbá-umbá peá kalaoámu,
ina mokámpáikoꞌ ane letaꞌkoꞌ,
hai ina mamponóntóákoꞌ ane mearókoꞌ.
23 Láwiꞌ párentáraꞌ tosaemu nodo huluꞌ to mewangkaꞌ,
paturoꞌraꞌ iti mopamabaa lalumu,
hai pekámbáróáraꞌ mamponóntóákoꞌ i rárá to maroꞌa.
24 Paturoꞌraꞌ iti mokámpáikoꞌ hangko i towawine to kadake bábehiána,
hai hangko i penáráhina toinána tauna ntaniꞌ.
25 Ineeꞌ nupakaelu ánti kamalásáꞌna
hai kamanárána petótóina.
26 Láwiꞌ towawine to mampobaluꞌ wátána
rasaro peá hai hantaboꞌ andeꞌá,
agáiáná ane mebuálósikoꞌ hai toinána tauna ntaniꞌ,
bateꞌna nubaiari hai peinaomu.a
27 Peisá paꞌi tauna motámbóꞌ api
agáiáná pewaruꞌna tiꞌara naꞌandeꞌ api?
28 Peisá paꞌi tauna molumao i wongko awaa api
agáiáná pálántáꞌ bitina tiꞌara mararuꞌ?
29 Noꞌonoꞌ miꞌi pewaliꞌna i tauna
to moromu hai toinána tauna to haduána.
Tauna iti bateꞌna molámbiꞌ pehuku.
30 Ane tauna manako pandeꞌ ánti kamarimina
tiꞌara ina rakáhihiꞌ.
31 Agáiáná ane ralámbiꞌi, hangaa-ngaa nabaiari pitu kánina,b
kehapiꞌ upu-upu párewá to ara i hia napeweꞌi.
32 Agáiáná heáná to mebuálósi tiꞌara ara pekirina,
tauna to mobábehi noꞌonoꞌ mopakarugiꞌ wátána haduduána.
33 Ia ina rapopeahiahiꞌ hai rasasalaꞌi,
kamahilina tiꞌara ina matántá.
34 Láwiꞌ toámána towawine iti ina mohiriꞌ hai mabukoꞌ ntepuꞌu,
ia ina meháwá, tiꞌara piꞌi ara ahiꞌna.
35 Hai ia tiꞌara ina mau motarima baiarina,
kehapiꞌ handaꞌ ntepuꞌu to raweꞌi,
bateꞌna peá mantaha oaꞌ i kamabukoꞌna.